19/09/2020 04:03
728 x 90

Türkiyənin ali hərbi rəhbərliyi tam tərkibdə Bakıda - həm də döyüş atışlı təlimlərdən dərhal sonra…

Əhəd Məmmədli: “Türkiyənin regionda güclənməsi Ermənistana verilən kənar dəstəyi də neytrallaşdıra bilər”

img

Türkiyənin Milli müdafiə naziri Hulusi Akar, Baş Qərargah rəisi, ordu generalı Yaşar Güler, qoşun növü komandanları və digər yüksək rütbəli zabitləri Azərbaycana səfərə gəlib.

Azərbaycan Müdafiə Nazirliyinin mətbuat xidmətinin məlumatına görə, Türkiyənin geniş tərkibdə hərbi nümayəndə heyəti Azərbaycan-Türkiyə quru qoşunları və hərbi hava qüvvələrinin birgə döyüş atışlı taktiki və taktiki-uçuş təlimlərinin Yüksək Səviyyəli Müşahidəçi günü çərçivəsində təlimlərin birinci mərhələsinin son epizodunu izləyəcək. Türkiyə hərbi rəhbərlərinin Azərbaycana səfəri Azərbaycan xarici işlər naziri Ceyhun Bayramov və müdafiə naziri Zakir Həsənovun Türkiyəyə səfərindən bir gün sonraya təsadüf edir. Avqustun 11-də Türkiyə prezidenti Rəcəb Tayyip Ərdoğan Azərbaycanın xarici işlər və müdafiə nazirləri - Ceyhun Bayramov və Zakir Həsənovu qəbul edib. Görüş zamanı aparılan danışıqların məzmunu açıqlanmayıb. Ekspertlər Ermənistan-Azərbaycan sərhədində gərginlik fonunda iki ölkə arasında hərbi əməkdaşlıq məsələlərinin, Türkiyənin Azərbaycana hərbi-texniki və hərbi dəstəyinin təmin edilməsi üzrə addımların həyata keçirilməsi məsələsinin görüşün əsas müzakirə mövzusu olduğunu düşünür. Hadisələr Türkiyə ilə Azərbaycan arasında hərbi, siyasi müttəfiqliyin daha üst səviyyəyə qalxmağa doğru inkişaf etdiyini göstərir. Birgə hərbi təlimlərin fonunda baş verən bu  səfəri iki qardaş ölkə arasındakı əlaqələrin intensivləşməsi baxımından necə dəyərləndirmək olar?

Politoloq Əhəd Məmmədli “Bakı-Xəbər”ə açıqlamasında bildirdi ki, ilk növbədə buna səbəb olan amil Azərbaycan-Ermənistan sərhədinin Tovuz rayonu istiqamətində cərəyan edən hadisələr oldu:“Burada həm də həmin təxribatın region üçün hansı fəlakətlər yaradacağı, həmçinin hərbi əməliyyatlar genişlənəcəyi təqdirdə Türkiyənin hansı iqtisadi zərərlər çəkəcəyi nəzərə alınır.  Həmin hadisələrdən dərhal sonra iki ölkənin silahlı qüvvələrinin birgə hərbi təlimləri keçirildi.  Ardınca müdafiə və xarici işlər nazirlərimiz Türkiyəyə səfər etdi və orada həmin ölkənin prezidenti tərəfindən qəbul olundular. Sonra Türkiyənin yüksək zabit heyəti Bakıya gəldi. Bütün bu intensivlik Türkiyə ilə Azərbaycan arasında siyasi-hərbi yaxınlaşmanı daha da sürətləndirir. Bizim ölkə rəhbərliyinin Putinə göndərdiyi rəsmi məktubda Ermənistana Moskvanın göstərdiyi hərbi dəstəkdən narahatlıq ifadə olunur. Bütün bu hadisələr regionda yeni münasibətlər sisteminin başlandığını şərtləndirir. Artıq hiss olunur ki, Cənubi Qafqazda  Rusiyanın hegemonluğu sona çatmaq üzrədir. İlk dəfə idi ki, Tovuz provokasiyasından sonra Rusiya Türkiyə ilə Dağlıq Qarabağ münaqişəsini müzakirə edirdi. Bütün bunlar Azərbaycanın xeyrinədir. Türkiyənin regionda güclənməsi Ermənistana verilən kənar dəstəyi də neytrallaşdıra bilər. Ölkələrimiz arasındakı yaxınlaşmanın yeni mərhələyə qədəm qoyması bizi sevindirir. Çünki bilirik ki, Türkiyə ilə bizi qardaşlıq telləri bağlayır. Hesab edirəm ki, yaxın zamanlarda biz bu əməkdaşlığın daha da genişləndiyinin şahidi olacağıq. Bundan ən ciddi narahatlıq keçirən ölkə Ermənistan və onun havadarlarıdır”.

Görünən budur  ki, Azərbaycan-Türkiyə hərbi əlaqələrinin intensivləşməsi heç bir kənar ölkənin əleyhinə deyil. Azərbaycanın öz yaxın qardaşı olan Türkiyə ilə istədiyi formada əməkdaşlıq etməyə haqqı çatır.

Məhəmmədəli QƏRİBLİ

Son xəbərlər