22/09/2020 09:03
728 x 90

Təl-Əvivdə Azərbaycana böyük həmrəylik aksiyası – Ermənistanın İsrail-Azərbaycan yaxınlaşmasını pozmaq cəhdlərinə tutarlı zərbə…

İsmayıl Ağayev: “Bütün bunlar sübut etdi ki, ermənilərin heç bir etirazı İsrail-Azərbaycan münasibətlərinə kölgə sala bilməz”

img

İsrailin Təl-Əviv Yafo şəhərində Ermənistanın son hərbi təxribatlarına etiraz və düşmənin xain hücumunun qarşısını böyük şücaətlə alan Azərbaycan Silahlı Qüvvələrinə dəstək məqsədilə yürüş-mitinq keçirilib.

Diasporla İş Üzrə Dövlət Komitəsindən verilən məlumata görə, İsraildə Azərbaycan Evinin təşkil etdiyi aksiyada bu ölkədə yaşayan 400-dən çox Azərbaycan kökənli soydaşımız iştirak edib. Azərbaycan və İsrailin dövlət bayraqlarının, Aprel və Tovuz döyüşlərində həlak olan şəhidlərimizin şəkillərinin və müxtəlif şüarların nümayiş etdirildiyi yürüş-mitinqdə çıxış edənlər Ermənistanın işğalçı və təcavüzkar siyasətini kəskin şəkildə pisləyiblər.

Yürüş-mitinq ərzində qəhrəman şəhidlərimizin adları bir-bir çəkilib, "Vur, keç səngəri, Azərbaycan əsgəri!", "Şəhidlər ölməz, Vətən bölünməz!", "Erməni terroruna son!", "Erməni təcavüzünə son!", "Qarabağ Azərbaycandır!", "Qarabağ bizimdir, Bizim olacaq", "Sən çağırsan gələrəm mən, yaşa doğma Azərbaycan!, Sənin üçün ölərəm mən, yaşa doğma Azərbaycan!" və sair şüarlar səsləndirilib.

Yerli polis qüvvələrinin nəzarət etdiyi aksiya bəyanatın oxunması ilə başa çatıb.

Bəyanatda bildirilib ki, İsraildə Azərbaycan Evinin İdarə Heyətinin üzvləri və rəhbərləri, eləcə də bu ölkədə fəaliyyət göstərən azərbaycanlı diasporun Əlaqələndirmə Şurasının üzvləri ölkəmizin Tovuz rayonu istiqamətindəki dövlət sərhədində Ermənistanın işğalçı qüvvələrinin həyasızcasına və azğıncasına törətdiyi hərbi təxribatları pisləyir və buna qəti etirazlarını bildirirlər. Qeyd edilib ki, məhz Azərbaycan Silahlı Qüvvələrinin qətiyyətli cavabı nəticəsində erməni işğalçıları geri çəkilib və böyük itkilər veriblər:

"Biz, əslən Azərbaycandan olan yəhudilər Dağlıq Qarabağın problemləri ilə yaxşı tanışıq və hələ XX əsrin 90-cı illərində şahid olmuşuq ki, daşnak qruplaşmaları SSRİ-nin dağıldığı dövrdə yaranmış qarışıqlıqdan, o dövrdə Azərbaycan ordusunun hələ formalaşmaması məqamından sui-istifadə edərək, bütün dünyadan – Livan, Suriya və digər ölkələrdən başkəsən erməni silahlılarını toplayaraq, Azərbaycan torpaqlarını həyasızcasına işğal edirdilər".

Soydaşlarımız xüsusilə vurğulayıblar ki, əslən Azərbaycandan olan İsrail sakinləri Azərbaycan ordusunun uğurları və qəhrəmanlığı ilə fəxr edirlər:"Bu gün bizim diasporun İsraildə tərbiyə almış, Azərbaycan naminə fədakarlıq və qəhrəmanlıq nümayiş etdirməyə hazır olan yeni gənc nəsli yetişib. Biz hamımız, əslən Azərbaycandan olan yəhudilər, 28 ildən artıq erməni işğalı altında olan Azərbaycan torpaqlarının azad edilməsi kimi müqəddəs işə gücümüz çatan səviyyədə töhfə verməyə hazırıq".

