Ramil Məmmədli: “Beyinlərə yeritmək istəyirlər ki, güya bizdən qəhrəmanlar çıxmır”
Məlum olduğu kimi, Tovuzdakı erməni təxribatı zamanı gedən döyüşlərdə şəhid olan general Polad Həşimovun xatirəsinin əbədiləşdirilməsi üçün ölkə rəhbərliyi onun adının doğulduğu Qəbələ rayonunda küçələrdən birinə verilməsi ilə bağlı sərəncam imzalayıb.
Həmin qərar icra olunub generalın adını daşıyan küçəyə lövhələr vurulan kimi, dezinformasiya yaymaqda mahir olan şəbəkə yenidən iş başında göründü. Onların iddialarına görə, Polad Həşimov küçəsi Həzi Aslanov küçəsinin adının dəyişdirilməsi nəticəsində lövhələnib. Bununla da bu məlumat insanlara Həzi Aslanova olan hörmətsizlik kimi təqdim olunub. Əslində isə Həzi Aslanov küçəsindən başlayan Polad Həşimov küçəsi İsmayıl bəy Qutqaşınlı küçəsinin bir hissəsindən ayrılaraq şəhərin mərkəzi küçələrindən birinə verilib. Beləliklə, nəinki Həzi Aslanov küçəsi, heç İsmayıl bəy Qutqaşınlı küçəsinin də adına toxunulmayıb.
Qəbələ Rayon İcra Hakimiyyəti bəzi kütləvi informasiya vasitələrində və sosial şəbəkələrdə Qəbələ şəhərində şəhid general-mayor Polad Həşimovun adının Həzi Aslanov küçəsinə verilməsi ilə bağlı əsassız məlumatlar yayılmasına münasibət bildirib:“Polad Həşimovun adı Qəbələ şəhərində Şəhidlər Xiyabanının yerləşdiyi küçəyə verilib. Bununla bağlı Polad Həşimov küçəsi başlanğıc nöqtəsi Həzi Aslanov küçəsi ilə kəsişmədən başlayaraq son nöqtəsi Arif Haqverdiyev küçəsi ilə kəsişməyədək davam edir.
Həzi Aslanov küçəsinin adı isə dəyişdirilməyib. Bu küçənin başlanğıc nöqtəsi Heydər Əliyev prospekti ilə kəsişmədən başlayaraq son nöqtəsi 1941-1945-ci illər Böyük Vətən müharibəsi zamanı həlak olmuş şəxslərin xatirəsinin əbədiləşdirilməsi məqsədilə ucaldılmış abidə kompleksinədək uzanır.
Rayon rəhbərliyi bir daha kütləvi informasiya vasitələrini, sosial media istifadəçilərini həqiqətə uyğun olmayan məlumatlar yaymamağa və ictimaiyyətdə çaşqınlıq yaratmaqdan yayınmağa çağırır”.
Çox maraqlıdır ki, bu, Polad Həşimovla bağlı yayılan ilk dezinformasiya deyil. Bir neçə gün əvvəl də bəzi KİV generalın, güya qeyri-döyüş şəraitində ölməsi ilə bağlı yanlış məlumat dövriyyəyə buraxmışdı. Həmin məlumatla da bağlı Müdafiə Nazirliyi ayrıca açıqlama yaymağa məcbur oldu. Xalqın sevgisini qazanan şəhid generalımızla bağlı dövriyyəyə buraxılan bu cür böhtan xarakterli məlumatların yayılmasında hansı məqsədlər güdülə bilər?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Azərbaycan dövləti və xalqı hər zaman öz qəhrəman övladlarına sayğı ilə yanaşıb:“Onların adları əbədiləşdirilərək nəsildən-nəslə ötürülüb. Ermənilərin Tovuz istiqamətində olan hücumunun qarşısının alınması zamanı şəhid olan general-mayor Polad Həşimov kimi qəhrəmanımızın da adının əbədiləşdirilməsilə bağlı dövlətimiz tərəfindən lazımi addımlar atılıb. Prezident Qəbələdə səfərdə olarkən onun ruhuna olan ehtiramı kimi şəhid generalın fotosu qarşısında şəkil də çəkdirdi. Elə həmin səfər zamanı göstəriş verildi ki, Qəbələdəki küçələrdən birinə Polad Həşimovun adı verilsin. Bugünlərdə həmin tapşırıq icra olundu. Generalın adını daşıyan küçəyə onun adı yazılmış lövhələr vuruldu. Məhz bu məlumatı yalnış istiqamətdə təqdim edən xəbərlər yayılmağa başladı. Artıq bu məsələyə rəsmi münasibət də bildirilib. Razıyam ki, bu, Polad Həşimovla bağlı dövriyəyə buraxılan ilk dezinformasiya deyil. Onun güya qeyri-döyüş şəraitində həlak olması ilə bağlı məlumatlara mən də rast gəlmişdim. Sanki hansısa dairələr generalımızın qəhrəmanlığının üstünə kölgə salmağa çalışır. Biz belə hadisələrin çox şahidi olmuşuq. Digər qəhrəman övladlarımızla da bağlı belə fikirlər zaman-zaman səslənib. Mən bu cür çirkin fəaliyyəti təsadüfi saymıram. Bunlar məqsədli xarakter daşıyır. Bunun da arxasında Azərbaycana düşmən olan qüvvələr durur. Təəssüflə qeyd etməliyik ki, xaricdən idarə olunan həmin dairələrin ölkəmizdə də emissarları az deyil. Onlar cəmiyyətdə ruh düşkünlüyü formalaşdırağa çalışırlar. Beyinlərə yeritmək istəyirlər ki, güya bizdən qəhrəmanlar çıxmır. Belə hallarla bağlı əlaqədar dövlət qurumları lazımi tədbirlər görməlidir. Əks təqdirdə, belə zərərli fəaliyyətlərin sayında artım müşahidə edə bilərik. Müharibə dönəmində dezinformasiya və panika yayanlarla bağlı hər zaman sərt tədbirlər görülüb. Polad Həşimov Azərbaycan xalıqının qəlbində daim yaşayacaq”.
Xalqın ehtiramla yad etdiyi qəhrəmanalrı ilə bağlı çaşdırıcı məlumatların yayılması doğrudan da təsadüfi fəaliyyətə oxşamır. Bu şəbəkənin tam dairəsinin müəyyənləşməsinə ciddi ehtiyac var.
Məhəmmədəli QƏRİBLİ
