Sentyabrın 1-dən Ukraynada bütün rusdilli məktəblər dövlət dilində tədrisə keçir. Bununla yanaşı, dilləri Aİ-də rəsmi olan digər milli azlıqlar üçün məktəblər hələ üç il ərzində öz dillərində fəaliyyət göstərəcək.
Belə ki, Ukrayna Ali Radasının 2017-ci ildə qəbul etdiyi qanun orta məktəblərin Ukrayna dilində tədrisə keçməsini nəzərdə tutur. Daha sonra, 2020-ci il yanvarın 16-da parlament yeni qanun qəbul edib, hansında ki, tədrisin Ukrayna dilinə keçmə qaydaları detallı şəkildə əksini tapıb. Təhsil və Elm Nazirliyinin məlumatına görə, ölkədə tədris ilinin sonunda 125 rusdilli dövlət məktəbi, həmçinin, 43 özəl məktəb fəaliyyət göstərirdi.
Rusiya BMT, ATƏT və Avropa Şurasının beynəlxalq hüquq müdafiə institutlarını rus dilinin diskriminasiyası ilə bağlı Ukrayna hökumətinin fəaliyyətinə adekvat qiymət verməyə çağırıb.
Ancaq Azərbaycan rus dilinə belə münasibət göstərməyib və göstərməyəcək. Çünki multikultural ölkədir. Ermənistanda rus dilinə qarşı pis münasibət göstərilir. Ölkəmiz isə hər zaman fərqliliyi ilə seçilir.
“Azərbaycan multikultural ölkədir, hər zaman başqa ölkələrin dillərinə, mədəniyyətlərinə böyük hörmətlə yanaşılıb”
Təhsil eksperti Kamran Əsədov qeyd etdi ki, ölkəmizdə kifayət qədər rusdilli şəxs var və bu səbəbdən rusdilli məktəblərin bağlanması gözlənilmir: "Keçmiş sovet respublikalarının bir çoxunda rus dilindən imtina etməyə başlayırlar. Bunlar Rusiya ilə siyasi problemi olan ölkələrdir. Əslində, 2017-ci ildən etibarən Ukraynada rusdilli məktəblərdə ibtidai siniflər bağlanmışdı, bu il isə tamamilə rus məktəbləri bağlandı. Bir çox ölkədə rusdilli məktəblərdən imtina etmək yolunda addım atılıb. Azərbaycanda belə bir addım gözlənilən deyil. Bu il 165 min uşaq 1-ci sinfə gedirsə, onun 17 minə qədəri rus bölməsi üzrə təhsil alacaq. Həmçinin, orta ümumtəhsil məktəbimizin 330-da tədris rus dilindədir. Azərbaycanda orta ümumtəhsil məktəblərində 480 min uşaq birbaşa xarici dil kimi rus dilini seçir. Azərbaycanda kifayət qədər rusdilli insan var və onların təhsilalma prosesi həyata keçirilməlidir. Konstitusiyaya görə də hər kəsin təhsil almaq hüququ var. Bu səbəbdən Azərbaycanda bu gözlənilmir. Onu da nəzərə almaq lazımdır ki, Azərbaycan multikultural ölkədir. Hər zaman başqa ölkələrin dillərinə, mədəniyyətlərinə böyük hörmətlə yanaşılıb. Bu proses davam edir və edəcək. Respublikamızda digər xalqların öz mədəniyyətlərini, dillərini, dinlərini inkişaf və təbliğ etmək üçün hər cür imkanlar mövcuddur”.
K.Əsədov onu da əlavə etdi ki, Qazaxıstan və Belarusda rusdilli məktəblərin çoxdur, Ermənistan, Gürcüstan, Estoniya kimi ölkələrdə isə azlıq təşkil edir: "Rusdilli məktəblərin daha çox olduğu ölkələr Qazaxıstan və Belarusdır. Maraqlı tərəf budur ki, hətta Ermənistanda rus dilində təhsil minimum səviyyədə, demək olar, yox həddindədir”.
Günel CƏLİLOVA