Göründüyü kimi, dünyanın nüfuzlu ölkələrindən birində Azərbaycan diasporunun nümayəndələri dövlətimizi dəsəkləyən konkret mövqe ortaya qoyublar. Maraqlıdır ki, bütün bunlar Ermənistanın Azərbaycan-İsrail münasibətlərinə xələl gətirmək cəhdləri ərəfəsində yaşanır. Bir neçə gün əvvəl ermənilər İrəvandakı  Holokost abidəsinə “Yəhudilərə ölüm” şüarı yazmışdılar. Bunu da İsrailin Azərbaycana silah satmasına etdikləri etirazla əlqələndirmişdilər. Məhz belə məqamda İsraildən ölkəmizə verilən açıq dəstək ermənilərin bütün cəhdlərini puç etmiş oldumu?

Beynəlxalq Diaspor Mərkəzinin rəhbəri İsmayıl Ağayev “Bakı-Xəbər”ə açıqlamasında bildirdi ki, Tovuz hadisələri bizə dostumuzu, düşmənimizi daha yaxından tanımaqla bağlı əlavə bir şans verdi:“Xüsusilə də bizim diasporumuz bu prosesdən üzüağ çıxa bildi. Mənim diaspor sahəsində geniş təcrübəm var. Tam məsuliyyətilə deyə bilərik ki, bu proseslərdə biz əsrlərlə təşkilatlanmış erməni diasporunun mövqelərinə sarsıdıcı zərbələr vura bildik. Bunun da başlıca səbəbi bizim diasporumuzun bütün ölkələrdə vahid mövqedən çıxış etməsi oldu. Artıq vətən, dövlət, ordu məsələsində xaricdəki diasporumuz təşkilatlana bilir. Bütün siyasi maraqlar, incikliklər kənara qoyulur.  Bizim bu hadisələrdə müşahidə etdiyimiz daha bir vacib məqam oldu: soydaşlarımızla yanaşı, digər millətlərin nümayəndələrinin də bizimlə çiyin-çiyinə dayanması. Bu amil Ermənisan  hakimiyyətini çox narahat etdi. Təsadüfi deyil ki, Paşinyan məhz bu hadisələrdən sonra İrəvanda diaspor işinə cavabdeh olan dövlət qurumunda təmizləmə apardı. Bu faktın özü Ermənistanın məğlubiyyətinin etirafı sayıla bilər. Təbiidir ki, dünyadakı erməni diasporu bu səhvləri düzəltmək, bizim mövqelərimizə ziyan vurmaq istiqamətində hərəkətə keçib.  Onları narahat edən amillərdən  biri də İsraildəki Azərbaycan diasporu ilə bağlı olan vəziyyətdir. Ordan bizə konkret dəstək gəlir. Ən marqlısı isə budur ki, bunu edən yəhudi əsilli şəxslərdi. Əsl diaspor nümunəsi budur. Azərbaycanı özlərinə vətən sayan həmin şəxslər aksiyada Azərbaycan və İsrailin dövlət bayraqlarının dalğalandırıb,  "Qarabağ Azərbaycandır!", "Qarabağ bizimdir, Bizim olacaq!" şüarlarının səsləndiriblər. Bu aksiya həm də  Azərbaycan-İsrail münasibətlərinin yüksək səviyyədə olduğunu göstərir. Ermənistan və ona havadarlıq edən dövlətlər bu aksiyanın baş tutmaması üçün əllərindən gələni əsirgəmədilər. Hətta aksiyadan bir neçə gün əvvəl İrəvanda şantaj əməlinə də əl atdılar. Bütün bunlar sübut etdi ki, ermənilərin heç bir etirazı İsrail-Azərbaycan münasibətlərinə kölgə sala bilməz. İsraildə keçirilən son aksiya möhtəşəm alınıb. Bu cür mətinliklərinə görə mən öz təşkilatımız adından yəhudi qardaşlarımıza dərin minnətdarlığımızı bildirirəm”.

Doğrudan da İsraillə Azərbaycanın münasibətləri  strateji maraqlar  və möhkəm təməllər üzərində qurulub. Bunu daha möhkəm edən amillərdən biri də həmin ölkədə çoxlu sayda Azərbaycan əsilli yəhudinin yaşamasıdır.

Məhəmmədəli QƏRİBLİ

Son xəbərlər