Məlum olduğu kimi, avqustun 4-də Livanın paytaxtı Beyrutun dəniz limanında dəhşətli partlayış baş verib. Xatırladaq ki, partlayış səbəbindən Beyrutda azı 150 nəfər ölüb, 5 mindən çox insan yaralanıb. Partlayış dalğası Beyrutda yüzlərlə binanı dağıdıb və ya zədələyib, 300 mindən çox insan evsiz qalıb.
Partlayışdan sonra Beyrutu tərk edənlərin sayında artım olduğu da bildirilir və onların sırasında ermənilər də yer alır. Xatırladaq ki, partlayış nəticəsində Beyrutda zərər çəkmiş tikililər arasında erməni məhəllələri, o cümlədən, Müqəddəs Gevork kilsəsi, Livandakı Ermənistan səfirliyinin binası da var. İndiki durumda Livandan ermənilərin Ermənistana müəyyən sayda köçünün olacağı isə istisna olunmur. Artıq qondarma Qarabağ rejiminin rəhbəri Araik Arutunyan Livanda yerləşən Kilikiya Katolikosluğunun rəhbəri, diaspor ermənilərinin dini lideri I Arama zəng edib. O, Beyrutdakı partlayışa görə 100-150 erməni ailəsinin Livandan Qarabağa köçürülməsini təklif edib. Birinci Aramın təklifə müsbət cavab verdiyi və prosesin detallarının müzakirəsinə başlandığı bildirilir.
Ekspertlər isə qeyd edirlər ki, İrəvan Livan ermənilərini Ermənistandan daha çox işğal altındakı Azərbaycan ərazilərinə köçürməyə çalışacaq. Çünki Ermənistanın indiki sosial-iqtisadi vəziyyəti xaricdən yeni şəxslərin cəlbinə imkan vermir. Qarabağa köçürülən ermənilərə isə ilk mərhələdə diaspor yardım edir. Göründüyü kimi, bütün dünyanın gözü qarşısında işğal altında olan ərazilərimizə qanunsuz məskunlaşma həyata keçirməyə hazırlaşılır. Maraqlıdır ki, BMT və digər beynəlxalq qurumlar buna reaksiya vermirlər. Bu prosesin qarşısı hansı formada alınmalıdır?
AMİP funksioneri, politoloq Elşən Mustafayev “Bakı-Xəbər”ə açıqlamasında bildirdi ki, ermənilər işğal faktoru olandan bəri müxtəlif adlar altında belə qanunsuz məskunlaşmanı çox ediblər: “Bundan əvvəl Suriya ermənilərinin Qarabağa köçürülməsi prosesi həyata keçirilib. Onda da Suriyadakı müharibəni bəhanə edirdilər. İndi də Livanda baş verən partlayışı bir bəhanə gətirərək, onlar qanunsuz şəkildə Dağlıq Qarabağ bölgəsinə erməni ailələrinin yerləşdirilməsi üçün hərəkətə keçiblər. Hazırda Livan Erməni İnqilab Federasiyasının gənclər birlikləri partlayışda ermənilərin zərər çəkdiklərini iddia edərək, ermənilərin Qarabağa yerləşdirilməsi istiqamətində hərəkətə keçiblər. Artıq bu prosesə açıq şəkildə separatçı qurumun rəhbəri də qarışıb və ermənilərə köçməklə bağlı çağırış edib. Ermənistan hökuməti beynəlxalq qanunlara məhəl qoymadan təxribatçı hərəkətlərini davam etdirir. Suriyadan sonra Livan ermənilərini Azərbaycanın işğal olunmuş ərazilərində məskunlaşdırmağa çalışırlar. İndi isə ermənilər partlayışdan yararlanaraq Qarabağda qrup halında məskunlaşmaq niyyətindədirlər. Hədəf Qarabağda erməni əhalisinin sayını süni şəkildə artırmaqdır. Görünən budur ki, Ermənistan çirkin məqsədlərini humanist və dinc siyasət adı altında həyata keçirir. Livan və Suriyadan gətirilən erməniləri işğal olunmuş Dağlıq Qarabağda, həmçinin, Kəlbəcər, Qubadlı və Laçın bölgələrində yerləşdirir.
Ən qısa müddətdə ATƏT, BMT, AB, ATƏT-in Minsk Qrupu bu məsələyə etirazını bildirməlidir. Azərbaycan dövləti məsələni BMT-nin nəzərinə çatdırmalıdır.
1994-cü ildən etibarən dünyanın müxtəlif ölkələrində yaşayan ermənilərin qanunsuz olaraq Azərbaycanın Dağlıq Qarabağ və işğal edilmiş digər ərazilərinə köçürülməsi halları mövcuddur. Beynəlxalq təşkilatların mövqeyinə nəzər yetirdikdə görürük ki, Ermənistan işğalçı tərəf olaraq Cenevrə konvensiyaları ilə üzərinə düşən öhdəlikləri kobud şəkildə pozur, qaçqınların məqsədyönlü şəkildə məskunlaşma siyasətini apararaq demoqrafik tərkibin dəyişdirilməsi kimi i-qanunsuz əməllərini davam etdirir. Bütün bunlar beynəlxalq hüququn prinsiplərinə ziddir. Bir faktı da nəzərə alaq ki, Livan ASALA erməni terror təşkilatının yarandığı, inkişaf etdiyi ölkədir. Orada hazırda da kifayət qədər erməni əsilli terrorçu var. Bu adla kifayət qədər terrorçunun da işğal altında olan ərazilərimizə yerləşdirilməsi mümkündür”.
Azərbaycan bütün diplomatik kanallardan istifadə edərək bu prosesin durdurulmasını tələb etməlidir.
Məhəmmədəli QƏRİBLİ
