22/09/2020 10:42
728 x 90

Azərbaycan Prezidenti antifaşist qəhrəman “Xarqo”nu da haqqına yetişdirdi…

Faiq Ələkbərli: “Ölkə başçısının Əhmədiyyə Cəbrayılovun 100 illiyinin qeyd edilməsi ilə bağlı verdiyi sərəncamı, atdığı addımı təqdirəlayiq hesab edirəm”

img

Azərbaycan Prezidenti İlham Əliyev Qarabağ müharibəsində qəhrəmancasına şəhid olan Azərbaycanın Milli Qəhrəmanı Mikayıl Cəbrayılovu son məzilə yola salarkən “Mən oğlumun qanını bu xalqa halal edirəm!” deyən Fransa Müqavimət Hərəkatının görkəmli nümayəndələrindən biri “Xarqo”, “Pyus Armed”, “Fraji”, “Qoçaq” və sair ləqəbləri daşıyan Əhmədiyyə Cəbrayılovun 100 illiyinin qeyd edilməsi haqqında Sərəncam imzalayıb.

Sənəddə qeyd edilir ki, 2020-ci ilin sentyabr ayında Azərbaycan xalqının igid övladı, İkinci Dünya Müharibəsi dövründə Antifaşist Müqavimət Hərəkatının görkəmli nümayəndəsi, əfsanəvi partizan Əhmədiyyə Mikayıl oğlu Cəbrayılovun anadan olmasının 100 illiyi tamam olur. “Əhmədiyyə Cəbrayılov bəşəriyyətin XX əsrdə məruz qaldığı qorxunc faşizm təhlükəsindən xilas edilməsində və nasizm üzərində qələbə çalınmasında böyük xidmətlər göstərmiş Azərbaycan xalqının mərd oğlu kimi rəşadətli döyüş yolu keçmişdir. 1941-ci ildə müharibənin başlanması ilə ölkənin müdafiəsi üçün könüllü surətdə cəbhəyə yollanan Əhmədiyyə Cəbrayılov daha sonralar Fransa Müqavimət Hərəkatında fəal iştirak etmişdir. Əhmədiyyə Cəbrayılovun yüksək bacarıqla həyata keçirdiyi çoxsaylı kəşfiyyat əməliyyatlarındakı misilsiz şücaətləri layiqincə qiymətləndirilmişdir. Fransa dövlətinin orden və medalları ilə təltif edilmiş həmvətənimizin, eyni zamanda, Müqavimət Hərəkatı iştirakçıları sırasında xatirəsi əbədiləşdirilmişdir. Əhmədiyyə Cəbrayılovun Vətənimizin suverenliyi və ərazi bütövlüyünün qorunması uğrunda döyüşlərdə canını fəda edərək uca şəhidlik mərtəbəsinə yüksəlmiş oğlu Mikayıl Cəbrayılov Azərbaycanın ilk Milli Qəhrəmanlarındandır”.

Qeyd edək Ə.Cəbrayılovu 1994-cü ildə 74 yaşında olarkən küçədə dayandığı yerdə avtomobil vurub və xəstəxanada dünyasını dəyişib.

Bildiyimiz kimi, son zamanlar camaat arasında Ə.Cəbrayılovun ölümünün müəmmalı olduğu haqda söz-söhbətlər dolaşır və onun erməni terroru nəticəsində həyatını itirdiyi haqda fikirlər var. Həmin dövrdə Bakı metrosunda ermənilərin törətdikləri terrorun hədəflərindən birinin də “Xarqo” olduğu ehtimalları var. Əlbəttə, biz buna israr etmirik, sadəcə, gəzən söz-söhbətləri qeyd edirik.

  • “Fikrimcə, onun erməni terroru, yaxud təsadüfən avtomobil vurması nəticəsində dünyasını dəyişməsinin  ayrıca araşdırılmasına ehtiyac var"

Azərbaycan Milli Elmlər Akademiyasının Fəlsəfə İnstitutunun aparıcı elmi işçisi, tarix üzrə fəlsəfə doktoru Faiq Ələkbərli “Bakı-Xəbər”ə bildirdi ki, yalnız Azərbaycanın deyil, həm də Fransanın qəhrəmanı olan Əhmədiyyə Cəbrayılovun 100 illiyinin keçirilməsi üçün Prezident İlham Əliyevin sərəncam imzalamsı çox təqdirəlayiq haldır. “Əhmədiyyə Cəbrayılov Azərbaycanı ölkəmizdən kənarda çox yüksək səviyyədə təmsil edən, tanıdan bir qəhrəman olub. Ona görə də biz belə qəhrəmanlarımızla yalnız fəxr edirik. Ölkə başçısının Ə.Cəbrayılovun 100 illiyinin qeyd edilməsi ilə bağlı verdiyi sərəncamı, atdığı addımı təqdirəlayiq hesab edirəm. Bu həm də müharibə şəraitində olan Azərbaycan dövlətinin öz qəhrəmanına verdiyi yüksək dəyər baxımından  çox müsbət addımdır. Biz qəhrəmanlarımıza nə qədər belə yüksək dəyər versək, bu bir o qədər gənc nəslin vətənpərvərlik tərbiyəsinin inkişafına çox müsbət təsir edə bilər. Azərbaycanda həmişə qəhrəmanlara böyük dəyər verilib və onların şücaəti bir vətənpərvərlik örnəyi kimi təbliğ edilib. Azərbaycanda “Xarqo” və digər ləqəblərlə Antifaşist Hərəkatında xüsusi fərqlənən, böyük qəhrəmanlıqlar göstərən insanın döyüş yolu böyük bir örnəkdir. Biz bəşəriyyət üçün böyük təhlükələr saçan faşizmlə mübarizə aparan  qəhrəmanlarımızı həm ölkəmizdə, həm də dünyada tanıdırıq. Ermənistan isə faşizmə xidmət edən, faşist əlaltılarını təbliğ edir.

O ki, qaldı Ə.Cəbrayılovun müəmmalı şəkildə həyatını itirməsi ilə bağlı söz-söhbətlərə, fikrimcə, onun erməni terroru, yaxud təsadüfən avtomobil vurması nəticəsində dünyasını dəyişməsinin ayrıca araşdırılmasına ehtiyac var. Şübhəsiz ki, ermənilər bizə düşmən olduqları üçün onların belə böyük şəxsiyyətlərimizin ölümündə iştirak etməsi ehtimalları, şübhələri var. Bunun detallı şəkildə araşdırılması vacibdir. Hər halda, bizim müəyyən şübhələrimiz var və bu şübhələrin prokurorluq orqanları tərəfindən araşdırılmasına, buna aydınlıq gətirilməsinə zərurət az deyil. İnanıram ki, bu məsələ araşdırılacaq. Düzdür, biz hər məsələdə erməni barmağı axtarmalı deyilik, amma bu məsələdə ermənilərin rolunun olub-olmadığını araşdırmağa dəyər” - deyə F.Ələkbərli qeyd etdi.

İradə SARIYEVA

Son xəbərlər