Epidemiyanın necə inkişaf edəcəyi artıq vətəndaşlardan asılıdır - Avropa ölkələrinin gününə düşmək istəmiriksə...
“Biz hamımız yaxşı başa düşürük ki, insanlar yorulub, karantin rejimi hamımızı yorur. Bütün rəhbərlik fasiləsiz, demək olar ki, 24 saat ərzində iş başındadır. Çünki bu elə bir bəladır, elə bir xəstəlikdir ki, hələ çarəsi yoxdur. Ona görə yeganə yolumuz insanları qorumaq, yoluxmaların sayını azaltmaq, xəstəliyin geniş vüsət almasına yol verməmək və beləliklə, vətəndaşlarımızı, dövlətimizi bu vəziyyətdən xilas etməkdir”.
Bu fikirləri Prezident İlham Əliyev ölkəmizdə koronavirus pandemiyası ilə mübarizə sahəsində görülən tədbirlər və sosial-iqtisadi vəziyyətlə bağlı keçirdiyi müşavirədə deyib. Dövlət başçısı bildirib ki, karantin rejimi nə vaxt mümkünsə yumşaldılacaq:“Necə ki, artıq ayın 5-dən yumşalma olubdur. Ancaq vətəndaşlar da gərək başa düşsünlər ki, əgər bu yumşalmadan sonra biz yenə də xəstəliyin kəskin artdığını görsək, başqa çarəmiz olmayacaq, gərək yenə də sərtləşdirək. Biz bunu etmək istəmirik. Mən istəyirəm ki, bu yumşalma prosesi tədricən davam etsin və sonrakı yumşalma addımını şərtləndirsin. Amma əgər vətəndaşlar görsələr ki, artıq hər şey açılıbdır, yenə də bütün bu məsafəyə, qoruyucu vasitələrə əhəmiyyət verməyəcəklərsə, onda xəstəlik yenidən alovlanacaq. Biz gərək yenə də sərtləşdirilmiş tədbirlər görək, yenə də iqtisadiyyata zərbə vurulacaq, yenə də insanlar xəstələnəcəklər. Ona görə bütün Azərbaycan vətəndaşlarına bir daha müraciət edirəm ki, məsuliyyətli olun. Bu çox ağır xəstəlikdir. Bu xəstəlik yaş tanımır, cavan insanlar, gənc insanlar, fiziki cəhətdən sağlam insanlar, idmançılar xəstələnir və rəhmətə gedir. Bu, dünya üçün çox ciddi problemdir, bu gün dünyanın bir nömrəli bəlasıdır”. İlham Əliyev bir daha vətəndaşları məsuliyyətli olmağa çağırıb: “Məsuliyyətli olmalıyıq. Əgər belə olsa, dediyim bütün tapşırıqlar yerinə yetirilsə, biz qısa müddət ərzində bu karantin rejimini daha da yumşaldıb normal həyata daha tez qayıda bilərik”.
Beləliklə, bu açıqlamadan aydın görünür ki, koronavirusa qarşı mübarizənin effektiv olması və hamını narahat edən sərt karantin rejiminin yenidən qayıtmaması vətəndaşların məsuliyyətindən, gigiyena və təhlükəsizlik qaydalarına əməl etməsindən asılıdır. Əks halda, dövlət başçısının dediyi kimi, sərt karantin yenidən qayıdacaq. Eyni zamanda virusun artıq ikinci dalğasının başlanması da qaçılmaz olacaq. Yeri gəlmişkən qeyd edək ki, dünya artıq ikinci dalğadan əziyyət çəkməyə başlayır. Məsələn, Avropanın müxtəlif ölkələrində mütəxəssislər ikinci dalğa ilə bağlı narahatlıqlarını bildirirlər. Bir neçə gündür ki, Belçika epidemioloqları ölkədə koronavirusun ikinci dalğasının başlanması haqda xəbərdarlıq edir. Belçikalı Həkimlər Birliyi də ölkədə koronavirusun ikinci dalğasının başlandığına əmindir. O üzdən, ölkənin yenidən karantinə bağlanacağı istisna olunmur. Hökumətin yanında fəaliyyət göstərən Fransa Elmi Şurası da Fransanı yaxın aylarda ölkənin COVID-19-un ikinci dalğası ilə üzləşəcəyi barədə xəbərdarlıq edib:"Payızda və ya qışda epidemiyanın ikinci dalğasının alovlanma ehtimalı yüksəkdir. Fransada vəziyyət nəzarət altında olsa da, çox kövrəkdir, yaxın gələcəkdə epidemiyanın necə inkişaf edəcəyi daha çox vətəndaşlardan asılıdır". Fransanın baş naziri Jan Kastex, koronavirus bütün ölkədə yayıldığına görə, vətəndaşları arxayınlaşmamağa və sayıqlığı itirməməyə çağırıb. Almaniya Həkimlər Birliyi də ölkədə pandemiyanın ikinci dalğasının başladığını elan edib. Mütəxəssislər ikinci dalğanın başlanğıcında olduğunu, baş verənlərin mahiyyətinin iki-üç həftədən dəqiqləşəcəyini deyiblər. Onlar bu fasilənin xaricə və ya məzuniyyətə çıxan vətəndaşların geri qayıtması, məktəblərin açılması ilə əlaqəli olduğunu söyləyiblər. Mütəxəssislərin sözlərinə görə, hər iki amil Almaniyada infeksiyanın yayılma ehtimalını gücləndirir.
“University College London” və London Gigiyena və Tropik Tibb Məktəbinin tədqiqatçıları da İngiltərədə daha güclü ikinci COVID-19 dalğasının olacağını xəbər verirlər. Bildirilir ki, ölkədə daha yaxşı sınaq və izləmə sistemi olmadan məktəblər yenidən fəaliyyətə başlayarsa, sakinlər qışda orijinal yayılma vəziyyətindən ikiqat daha ağır olan ikinci COVID-19 dalğası ilə üz-üzə qalacaq. İngilis elm adamlarının araşdırmasında deyilir ki, Böyük Britaniyada məktəblər sentyabr ayında tam işləmə rejiminə keçərsə, bu, 2020-ci ilin dekabrında ikinci böyük dalğaya səbəb olacaq. İspaniyanın şimalındakı Kastiliya-i-Araqon əyalətinin rəhbərliyi 32 min əhalisi olan Aranda-de-Duero şəhərini təcrid etmək qərarı verib. Buna səbəb şəhərdə və ətraf bölgələrdə koronavirusa yoluxma sayının artması olub.
Amerikada, Asiyada da bir çox ölkələrdə ikinci dalğa barədə xəbərdarlıqlar edilir. Qeyd edək ki, hazırda yoluxma sayına görə ABŞ, Braziliya, Hindistan, Rusiya, Cənubi Afrika, Meksika, Peru, Çili, İspaniya, Kolumbiya ilk onluqdadır. Sözügedən ölkələrin rəsmi qurumları tibbi maskadan istifadə, sosial məsafə və gigiyenik qaydaya əməl etmək şərtilə yumşalma qərarı versələr də, bu qaydalara əməl etməyən vətəndaşlarının məsuliyyətsizliyinin acı nəticəsini çəkməyə başlayıb. İndi Azərbaycanın da eyni nəticə ilə üzləşməməsi birbaşa vətəndaş məsuliyyətindən asılıdır.
Ramil QULİYEV
