Qərəzli mövqeyi ilə seçilən “Amnesty International” təşkilatı, ənənəsinə sadiq qalaraq, Azərbaycanla bağlı növbəti bəyanat yayıb. Budəfəki bəyanatın əvvəlkilərdən bir fərqi də onun təhdid və xəbərdarlıq xarakterli olması ilə bağlıdır.
Bəyanatda qeyd edilir ki, guya Azərbaycan hakimiyyəti siyasi müxalifəti, ifadə azadlığını, dinc toplaşmaq və birləşmək azadlığı hüququnu amansız şəkildə boğur. İddia edilir ki, guya orduya dəstək mitinqindən sonra 100-dən çox adam həbs edilib: “Sonuncu həbs və qorxutma dalğası onsuz da həddindən artıq dağılmış müxalifətin məhvinə gətirib çıxara bilər. 100-dən çox insan, xüsusən müxalifət fəalları və onların tərəfdarları iyulun 14-15-də Bakının mərkəzində keçirilən mitinqdən sonra siyasi motivlərlə həbs edilib. Mitinq zamanı həbs edilmiş 70 nəfərdən başqa, çox sayda müxalifət fəalı saxlanıb. 60-dan çox insan isə ictimai asayişi pozmaqdan polisə müqavimətə qədər ən müxtəlif ittihamlarla həbs edilib. Onların vəkillərlə görüşünə icazə verilmir və qeyri-rəsmi məlumatlara görə, onlar amansız işgəncələrə məruz qalır. Azərbaycan hakimiyyəti siyasi motivli təqiblərə, siyasi rəqiblərini və onların tərəfdarlarını qorxutmağa və onlara qarşı repressiyalara son qoymalıdır. İnsan hüquqlarını həyata keçirdiklərinə görə cinayət işləri və ya inzibati işlər üzrə özbaşına həbs edilmiş bütün şəxslər dərhal və qeyd-şərtsiz azad edilməlidir”.
Göründüyü kimi, “Amnesty International” təşkilatı, hər zaman olduğu kimi, yenə uydurma rəqəmləri ortaya atıb. Hansı ki, bunları təsdiq edən heç bir fakt yoxdur.
“Deyilənlərin reallıqla heç bir əlaqəsi yoxdur”
Məsələyə münasibət bildirən media eksperti Azər Həsrətin sözlərinə görə, “Amnesty International” təşkilatı məqsədyönlü şəkildə Azərbaycan barəsində belə yalan informasiyalar yayır: “Amnesty International” və bənzər digər təşkilatlar Azərbaycanda normal mənbələrdən informasiya almırlar. Yəni təsadüfi adamlardan, kimdən və haradan gəldi informasiya alırlar. Daha sonra əldə etdikləri bu informasiyaları ciddi qəbul edirlər. Niyə? Çünki hətta özləri də bilirlər ki, mənbələri etibarlı deyil. Lakin həmin qeyri-ciddi mənbələrə istinad edərək bəyanatlar verirlər. Ona görə bunu edirlər ki, məqsədləri Azərbaycanı gözdən salmaq, bu məsələlərlə bağlı qərəzli rəy formalaşdırmaqdır. O üzdən, belə situasiyalarda ölkəmizə qarşı qarayaxma kampaniyası aparırlar. “Amnesty International”ın belə mövqeyi bizi təəccübləndirmir. Çünki bənzər təşkilatların nə üçün fəaliyyət göstərdiyini yaxşı bilirik. Bunlar Qərbin bəlli mərkəzləri əlində ipə-sapa yatmayan, Qərbin çaldığına oynamayan, öz müstəqil siyasətini yürüdən dövlətlərə qarşı alətlərdir. Bu təşkilatlardan təzyiq aləti kimi istifadə edilir. Bax, məsələnin kökündə dayanan faktor budur. O baxımdan hesab edirəm ki, Azərbaycanla bağlı səslənən həmin fikirlər uydurma və iftiradır. Deyilənlərin reallıqla heç bir əlaqəsi yoxdur”.
Görünən odur ki, bundan sonra da oxşar hallar baş verə bilər. Biz hər zaman belə hallara hazır olmalıyıq.
Vidadi ORDAHALLI
