22/09/2020 10:36
728 x 90

12 iyul erməni təxribatlarının əsl mahiyyətinin dünyaya çatdırılmasına xaricdəki söyüşçü soydaşlarımız necə mane oldu…

Rauf Zeyni: “Erməni təbliğatı onlara istinad etməklə yaydığı xəbərlərdəki inandırıcıq əmsalını qaldıra bildi”

img

Ermənilərin 12 iyul Tovuz təxribatından sonra dünyanın bir çox ölkəsində olan Azərbaycan diasporunun nümayəndələri hadisələrin əsl mahiyyətini dünya birliyinə çatdırmaq istiqamətində səylər göstərdilər. Bunun fonunda həmin ölkələrdəki erməni diasporunun nümayəndələri ilə ciddi qarşıdurmalar yaşandı.

Təəssüf ki, bəzi “sapı özümüzdən olan baltalar” bu məsələdə də ermənilərin mövqeyindən çıxış etdilər. Xüsusilə də özünə bloger adını qoyan və xaricdə oturub daima Azərbaycan dövlətini təhqir edən bəzi yutuberlərin bu istiqamətdə “fəallığı” nəzərə çarpdı. Daima öz şəxsi kanalları vasitəsilə ölkəmizin simvollarını təhqir edən bu adamlar son rəzilliklərini mill məsələdə belə dövlətlərinin yanında olmamaqları ilə sübut etdilər. Onlara olan ictimai qınağın ən bariz göstəricisi isə verilişlərinə olan baxış saylarında özünü dərhal göstərməyə başladı. Müşahidələrimiz göstərdi ki, ermənipərəst mövqelərindən sonra onların verilişlərinə baxış sayında kəskin eniş dinamikası müşahidə olunmağa başlayıb.

Acı təəssüf doğuran faktlardan biri də odur ki, Ermənistan hakimiyyətilə mübarizə aparan  erməni blogerlər və xaricdə yaşayan siyasi mühacirlər öz ölkələrinə qarşı hər hansı bir tənqidi fikir səsləndirmədilər, əksinə, Azərbaycana qarşı hər bir ermənini birliyə çağırdılar. Bütün bu hərəkətlər bir daha təsdiqləyir ki, belə satqın adamların ermənipərəst qüvvələrə bağlılıqları var və Azərbaycana düşmən olan dairələr tərəfindən maliyyələşirlər. Bu qəbildən olan diasporumuzun üz qaraları xaricdəki həmvətənlərimizin Ermənistanın işğalçılıq siyasətinin əleyhinə olan aksiyalarını xuliqanlıq, quldurluq, vətənşüvənlik kimi qələmə verməyə çalışdılar. Bu şəxslər azərbaycanlıların vətənpərvərlik aksiyalarını ləkələməyə, onun mahiyyətini təhrif etməyə çalışır, bununla da, necə deyərlər, ermənilərin dəyirmanına su tökür, onların cinayətkar əməllərinə bəraət qazandırmağa cəhd edirlər. Onların bu fəaliyyəti eyni zamanda ermənilərin 12 iyul təxribatlarının əsl mahiyyətinin dünyaya lazımi şəkildə çatdırılmasına maneçilik törətdi. Onların bu addımını və bunun nəticəsində bizə vurulan ziyanın həcmini hansı səviyyədə qiymətləndirmək olar?

Milli Qeyri Hökumət Təşkilatları Forumunun rəhbəri Rauf Zeyni “Bakı-Xəbər”ə bildirdi ki,  əslində o cür fəaliyyətləri ilə onlar ən böyük ziyanı özlərinə vurdular:“Həmin adamlar özlərini demokratiya çarçısı kimi təqdim edirdilər. Bizim bəzi vətəndaşlarımız da onların informasiya təxribatlarının təsiri altına düşmüşdülər. Bir qədər loru dildə desək, bizim televiziya kanallarında eşidə bilmədiklərini ordan eşidib, həmin adamlara az qala həqiqət çarçısı kimi baxırdılar. Tovuz hadisələri həmin yotuber və blogerlərin əsl simasını üzə çıxarmış oldu. Məlum hadisələr zamanı Azərbaycan daxilindəki vətəndaşlarımızın bir yumruq kimi birləşdiyinin şahidi olduq. Hətta bəzi radikal müxalif partiyalar belə həmin məsələdə hakimiyyətə dəstəyini ifadə etdi. Eyni prosesi biz xaricdəki diaspor təmsilçilərimiz arasında da gördük. Orda da bütün umu-küsülər kənara atıldı, hamı Vətənin müdafiəsinə qalxdı. Bu səbəbdən də, keçirilən aksiyalar möhtəşəm alındı. Bizə qarşı əsl anti-təbliğatı isə daima hakimiyyəti söyən blogerlər apardı. Onlar, demək olar ki, Ermənistan hakimiyyətinin mövqeyi ilə üst-üstə düşən informasiyaları tirajlayırdılar. Xalqımızın mübarizəsinə başqa don geyindirməyə çalışırdılar. Ermənilərlə üst-üstə düşən bu fəaliyyətləri onların baxış sayına ciddi təsir etdi. Belə anti-milli mövqelərindən sonra əsas izləyici kütləsi həmin blogerləri boykot edir. Əsl simalarını tanıtdıqlarına görə ən ciddi ziyanı özlərinə vurdular. Təbiidir ki, apardıqları çirkin təbliğatla həm də ermənilərə dəstək oldular. İnformasiya cəbhəsində düşmənlə eyni səngərdə olmaq istənilən halda bizim ziyanımıza idi. Nə qədər olmasa da, bizim informasiyalarımızın daha geniş arelada yayılmasına maneçilik göstərə bildilər. Erməni təbliğatı isə onlara istinad etməklə yaydığı xəbərlərdəki inandırıcıq əmsalını qaldıra bildi. Bütün bunların bizə ciddi ziyanı oldu”.

İnsan müxalif ola bilər. Ancaq həlledici məqamda dövlətinə, ordusuna müxaliflik etməklə düşmən səngərinə keçməyin bir adı var, o da xəyanətdir.

Məhəmmədəli QƏRİBLİ

Son xəbərlər