Erməni mediası yazır ki, Paşinyan Rusiyada erməni-azərbaycanlı toqquşmasında maraqlıdır. O istəyir ki, daha sonra bu prosesdə rusları ittiham edərək, anti-Rusiya kampaniyasını körükləsin və nəticədə Ermənistanın geopolitik kursunu dəyişdirsin.
Sözügedən məsələ ilə bağlı bir sıra maraqlı məqamlara toxunulub: “Rusiyada erməni-azərbaycanlı qarşıdurmaları İrəvan hakimiyyətini narahat etmir. Hər şey səfirin və icmanın öhdəsindədir. Bunun əvəzində isə Nikol Rusiya ilə münasibətləri kəskinləşdirmək üçün hər şey edir. Əvvəla 24 iyunda Moskvada keçirilən Qələbə paradından imtina edir, adını “koronavirusa görə” qoyur, ancaq az sonra Minskdəki toplantıya şəxsən gedir. İkincisi, Marqarita Simonyanın üzərinə öz troll və zombilərini salır, “patriot görüntüsü” yaradır və ictimaiyyətdə anti-Rusiya əhval-ruhiyyəsini genişləndirir. Hətta indi müxtəlif ölkələrdə erməni-azərbaycanlı toqquşması baş verərkən diaspor üzrə komissarı ilə birgə tətilə yollanır. O baxımdan qəti əminlik yaranıb ki, Nikol Rusiyada erməni-azərbaycanlı qarşıdurmalarında maraqlıdır. Bundan daha sonra Rusiyanı ittiham etmək, Rusiya əleyhinə təbliğat aparmaq və ölkənin siyasi kursunu dəyişmək üçün yararlanmağı hədəfləyir. Nikolun addımlarının başqa izahı yoxdur”.
Bütövlükdə, neçə vaxtdır ki, Paşinyan Rusiya ilə münasibətləri qırmaq üçün əsaslı bəhanə axtarır. O baxımdan deyilənlərdə müəyyən qədər həqiqət payı var.
Maraqlıdır, bəs ekspertlər bu versiyanı necə dəyərləndirirlər?
“Belə toqquşmalar məhz Rusiyada daha çox baş versə, bu zaman Paşinyanın...”
Məsələyə münasibət bildirən siyasi ekspert Ramil Hüseynovun sözlərinə görə, Paşinyan hər vasitə ilə çalışır ki, Rusiyaya qarşı ölkədə güclü ovqat formalaşsın: “Onun bu siyasəti hakimiyyətə gəldiyi gündən bəri müxtəlif formada özünü göstərir. Ona yaxın olan media vasitələri Rusiyaya qarşı davamlı təbliğat aparırlar. Bəzən bu, daha geniş miqyas alır. Tarixə ekskurs edərək Rusiyanı sərt şəkildə ittiham edirlər. Rusiyaya yaxın olan iş adamları, siyasilər sıxışdırılır. Rus telekanallarının yayımını məhdudlaşdırmaq üçün hüquqi proseslərə start verilib. Təbii ki, bütün bunlar Kreml tərəfindən xoş qarşılanmır. Ancaq Rusiya rəsmiləri də gedən siyasətin fərqindədirlər. Paşinyan Qərbin müəyyən dairələri qarşısında öhdəlik götürüb. Həmin öhdəliklərin ümumi mahiyyəti ondan ibarətdir ki, Ermənistan Rusiyanın təsir dairəsindən çıxsın. Ancaq bu o qədər də asan deyil. Paşinyan düşünür ki, Ermənistan Rusiyadan lazım olanı alıb. Söhbət Azərbaycan ərazilərinin işğalı zamanı Rusiyanın verdiyi dəstəkdən gedir. O üzdən, ölkə rəhbərliyi Ermənistanın iqtisadi inkişafını Qərblə yaxınlaşmaqda görür. Çünki Rusiyadan qopa bilmədikləri üçün Qərbdən gözlədiklərini ala bilmirlər. Bu səbəbdən hər vasitə ilə çalışır ki, Rusiyada azərbaycanlılarla ermənilər arasında toqquşmalar geniş vüsət alsın. Belə toqquşmalar məhz Rusiyada daha çox baş versə, bu zaman onun öz planlarını həyata keçirmək üçün daha əlverişli zəmin yarana bilər. Görünən odur ki, Paşinyana müxalif olan qüvvələr də onun bu məkrli planından xəbərdardırlar”.
Belə məlum olur ki, Paşinyan Rusiya ilə münasibətləri korlamaqda qərarlıdır. Eyni zamanda, bunun üçün daha “optimal” vəziyyətin yaranmasını istəyir.
Vidadi ORDAHALLI
