Son zamanlar beynəlxalq arenada uduzan ermənilər öz əsl mahiyyətlərini göstərməyə başlayırlar. Azərbaycan torpaqlarını 30 ilə yaxındır işğalda saxlayan Ermənistan öz dayaqlarını getdikcə itirməkdədir. Beynəlxalq mövqeləri zəiflədikcə, işğalçı rejim dünənədək sitayiş etdiyi ölkələrə qarşı çıxır. Dünya gerçəkləri qəbul etdikcə, Ermənistandan Ukrayna, ABŞ, İran, İsrailə qarşı aqressiya güclənir.
Bu günlərdə isə ermənilər İrəvanda Holokost qurbanlarının xatirəsinə ucaldılmış abidəyə "yəhudilərə ölüm" yazıblar. Ermənistan Yəhudi Cəmiyyətinin sədri Rimma Varjapetyan bildirib ki, bu, erməni xalqının Azərbaycana silah satan İsrailə etirazıdır.
Qeyd edək ki, Ermənilərin bu aqressiyasının kökünü anlamaq asandır. Tovuz hadisələrindən sonra onlar qazana bilmədikləri beynəlxalq dəstəyə görə daha da aqressivləşiblər. Ermənistanın siyasi rəhbərliyi açıq şəkildə bəyanatlar verib, Tovuz təxribatının Rusiyanın təhriki ilə baş tutduğuna dair rəy formalaşdırmağa çalışırdılar. Əslində, bunun özü mahiyyət etibarilə bir şantaj vasitəsidir. Çünki ermənilər Rusiyanın nəzarəti altında olan KTMT adlı hərbi ittifaqdan başqa cür dəstək gözləyirdilər. Əvəzində isə həmin təşkilat, ümumiyyətlə, ermənilərin təklif etdiyi mövzunun müzakirəsini gündəlikdən çıxardı. Rusiya isə dövlət səviyyəsində, demək olar ki, neytral mövqe sərgilədi. Məhz bundan sonra Ermənistanın daxili auditoriyasında anti-Rusiya ovqatı yaradılır və prosesin başında həmin ölkənin siyasi rəhbərliyi dayanır. Hətta vəziyyət o yerə çatıb ki, Ermənistan xüsusi xidmət orqanları həmin ölkədə açıq şəkildə Rusiya casuslarının ovuna çıxıblar, bu yöndə araşdırmalar aparılır. Biz analoji təzyiqi Ukraynaya qarşı da gördük. Tovuz hadisələrinin qızğın zamanında Ukrayna, birmənalı olaraq, Azərbaycanın ərazi bütövlüyünü dəstəklədiyinə dair bəyanat verdi. Belə açıq mövqe Ermənistanı qane etmədiyi üçün onlar İrəvandakı Ukrayna səfirliyi önündə etiraz aksiyası keçirib, binanı daşa basdılar. Analoji halları yəhudilərə, daha doğrusu, İsrailə qarşı etməyə başlayıblar. Həmin ölkədə Holokostla bağlı hər hansı abidənin olmadığı deyilir. Ola bilər ki, simvolik olaraq nəsə düzəldib, həmin şüarı ora yazıblar. İstənilən halda, yəhudilərə nifrətlərini ifadə ediblər. Bunu da İsrailin Azərbaycana silah satması ilə izah edirlər. Onlar gözəl bilirlər ki, İsrail Azərbaycanın strateji tərəfdaşıdır. Bizim əlaqələrimizin dərin kökləri var. Ermənistan kimi lazımsız bir ölkənin hər hansı formada etirazına görə İsrail- Azərbaycan münasibətlərinə xələl gələ bilməz. Dəfələrlə bu cəhdləri etsələr də, uğursuz alınıb. Yaxşı olar ki, İsrail dövlətinin rəhbərləri bu fakta ciddi nəzər salsınlar. Çünki məhz Holokostla bağlı İsraildə keçirilən tədbirə Ermənistan nümayəndə heyəti yüksək səviyyədə dəvət almışdı. Həmin vaxt biz haqlı olaraq buna etiraz etdik. Fikrimizi də bununla əsaslandırdıq ki, yəhudilərin məhvində iştirak etmiş Njdeni özünə ideoloji lider sayan, belə adama heykəl ucaldan bir ölkənin İsraildəki yəhudilərin soyqırımını simvolizə edən tədbirə dəvət alması tam absurddur. Buyurun, indi ermənilər yəhudilərə olan əsl münasibətlərini ortaya qoyurlar. Faşistlərin törəmələri olan bir ölkənin yəhudilərə münasibəti heç vaxt səmimi ola bilməz. İsrail bu haldan ciddi nəticə çıxarıb, Ermənistana münasibətini yenidən nəzərdən keçirməlidir.
Məhəmmədəli QƏRİBLİ
