Ermənistanın baş naziri Nikol Paşinyan yenidən bahalı qol saatı ilə gündəmə gəlib. İki il əvvəl Ermənistanda korrupsiya və rüşvətxorluqla mübarizə aparacağını, şəffaflığın təmin ediləcəyini, vətəndaşlara yaxşı həyat, sosial rifah vəd verən “məxməri inqilab” liderinin bahalı saatı hansı pula alması sosial şəbəkələrin erməni seqmentində və KİV-də ciddi müzakirələrə səbəb olub.
Paşinyanın BBC-nin “HARDtalk” verlişinin qonağı olarkən istifadə etdiyi bahalı saat diqqətlərdən yayınmadı. Paşinyan həmin verilişdə özünü təkcə aparıcının verdiyi Ermənistanın işğal siyasəti, Dağlıq Qarabağ bölgəsindəki qanunsuz hərəkətləri, sülh prosesinin pozulmasına istiqamətlənmiş təxribatçı addımlarına dair suallara dəxilsiz cavabları ilə deyil, həm də israrla təkzib etməyə çalışdığı milyonluq saatı ilə biabır etmiş oldu. Dilənçi ölkənin baş nazirinin milyonluq saatı, əlbəttə ki, diqqətdən yayına bilməzdi. Araşdırmalar zamanı məlum olub ki, Paşinyanın taxdığı Patek Philippe brendinə məxsus saat 1 milyon dollardan bahadır.
Xalqa böyük vədlər verərək hakimiyyətə gələn Paşinyanın belə faktla yaxalanması onun danışdıqlarının və verdiyi vədlərin populizmdən başqa nəsə olmadığını üzə çıxarmış oldu. İşğalçı Ermənistanın ağır sosial durumu fonunda ölkənin baş naziri Nikol Paşinyanın vaxtaşırı özünə və ailəsinə lüks həyatı, dəbdəbəni rəva görməsi erməni cəmiyyətində onsuz da böyük narazılıq və hiddət yaradıb. Bununla bağlı zaman-zaman işğalçı ölkənin mətbuatında siyasi şərhçilər, analitiklər kəskin tənqidi çıxışlar edib və sərt açıqlamalar verib, Paşinyanı korrupsioner sələflərinin yolu ilə getməkdə ittiham ediblər. Bildirilir ki, Nikol Paşinyan bütün şəxsi ehtiyaclarını dövlət büdcəsi hesabına ödəyir: dövlət büdcəsinə ailə büdcəsi kimi yanaşır. Baş nazir korrupsiyanın yolverilməz olduğunu bildirir, ancaq özünün davranışları ilə səmimi olmadığını ortaya qoyur.
Paşinyan meydanlara çıxanda populist texnologiyasından istifadə edərək əhalinin müxtəlif təbəqələrindən dividend almaq üçün lüks həyatı, rüşvətxor oliqarxları tənqid edirdi. Buna görə də hakimiyyətə gəlməyə müvəffəq oldu. Çünki rəsmi rəqəmlərə görə əhalisinin üçdə birindən çoxu son dərəcə yoxsul olan bir ölkədə belə populizm texnologiyaları asanlıqla tətbiq olunur və işə yarayır. Nikol Paşinyanın əvəzinə başqa bir məmur eyni şeyi etsəydi, ictimaiyyət buna o qədər də əhəmiyyət verməzdi, çünki “anti-oliqarxik” ifadələrini səsləndirən Paşinyan idi və cəmiyyət indi ona əvvəllər söylədiyi bütün sözləri dönə-dönə xatırlatmağa məcbur olur. Xatırladaq ki, bir müddət öncə Paşinyanın həyat yoldaşı Anna Akopyan paytaxtdan 150 kilometrlik məsafədə keçirilən bir tədbirə helikopterlə getdiyi üçün işğalçı ölkənin mətbuatında kəskin tənqid hədəfinə çevrilmiş, ailə dövlət büdcəsini talamaqda və israfçılıqda ittiham edilmişdi.
Görünən budur ki, işğalçı Ermənistanı bundan sonra da xoş günlər gözləmir. Nə qədər ki, oradakı korrupsioner rejimdə işğalçılıq siyasətini davam etdirən, sərsəm və populist bəyanatlar verən cinayətkar “siyasi” fiqurlar bir-birini əvəz edəcək, Ermənistan problemlərin girdabında çabalamağa davam edəcək. Ermənistanın baş naziri Nikol Paşinyanın qaçaqmalçılıqla məşğul olması barədə həm Ermənistan, həm də Rusiya mətbuatında kifayət qədər faktlar yer alır. Özü və ailəsi qaçaqmalçılıqla məşğul olan, yaxın qohumları və ətrafı rüşvəxorluq rəmzinə çevrilən Nikol Paşinyanın hakimiyyəti dövründə Ermənistan daha acınacaqlı duruma düşüb. Hər kəsə məlumdur ki, bu gün Ermənistanda ağır sosial-iqtisadi vəziyyət hökm sürür. İllərdir davam edən acınacaqlı vəziyyət Paşinyan hakimiyyətə gəldikdən sonra da dəyişməyib. Əksinə, ölkədəki durum daha ağırlaşıb. Demək olar ki, hər gün ölkədə işsizliyə, ağır sosial vəziyyətə etiraz olaraq aksiyalar keçirilir. Bundan əlavə, Paşinyanın hakimiyyəti dövründə Ermənistanda heç bir uğurlu iqtisadi layihə reallaşdırılmayıb, nəinki xarici investorlar, hətta yerli iş adamları belə ölkəyə sərmayə qoymaqdan imtina edir. Vətəndaşların şikayətlərini qulaqardına vuran Paşinyan dövlət büdcəsini sabiq yüksək vəzifəli məmurlardan korrupsiya yolu ilə yığdıqları vəsaiti geri almaqla doldurmağa çalışır ki, bunun da problemdən çıxış yolu olmadığını yaxşı anlayır. Artıq ermənilər özləri də etiraf edirlər ki, koronavirus pandemiyası dövründə ölkədəki sosial, iqtisadi problemlər pik həddə çatıb. Paşinyan bu müddət ərzində vətəndaşlara heç bir güzəşt etməyib, dövlət hesabına maliyyə dəstəyi gostərməyib, əksinə, iş yerləri bağlanıb, kommunal xərcləri ödəyə bilməyən vətəndaşların işığı, qazı, suyu kəsilib. Görünən odur ki, işğalçı ölkənin baş naziri özünə milyon dollarlıq saat almağı ehtiyac içində yaşayan vətəndaşlara yardım göstərməkdən daha vacib hesab edir.
Məhəmmədəli QƏRİBLİ
