Ermənistan xüsusi xidmət orqanları ölkədəki və qurumdakı Rusiya casuslarını axtarır. Milli Təhlükəsizlik Xidmətinin rəhbəri Arqişti Karamanyanın göstərişi ilə bütün ölkədə Rusiyaya bağlı kadrların axtarışı davam edir. Bu barədə erməni mətbuatı yazıb. Bildirilir ki, xidmətin yeni və gənc direktoru Rusiya Federal Təhlükəsizlik Xidmətində təhsil alan kadrları üzə çıxarmağı tapşırıb. Buna səbəb isə onların hələ də sözügedən qurumla əməkdaşlığını saxlaması ehtimalıdır. Sistemi hansı yolla olursa-olsun təmizləmək qərarına gələn yeni direktor bu tapşırığı haradan aldığını açıqlamır.
O da bildirilir ki, Rusiyaya qarşı mövqeyi ilə tanınan Karamanyanın vəzifəyə təyinat aldığı ilk günlərdə onu tanıyanlar tezliklə bu proseslərin başlayacağını bildirirdilər. Buna nümunə olaraq Dövlət Nəzarəti Xidmətinin rəisi olduğu zaman Karamanyanın 2018-ci ildə Cənubi Qafqaz Dəmir Yoluna hücumun təşkilatçısı olduğu iddiası var.
Faktiki olaraq, Ermənistanda əl altdan anti-Rusiya siyasəti yürüdülür. Bu, gizli şəkildə Rusiya ilə düşmənçilik aparıldığının əlaməti sayıla bilərmi?
Beynəlxalq məsələlər üzrə ekspert Yeganə Hacıyeva “Bakı-Xəbər”ə açıqlamasında bildirdi ki, Ermənistanda Rusiya ilə bağlı siyasi gedişlər son vaxtlar daha geniş vüsət alıb:“İş burasındadır ki, Ermənistan Rusiya ilə münasibətlərində heç vaxt səmimi olmayıb. Ermənistan bir dövlət kimi mövcudluğunu Rusiyaya borclu olsa da, onlar heç vaxt Rusiyaya dost münasibəti göstərməyiblər. Rusiyada hər zaman müxtəlif adlarla Ermənistanla münasibətləri yaxşılaşdırmaq üzrə ixtisaslaşmış klublar fəaliyyət göstərib. Onlar hər zaman iki ölkə arasındakı münasibətlərə fərqli don geyindirməyə çalışıblar. 2018-ci ildə Ermənistan hakimiyyətində Rusiyaya birbaşa bağlılıq olub. Nikol Paşinyan gələndən sonra, güya bu yaxınlığın olmadığına dair rəy formalaşdırmağa çalışılır. Son Tovuz təxribatında Ermənistan Rusiyadan lazım olan dəstəyi ala bilmədi. Onlar bu dəstəyi dolayı yolla KTMT-dən gözləyirdilər. Sonrakı açıqlamalarında Paşinyan, Tonoyan açıq mətnlə demək istədilər ki, sanki Rusiya onları pis vəziyyətdə qoyub. Rusiya üçün hazırda adının Cənubi Qafqazdakı yeni eskalasiyada hallanması məqbul sayılmır. Ancaq hiss edilir ki, Ermənistan, zorla da olsa, Rusiyanı bura qatmaq istəyir. Bu vəziyyət iki ölkə arasındakı münasibəti daha da gərgin edib. Paşinyanın iki illik idarəetməsi onun tam səriştəsizliyini sübut etdi. Bütün bu günahları bir tərəfin üzərinə yıxmaq lazım gəlir. Buna görə də, Paşinyan Rusiya məni devirmək istəyir kimi şounu dövriyyəyə buraxıb. Bu səbəbdən də bütün ölkə boyu Rusiya casuslarının ovuna çıxmaqla bağlı bir rəy formalaşdırılıb. Məqsədli şəkildə daxili auditoriyanın könlünü alıb, onun başını qatmaq üçün Paşinyan belə addımlar atır. Xüsusilə də Tovuzdakı son hərbi uğursuzluğu da Rusiya ilə əlaqələndirmək üçün Paşinyanın əlinə yaxşı şans düşüb. Bu tendensiya Rusiyanı qəti qane etmir. Yəqin ki, adekvat cavabları olacaq. İstənilən halda, bu vəziyyət iki ölkə arasındakı münasibətlərin gərgin fazaya qədəm qoyduğundan xəbər verir”.
Görünən budur ki, Paşinyan bu cür şantajları ilə Rusiayanı ona daha yaxşı yiyəlik etməyə sövq etməyə çalışır.
Məhəmmədəli QƏRİBLİ
