“ABŞ-da azərbaycanlılara qarşı vəhşilik edən ermənilərin axtarışı çoxdan gözlənilirdi. Bu, polisin peşə borcuna, hüquq qaydalarının tələblərinə tamamilə uyğundur. Çünki ABŞ kimi özünü demokratik ideallığın vətəni sayan ölkənin mərkəzində, insanların gözü önündə dinc aksiya iştirakçılarına qarşı vəhşiliyə yol verilib”.
Bunu Publika.az-a açıqlamasında “Bakı-Xəbər” qəzetinin baş redaktoru, siyasi ekspert Aydın Quliyev deyib.
O bildirib ki, ABŞ-ın ölkəmizdəki səfiri də hadisədən dərhal sonra Bakıda mötəbər dövlət strukturları tərəfindən qəbul olunub, Xarici İşlər Nazirliyində söhbət aparılıb: “ABŞ səfiri də soydaşlarımızın keçirdiyi dinc aksiyaya ermənilərin quduz və qanlı basqınının təkzibolunmaz fakt olduğunu etiraf edib. Bu o deməkdir ki, ABŞ rəsmi dairələri, dövlət strukturları həqiqətən də orada dinc azərbaycanlılara qarşı cinayət törədilməsi faktını inkar etmir, birmənalı şəkildə qəbul edir. Ona görə də Los Anceles polisinin azərbaycanlılara qarşı zorakılıq etmiş bir neçə erməninin axtarışı və onların şəxsiyyətinin identifikasiyası ilə bağlı ortaya qoyduğu iradə tamamilə insanlıq və hüquq normalarına uyğundur. Eyni zamanda bu, dünyada artıq quduzlaşan və əndazəni aşmağa meyilli erməni mafiyasının, erməni diasporunun əl-ayağının yığışdırılmasında böyük rol oynaya bilər”.
A.Quliyevin sözlərinə görə, bu fakt Azərbaycan-ABŞ münasibətlərinin indiki yüksək tempinə və ruhuna tamamilə uyğundur: “Azərbaycan ictimaiyyəti arasında ABŞ-ın daxili və beynəlxalq məsələlərdə siyasətinin həqiqətən də humanist olub-olmadığı ilə bağlı fikirlərin, təsəvvürlərin dəqiqləşməsinə öz təsirini göstərəcək. Əgər ABŞ-da aydın olan bir faktla bağlı hüquqi araşdırma aparılmasaydı, polis belə bir elan verməsəydi və cinayətkar erməni gənclərinin izinə düşdüyünü ortaya qoymasaydı, Azərbaycan ictimaiyyəti arasında ABŞ-ın humanist və qanunun aliliyinə söykənən siyasətinə qarşı şübhə yaranacaqdı. Los Anceles polisinin atdığı bu addım Azərbaycanın haqq və ədalət mənafeyinə uyğun olduğunu göstərməklə bərabər, ABŞ haqqında da neqativ rəylərin əmələ gəlməsinin qarşısını alan mühüm amildir”.
