"Azərbaycan ağır pandemiya dövründə də sosial müdafiə və sosial təminat layihələrinin istisnasız olaraq icrasını davam etdirən nadir ölkələrdən biridir. Ötən 6 ayda Azərbaycanda həyata keçirilən sosial təyinatlı tədbirlər məzmununa və nəticələrinə görə dünya ölkələrindən xeyli fərqlənir. Azərbaycan Prezidentinin sosial fəaliyyət kursu bu dövrdə iki böyük nəticə ilə diqqəti cəlb edir. Ölkəmizdə həm cəmiyyətin koronovirusdan müdafiəsi sahəsində əhəmiyyətli nəticələrə nail olunur, həm də sosial paketlər cəmiyyət-dövlət etimadının daha da dərinləşməsinə və möhkəmlənməsinə gətirib çıxarır".
Bu fikirləri Olaylar.az açıqlamasında "Bakı-Xəbər" qəzetinin baş redaktoru, siyasi ekspert Aydın Quliyev bildirib. Siyasi ekspert deyib ki, çox sayda ölkələri nümunə göstərmək olar ki, onlarda hakimiyyətlərin pandemiya dövründəki fəaliyyəti cəmiyyətdə o qədər də anlayışla qarşılanmadı və hətta bəzi hallarda hökumət əleyhinə əsaslı etirazlar hakim siyasi qüvvələrin dərin hökumət böhranları ilə nəticələndi:"Biz Azərbaycanda bu cəhətdən də tam fərqli mənzərə görürük. Faktdır ki, Azərbaycan Prezidentinin heç bir halda səngiməyən sosial layihələri cəmiyyətin böyük dəstəyinə söykənməklə hakimiyyətə ictimai etimadın artmasının mühüm mənbələrindən birinə çevrilir. Həyata keçirilən rəy sorğuları da Azərbaycanda sosial siyasətə böyük ictimai etimad göstərilməsindən xəbər verir. Nümunə üçün xatırladaq ki, Ermənistanda tək son 6 aydakı fəaliyyətsizlik və ya yetərsiz fəaliyyət nəticəsində Paşinyan hakimiyyətinin azı 30 faiz populyarlıq itkisinə məruz qaldığını ən müxtəlif rəy sorğu mərkəzləri təsdiq edir." Aydın Quliyev bildirir ki, bu ağır pandemiya dövründə Azərbaycanda sosial siyasətin mühüm xüsusiyyətlərindən biri də məşqulluğa və sosial rifaha dəstək paketlərinin dərinə və eninə genişlənməsindən ibarət olmasıdır: "Bu o deməkdir ki, sosial paketlərdən bəhrə götürən əhalinin sayı artır, yeni-yeni əhali qrupları paketlərin əhatəsinə alınır, yeni növ sosial himayə paketləri yaradılır. Demək olar ki, paketlərin növü və sayında heç bir ixtisarlara imkan verilmir. 5 milyon vətəndaşa 5-6 ayda 3,5 milyard manat sosial dəstək maliyyəsi sərf etmək çox böyük proqramdır və bir çox ölkə belə proqramları icra etmək gücünə sahib olmaq istərdi. Həm tək -tək insanlara, həm də müxtəlif əhali qruplarına yönəlik sosial paketlərin effekti rifah məsələsində özünü aydın göstərir. Tənha yaşayanlara bir cür qayğı və xidmət göstərilir, özünüməşqulluğa və ünvanlı yardımlara ehtiyacı olanlara bir cür dəstək verilir, ictimai iş formalarından asılı insanlara isə başqa cür xidmət və dəstək ifadə edilir. 100 mindən çox aztəminatlı ailəyə ərzaq yardımı xidmətinin təşkili xırda iş deyil. 1,5 milyon işçinin əmək haqqının azı 80 faizinin hətta insanlar işləmədən dövlət hesabına ödənişi ancaq sosial dövlətçilik prinsiplərinə mütləq üstünlük verə bilən hakimiyyətlərin işi ola bilər. Biz bu böyük nümunəni də Azərbaycanda görürük. Pandemiyadan ziyan görmüş özəl iş sektoruna göstərilən dövlət dəstəyi layihələrini də əlavə etsək, Azərbaycanın nümunəsində maraqlı bir modelin üç mühüm elementini görürük:
1.Azərbaycanda əhali koronavirusdan etibarlı şəkildə qorunur.
2.Əhalinin rifahının əsaslarını dağıda biləcək bütün meyllərin qarşısı alınır.
3.Özəl və dövlət iqtisadi sektorunda növbəti inkişaf mərhələlərinə möhkəm əsaslar yaradılır".
