İşğal altında olan Qarabağdakı erməni icması arasında son günlər rus dili və Rusiya ilə "tarixi bağlar” daha çox təbliğ olunur. Bu məsələyə separatçı rejimin başçısı Araik Arutyunyan və silah qaçaqmalçılığına görə əvvəllər həbs olunmuş Samvel Babayan rəhbərlik edirlər.
Onlar iddia edirlər ki, Rusiyada Qarabağdan olan çoxlu erməni yaşayır. Həmin ermənilərlə gələcəkdə əlaqələri gücləndirmək üçün rus dilinin təbliğatını gücləndirmək lazımdır. Bu məqsədlə Qarabağda ermənicə yayımlanan "İctimai Televiziya”da rus dilində efir vaxtının artırılması nəzərdə tutulub.
Bundan başqa, işğal altında olan ermənicə ümumtəhsil və ali məktəblərdə rus dilinin tədrisinə ayrılan saatların artırılması planlaşdırılır. Arutyunyan işğal edilmiş ərazidə bütün informasiyaların rusca yayılması tapşırığını da verib.Yaxın 5 ildə Qarabağla Rusiya arasında münasibətlərin genişləndirilməsi və inkişaf etidirilməsi nəzərdə tutulub. Eyni zamanda, Samvel Babayan Qarabağın Rusiyanın mandatı altına verilməsi ilə bağlı bəyanat verib. Ermənistanda Qarabağdakı erməni icması təmsilçilərinin bu sayaq çıxışı "separatçılıq” adlandırılır.
Son vaxtlar Qarabağdakı separatçı qurumda müşahidə olunan Rusiyaya doğru şübhəli meyllənmələr, rus dilinə geniş meydən verilməsi nəyə hesablanıb? Bu oyunun arxasında nə dayanır, nə baş verir?
“Ermənistanda rus dili məhdudlaşdırılırsa, TV-lər bağlanırsa, Paşinyan bu istiqamətdə...”
Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Ermənistanda antirus ovqatına baxmayaraq, Qarabağda separatçı rejim Rusiya ilə təmasları inkişaf etdirməklə burada Moskvanın mövqeyini gücləndirir: “Hesab edirəm ki, Azərbaycanın işğal olunmuş ərazilərində rus dilinin inkişafı və burada separatçıların bu istiqamətdə fəaliyyəti destabilizasiyaya xidmət edir. İlk növbədə, burada separatçıların rəhbəri A.Arutyunyanın Rusiyaya stavka etməsi diqqəti cəlb edir. Hesab edirəm ki, Qarabağda Moskva faktorunun güclənməsi Ermənistan hakimiyyətinə qarşı yeni bir siyasi planın olduğunu göstərir. Rusiya məhz bu istiqamətdə Qarabağda yeni siyasi əlaqələri işə salıb. Sözügedən proseslər Paşinyana qarşı yeni bir cəbhənin formalaşmasına xidmət edir. Fikrimcə, Ermənistan hakimiyyəti ilə Qarabağ separatçıları arasında yeni gərginlik yaranacaq. Ermənistanda rus dili məhdudlaşdırılırsa, TV-lər bağlanırsa, Paşinyan bu istiqamətdə mübarizə aparırsa, “Qarabağ klanı”nın təlimatı ilə separatçılar Rusiya ilə əlaqələri möhkəmləndirir. Paşinyan Arutyunyana qarşı mübarizə aparacaq”.
Politoloqun fikrincə, Kreml separatçıların əli ilə Paşinyana təzyiq edir.
Vidadi ORDAHALLI
