19/09/2020 02:51
728 x 90

Prezident Əliyevin Putinə konkret faktları göstərməsi Azərbaycan dövlətinin yenilməz güc göstəricisi kimi şərh edilir...

Akif Nağı: “Prezident İlham Əliyev həm ölkəmizin gücünə arxalanır, eyni zamanda da Türkiyə real müttəfiq kimi ortada olduğuna görə...”

img

Azərbaycan Prezidentinin Mətbuat xidmətindən verilən məlumata görə, avqustun 12-də Azərbaycan Respublikasının Prezident İlham Əliyev Rusiya Federasiyasının Prezidenti Vladimir Putinə telefonla zəng edib.

Prezident İlham Əliyev Prezident Vladimir Putinə iyulun 12-16-da Ermənistan-Azərbaycan dövlət sərhədinin Tovuz rayonu istiqamətində Ermənistanın törətdiyi təxribat barədə məlumat verib. Dövlətimizin başçısı Ermənistanın növbəti təcavüz aktı nəticəsində Azərbaycan Respublikası Silahlı Qüvvələrinin hərbi qulluqçularının və bir nəfər mülki şəxsimizn həlak olduğunu vurğulayıb. Prezident İlham Əliyev Ermənistan silahlı qüvvələrinin sərhəd boyunca kəndləri və yaşayış məntəqələrini artilleriya atəşinə tutması nəticəsində bir çox evin dağıldığını və yararsız hala düşdüyünü bildirib.

O, Ermənistanın bu hərbi hücumunun əsas məqsədinin üçüncü tərəfləri Ermənistan-Azərbaycan münaqişəsinə cəlb etmək olduğunu qeyd edib.

Prezident İlham Əliyev Ermənistan-Azərbaycan sərhədində baş vermiş toqquşmalar başa çatandan sonra, iyulun 17-dən bu günə kimi Rusiyadan Ermənistana hərbi təyinatlı yüklərin daşınmasının intensiv xarakter almasının Azərbaycan ictimaiyyətində narahatlıq və ciddi suallar doğurduğunu Rusiya Prezidentinin diqqətinə çatdırıb.

Dövlət başçısı Ermənistan-Azərbaycan sərhədində baş vermiş hərbi toqquşmadan dərhal sonra Rusiyadan Qazaxıstan, Türkmənistan və İran İslam Respublikasının hava məkanından istifadə edərək bu günə qədər Ermənistana daşınan hərbi təyinatlı yüklərin həcminin 400 tondan artıq olduğunu bildirib və telefon zənginin əsas məqsədinin bu məsələnin aydınlaşdırılması olduğunu vurğulayıb.  

  • “Artıq Azərbaycanın bu gücü, qüvvəsi ilə Rusiya hesablaşmalıdır”

Prezident İlham Əliyevin Rusiya Prezidenti Vladimir Putinə etdiyi telefon zəngini şərh edən Qarabağ Azadlıq Təşkilatının (QAT) sədri Akif Nağı  bildirdi ki, Prezidentin bu zəngi Azərbaycan xalqının və dövlətinin mövqeyini tam olaraq ifadə edib. “Hesab edirəm ki, regionda Azərbaycan Türkiyə ilə birləşib öz mövqeyini gücləndirir və bu faktla artıq Rusiya hesablaşmaq zorundadır. Rusiya 100 ildən çoxdur Cənubi Qafqazı tam şəkildə nəzarətdə saxlayır. İndi vəziyyət dəyişir, Türkiyə güclənir və artıq öz iddialarını ortaya qoyur. Azərbaycanın Xarici İşlər nazirinin və Müdafiə nazirinin Türkiyəyə səfəri, bunun ardınca isə Türkiyədən yüksək səviyyədə Silahlı Qüvvələrin Baş Qərargah rəisinin başçılığı ilə ölkəmizə edilən səfər təsadüfi xarakter daşımır. Təbii, bu barədə geniş məlumatlarımız olmasa da, güman etmək çətin deyil ki, Azərbaycanla Türkiyə arasında hərbi yaxınlaşma baş verir. Vəziyyəti Rusiya da, Ermənistan da bilir. Ona görə də bu gün Azərbaycan Prezidenti İlham Əliyev həm ölkəmizin gücünə arxalanır, eyni zamanda da Türkiyə real müttəfiq kimi ortada olduğuna görə mövqeyini aydın və sərt şəkildə ortaya qoya bilir. Necə ki, Ermənistan Azərbaycanla hədə-qorxu ilə danışır. Əlbəttə ki, Ermənistan bu cür öz gücünə danışmır, Rusiyanın, eləcə də başqa xarici dövlətlərin gücünə arxalanıb Azərbaycanla belə danışır, torpaqlarımızı işğal altında saxlamaqda davam edir. Azərbaycanla Ermənistan təkbətək üz-üzə qalarsa, Azərbaycan Ermənistanı çox asanlıqla məğlub edər və öz mövqeyini həyata keçirər. Amma ortada Rusiya faktoru olduğuna görə Azərbaycan münaqişə dövründə uzun illərdir Rusiya faktorunu müəyyən qədər neytrallaşdırmaq üzərində düşünürdü. Təbii ki, bu öz gücünə çətindir. Çünki biz bunu Gürcüstan nümunəsində də gördük ki, Rusiya heç bir beynəlxalq normaya əhəmiyyət vermədən hərəkət etdi. Bunu hamı görür”.

Ona görə də Azərbaycanın ağıllı, düşünülmüş şəkildə siyasət həyata keçirdiyini deyən A.Nağının sözlərinə görə, indiki şəraitdə Azərbaycan və Türkiyə birliyi o qədər güclənib ki, artıq ölkəmiz Rusiyadan hesabat, mövqe tələb edir: “Prezident açıq şəkildə Rusiyanın müxtəlif istiqamətlərdə Ermənistana hərbi yük göndərdiyini və bundan da ölkəmizin narazı olduğunu Putinə çox sərt şəkildə çatdırıb. Hesab edirəm ki, artıq Azərbaycanın bu gücü, qüvvəsi ilə Rusiya hesablaşmalıdır. Azərbaycan Prezidenti o dövlət başçılarından deyil ki, ya daxili, ya da xarici auditoriyaya hesablanmış ifadələr işlətsin. Cənab Prezident ölçür-biçir, hər şeyin yerini bilir və hədəfə dəyən mövqe ortaya qoyur. Fikrimcə, Prezidentin yaranmış vəziyyətlə bağlı Putinə zəng etməsi, onunla sərt danışması, konkret olaraq dövlətimizin mövqeyini ifadə etməsi Türkiyə ilə birgə Azərbaycanın gücünün göstəricisidir. Azərbaycan artıq öz yaxın müttəfiqlərini birmənalı şəkildə müəyyənləşdirir və Rusiya ilə də bərabərhüquqlu tərəf kimi danışır, Rusiya qonşu ölkədir və mövqelərini Azərbaycana diqtə etməsinlər, bərabər səviyyədə müəyyən məsələlər razılaşdırılmalıdır” - deyə A.Nağı vurğuladı.

İradə SARIYEVA 

Son xəbərlər