Ermənistanın Dağlıq Qarabağda məskunlaşdırma aparması münaqişənin danışıqlar yolu ilə tənzimlənməsi səylərinə ziddir. Bunu “Trend”ə ATƏT Minsk Qrupunun amerikalı sabiq həmsədri Metyu Brayza deyib.
O deyib: “ATƏT Minsk Qrupunun amerikalı sabiq həmsədri olaraq Suriya və Livandan erməni mənşəli şəxslərin Dağlıq Qarabağa köçürülməsi məni çox məyus edir. Yerevanın bu addımı münaqişənin danışıqlar yolu ilə tənzimlənməsi səylərinə ziddir. Mən Minsk Qrupunun həmsədri olduğum dövrdə Ermənistan hökumətinin bu cür addım fikri ağlasığmaz idi. Çünki bu onların Minsk Qrupunun himayəsi altında vasitəçilik yolu ilə tənzimlənməyə nail olmaqda bütün ciddiyyətlərini itirməsinin əlaməti olardı. Bu şəraitdə Minsk Qrupu formatında irəliləyişi bərpa etmək çox çətin olacaq”.
Cenevrə konvensiyalarına əsasən, dinc sakinlərin döyüş zonalarına, həmçinin işğal olunmuş ərazilərə köçürülməsi hərbi cinayətdir. Bunu isə agentliyə amerikalı ekspert, jurnalist, ADA Universitetinin fəxri doktoru Tomas Qolts Ermənistanın Azərbaycanın işğal olunmuş ərazilərində qanunsuz məskunlaşdırma siyasəti barədə sualı cavablandırarkən deyib.
O qeyd edib ki, bu cür addımlar beynəlxalq məsuliyyətə yol açır.
Digər amerikalı ekspert Piter Teys isə bildirib ki, etnik qrupların Azərbaycanın suveren ərazilərinə köçürülməsi Dağlıq Qarabağda vəziyyəti ciddi şəkildə çətinləşdirir. O bildirib ki, müharibədən əziyyət çəkən Suriyadan qaçan suriyalı ailələrin Dağlıq Qarabağa köçürülməsi Qafqazın və bütün Avropanın polikultural və dinlərarası strukturuna ziyan vura bilər: “Avropa İttifaqının qurumlarının (Avropa Şurası və Avropa Komissiyası) Ermənistan hökumətinin bu fəaliyyətinə göz yumması narahatlıq doğurur. Ermənistan rəhbərliyi və onun faşist liderləri daim beynəlxalq hüququ pozur. Ermənistandakı rejim Avropanın demokratik standartlarına böyük təhlükə yaradır”.
P.Teysin sözlərinə görə, Ermənistanın terrorçu rejimi tərəfindən edilən kobud səhvlər, o cümlədən suriyalı vətəndaşların hesabına Azərbaycanın suveren ərazilərində yeni məskənlərin yaradılması bir daha göstərir ki, İrəvan Qafqazda etnik və mədəni birgəyaşayışa ziyan vurmaqda davam edir və hətta Avropa dövlətlərinin Afrikada müstəmləkəçiliyi zamanı tətbiq olunmayan üsullardan istifadə edir: “Qondarma “Dağlıq Qarabağ Respublikası”nın liderləri beynəlxalq hüququ, Avropa İttifaqının insan haqlarının müdafiəsi barədə Konvensiyasını, insan hüquqlarına aid olan və işğal olunmuş ərazilərdə irqlərin süni şəkildə qarışdırılmasını qadağan edən, Avropa Parlamentinin təsdiq etdiyi bütün qətnamələri kobud şəkildə pozur. Ermənistan bu cinayətkar fəaliyyəti dayandırmalı və beynəlxalq arenada məsuliyyətli iştirakçıya çevrilməlidir”.
Ekspert əlavə edib ki, Azərbaycan hərbi gücünün, qoşunlarının döyüş qabiliyyətinin Avropanın və Qafqazın bir çox ölkələrinin standartlarını üstələməsinə baxmayaraq, müdriklik və məsuliyyət nümayiş etdirir:“Ermənistanın faşist hökuməti təxribatlardan qaçmalıdır, əks halda bomba Ermənistan liderlərinin öz əlində partlayacaq”.
