19/09/2020 06:07
728 x 90

Ermənistanın hərb sistemi üçün misilsiz rüsvayçılıq – Qarabağda xidmət üçün müsabiqə elan edildi...

Ramil Məmmədli: “Erməni gəncləri hərbi xidmətdən yayınmaq üçün ölkəni tərk ediblər və bu proses indi də davam edir”

img

Azərbaycanın işğal altındakı torpaqlarında yerləşdirilən Ermənistan ordusu ciddi əsgər çatışmazlığı ilə üzləşib. Nəinki Qarabağda, Ermənistanın özündə də sözügedən problem açıq şəkildə özünü göstərir. Artıq erməni tərəfi də bunu etiraf etmək məcburiyyətində qalıb.

Erməni mediası yazır ki, Ermənistan ordusu ciddi əsgər çatışmazlığı ilə üzləşib. Sözügedən problemlə bağlı qeyd olunur ki, Qarabağda müqavilə əsasında xidmət üçün müsabiqə elan olunub. İşğal altındakı torpaqlarda minaaxtaran, snayper, artilleriyaçı, sürücü, pulemyotçu və s. üzrə hərbçilərin qəbulu elan olunub.Yeganə şərt həmin şəxslərin 40 yaşa qədər olmalarıdır. Əsgər çatışmazlığı Ermənistandakı dərin demoqrafik problemlər - doğumun kəskin azalması və kütləvi mühacirətlə bağlıdır. Bu səbəblərdən ildən-ilə hərbi xidmətə çağırılan şəxslərin sayı azalır. O da qeyd edilir ki, yaxın illərdə Ermənistanda bununla bağlı vəziyyətin daha da kəskinləşəcəyi gözlənir.

Görünən odur ki, sözügedən problem Ermənistanda daha da kəskinləşir. O baxımdan bütün bunları ekspertlər necə dəyərləndirirlər?

  • “Vəziyyət indi o dərəcədə kritik həddə çatıb ki, qarşı tərəf bunu açıq etiraf etmək məcburiyyətində qalıb”

Məsələyə münasibət bildirən hərbi ekspert Ramil Məmmədlinin sözlərinə görə, neçə ildir Ermənistan ordusunda bu problem var: “Sadəcə, vəziyyət indi o dərəcədə kritik həddə çatıb ki, qarşı tərəf bunu açıq etiraf etmək məcburiyyətində qalıb. Ermənistan ordusunda şəxsi heyətin tam komplektləşdirilməsi ilə bağlı ciddi problemlər mövcuddur. Artıq ermənilər bu problemi gizlədə bilmirlər. Ermənistan ordusu 40 yaşa qədər şəxsləri artilleriyaçı, mühəndis-istehkamçı, snayper, qumbaraatan, pulemyotçu və digər vəzifələrə xidmətə cəlb etmək üçün elan verib. Müraciətdə muzdluların işğal olunmuş Azərbaycan ərazilərində, yəni Dağlıq Qarabağda xidmət keçəcəkləri bildirilir. Onlara həvəsləndirici imtiyazlar da vəd edilir. Bütün bunlar onu göstərir ki, Ermənistan hərbi birləşmələrində canlı qüvvə ilə bağlı yaranan problemin kökündə minlərlə erməninin ordu sıralarında xidmətdən boyun qaçırması dayanır. Erməni gəncləri hərbi xidmətdən yayınmaq üçün ölkəni tərk ediblər və bu proses indi də davam edir. Məhz bu səbəbdən də sıravi əsgər vəzifələrinə muzdlu döyüşçüləri cəlb etmək istəyirlər. Əslində, bu kimi hallar hər zaman olub. Sadəcə olaraq, artıq rəsmi şəkildə müraciət etmək məcburiyyətində qalıblar. Çünki mövcud vəziyyət onları bu addımı atmağa məcbur edir. İşğal olunmuş Azərbaycan ərazilərində hərbi xidmətə cəlb olunan muzdluların arasında xarici vətəndaşların olma ehtimalı da var. Hətta bununla bağlı konkret fikir də bildirmək olar. Əgər hərbi xidmət keçmək üçün çağırışçıların sayı qənaətbəxş olsaydı, Ermənistan sıravi əsgər vəzifələrinə muzdlu döyüşçü qəbulu ilə bağlı belə bir addımı atmazdı. Demək, ermənilər ön xəttə döyüşə cəlb etmək üçün xaricdən muzdlu döyüşçülər də cəlb edirlər. Bu, istisna deyil. Biz Birinci Qarabağ savaşında da bunun şahidi olmuşuq. Onu da qeyd edim ki, Ermənistan xaricdən muzdlu döyüşçülər cəlb etməklə itkilərini də gizlədə bilir. Çünki döyüşdə ölən muzdlu barəsində rəsmi açıqlama verməyə də ehtiyac qalmır”.

Hərbi ekspertin fikrincə, yaxın illərdə sözügedən problem Ermənistanda daha da kəskinləşəcək.

Vidadi ORDAHALLI

Son xəbərlər