Məlum olduğu kimi, avqustun 31-də Azərbaycan Respublikası Prezidentinin köməkçisi Hikmət Hacıyev ekologiya, sudan səmərəli istifadə və səhiyyə istiqamətində fəaliyyət göstərən 41 QHT-nin sədrilə görüş keçirib.
Prezident yanında Qeyri-Hökumət Təşkilatlarına Dövlət Dəstəyi Şurası Katibliyinin mətbuat xidmətindən baki-xeber.com-a verilən məlumata görə, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri Azay Quliyev bildirib ki, QHT-hökumət dialoqu çərçivəsində təşkil edilən 4-cü görüşdə ekologiya, sudan səmərəli istifadə və səhiyyə istiqamətində fəaliyyət göstərən ictimai təşkilatlarla səmərəli fikir mübadiləsi aparılıb.
Aidiyyəti sahələr üzrə 41 QHT sədrilə Prezident köməkçisinin görüşü məlum sahədə hansı problemlərin həllinə perspektiv açır?
Milli Qeyri-Hökümət Təşkilatları Forumunun prezidenti Rauf Zeyni hesab edir ki, sözügedən sahələrin təmsilçiləri ilə Prezident köməkçisinin görüşü bu istiqamətdə bir sıra problemlərin həllində mühüm rol oynayacaq. “Bilirsiniz ki, ölkə başçısının göstərişi və tövsiyəsinə uyğun olaraq, Prezident köməkçisi, Prezident Administrasiyasının xarici əlaqələr şöbəsinin rəhbəri Hikmət Hacıyev QHT təmsilçiləri ilə silsilə görüşlər keçirib. Avqustun 26-da “İctimai lider”lər platforması, ayın 28-də şəhid ailələri, müharibə veteranları, qazilər təşkilatları ilə görüş keçirdi. Hikmət Hacıyev avqustun 31-də isə ekologiya, sudan səmərəli istifadə və səhiyyə istiqamətində fəaliyyət göstərən 41 QHT təşkilatı ilə görüş keçirib. Yəni indiyə qədər 100-dən çox QHT ilə görüşlər keçirilib onların təmsil olunduqları sahələrlə bağlı müzakirələr aparılıb. Bu müzakirələrin çox böyük effekti var. Əvvəla müzakirələr çox səmərəli və səmimi şəkildə aparılıb, hər bir qeyri-hökumət təşkilatı təmsilçisinə öz fikirlərini demək, qayğı və problemlərini danışmaq üçün şərait yaradılıb. Hikmət müəllim də onların hamısını dinləyib, qeydlərini aparıb. Baxmayaraq ki, o, QHT-lərdə, vətəndaş cəmiyyətində problemlərin nədən ibarət olduğunu hamımızdan yaxşı bilir. O, hamını dinlədikdən sonra nəticə olaraq bildirib ki, ölkə başçısı vətəndaş cəmiyyətinin inkişafı, ictimai nəzarətin gücləndirilməsi, şəffaflığı artırılması, bütövlükdə, vətəndaşların fəallığı, monitorinqlərin keçirilməsi, dövlət qərarlarının qəbul edilməsində vətəndaş iştirakçılığının, ictimai iştirakçılığın geniş səviyyədə bərqərar olunması, QHT-hökumət dialoqunun gücləndirilməsinin tərəfdarıdır. Bilirsiniz ki, uzun müddətdir müəyyən səbəblərdən QHT-hökumət dialoqu fəaliyyət göstərmirdi. Eyni zamanda, bütün bunlarla bərabər QHT-lərin illərlə yığılıb qalan problemləri var ki, indi bu məsələlərin hamısına aydınlıq gətirilir və ölkə başçısının tapşırığı ilə bu problemlərin həlli istiqamətində QHT-hökumət dialoqu bərpa olunub. Ümid edirik ki, yaxın gələcəkdə QHT-lərin, vətəndaş cəmiyyətinin bir çox hüquqi, sosial, texniki təchizatla bağlı problemi həll olunacaq, onların texniki bazasının gücləndirilməsi yönündə işlər görüləcək, onlar ofislərlə təmin olunacaq. Ümumiyyətlə, “Azərbaycan-2020: Gələcəyə baxış” İnkişaf Konsepsiyasının 9-cu fəslindən irəli gələn, yəni nəzərdə tutulan məsələlərlə bağlı bir çox irəliləyiş gözlənir. Bu da vətəndaş cəmiyyətinin inkişafına xidmət edəcək. Bütövlükdə, bu görüşlər vətəndaş cəmiyyətinin fəallığını xeyli artırıb və biz inanırıq ki, bu dialoqlar, görüşlər QHT-lərin bir çox probleminin həllində mühüm rol oynayacaq. Biz təklif etmişik ki, Milli Qeyri-Hökumət Təşkilatları Forumu ilə Prezident köməkçisinin ayrıca görüşü olsun. Hesab edirəm ki, QHT-lərin bir çox problemi cənab Prezidentin dəstəyilə öz həllini tapacaq”.
İndiyə qədər ekologiya, sudan səmərəli istifadə və səhiyyə istiqamətində fəaliyyət göstərən QHT-lərin fəaliyyəti qənaətbəxş olubmu? Onlar hansı problemlərlə üzləşiblər?
Bu məsələyə aydınlıq gətirən R.Zeyni bildirdi ki, bu QHT-lər həm qanunvericiliklə bağlı məhdud fəaliyyət göstəriblər, həm də beynəlxalq qrantların olmaması üzündən problemlərlə üzləşiblər: “Onların məhdud şəkildə fəaliyyət göstərməsinə bir sıra problemlər səbəb olub. Amma o qədər böyük layihələr, təşəbbüslər, təkliflər var ki, onların əksəriyyətinə dövlət tərəfindən dəstək olarsa, ölkədə daha güclü işlər görmək olar, dövlətimizin inkişafına vətəndaş cəmiyyəti də öz layiqli töhfəsini verə bilər”.
QHT sədrinin fikirlərindən belə qənaətə gəldik ki, bu dialoqun(ların) bu sahədə olan problemlərin həllində böyük rolu olacaq, onların fəaliyyətinin daha səmərəli şəkildə qurulmasına böyük töhfə verəcək.
İradə SARIYEVA
