Hər kəsin bir amacı var bu dünyaya gəlişində! Hələ kiçik yaşlarımdan nənəm deyərdi ki, bu dünyaya gələrkən hər kəsin taleyi alnına yazılır və bu yazı səni dünyaya nə məqsəd ücün gəldiyin məqama qədər yüksəldir.
Həyatı anladıqca düşünürsən, cox az bir zaman çərçıvəsındə keçir ömrümüz. Məktəb, universitet, sosial və fərdi həyat kəsiyində insanlığa, millətinə və ailənə necə yararlı olmağa və onun üçün nələrisə dəyişməyə və dəyişdirməyə hazırlanırsan.
Bu, ilk baxışdan çox asan görünsə də, həyatda fenomenal bir dəyişiklik etmək hər kəsə nəsib olmur. Doğrudur, bizim Dədə Qorqud, Babək, Koroğlu, Nizami Gəncəvi, İmadəddin Nəsimi, Həsən bəy Zərdabi, Üzeyir Hacıbəyli, Hacı Zeynalabdin Tağıyev, Məhəmməd Əmin Rəsulzadə və başqa bu kimi fenomenlərimiz olub və bu siyahıya, təbii olaraq, zaman keçdikcə Mübariz İbrahimov və başqa adlar əlavə olunacaq mütləq.
Bu şox mühüm bir hadisədir, belə insanlar tarixdə iz buraxır və yeni tarix belə yaranır. Artıq 27 ildir mənim doğulduğum ölkədə qara bir müharibə küləyi əsir və xalqımın sinəsində Qarabağ boyda bir yara var.
Əslində, bu yara köhnə yara olaraq qaysaqlamış kimi görünürdü, üstünü zaman örtmüşdü, sanki vətən yaralı olsa da, o yaranı sarımadan gündəlık həyat qayğılarında hər gün ertələnərək dərinlərə qarışmışdı bu acı.
Və bir gün.
O gün sən tanındın.
O gün sən şəhid oldun.
O gün milli həyatı və gerçəklıkləri dəyişdin, Generalım!
General Polad Həşimovun şəhadətindən sonra Azərbaycanda və bütün dünyada – İngiltərə, Amerika, Almaniya, Fransa, Belçika, Rusiya, Türkiyə və
başqa ölkələrdə Azərbaycan bayraqları dalğalanmağa başladı. Minlərlə vətəndaş Ali Baş Komandana Azərbaycan Ordusuna yazılmaq üçün muraciət etdi.
Sanki bu xalq özünə inamını itirmişdi, haqqa inamını itirmişdi, doğruya, həqiqətə inamını itirmişdi. Və sənın şəhidliyinlə artıq dəyərlər dəyişdi.
Dini və lobbiçiliyi hər zaman önəmli bilinən və dünyada ən öndə gedən “dünya polisi” kimi qabardılan Amerika Konqresi belə Ermənistana yerini tanıtmağa və işğalçı olduğunu bildirməyə məcbur qaldı.
Özü ehtiyac içərisində yaşayaraq, ona dövlət tərəfindən verilən evinı şəhid ailəsinə bağışlayan, dostunun toyuna gedib əsgərləri üçün cörəyin arasında toy süfrəsindən pay gətirən, rahat yerini buraxıb səngərdə əsgərlərlə birlikdə vətən keşıyi çəkən və ülvi bir vətən sevgisi ilə gerçəkliyi dəyişən generalım.
Səni tanıdıqdan sonra bu xalq utandı özü-özundən. Rüşvət alan, var-dövlət yığan, vəzifə, məqam üçün özünü oda-közə vuranlar sənə qibtə etdilər. Bu qədər zəngin olmaq mümkünmü onlara?! Onlar pul-para ilə ala bilərlərmi bu ali məqamı, bu müqəddəsliyi?!
O gün, bu gün artıq milli düşüncəmizdə meyarlar dəyişib. Artıq bizlər üçun var-dövlət yığmaqla xoşbəxt olmaq düşüncəsi boş bir köpük kimi partlayaraq uçub.
İndi hər kəs sənə oxşamağa, sənin kimi olmağa çalışacaq. Bu düşüncə tərzi xalqa təkcə qələbə ruhu üçün deyil, eyni zamanda, həyatda yalnız sərvətin deyil, mənəvi zənginliyin daha önəmli olmasını fərq etməsindədir. Yenə də kimi alim, kimi müəllim, kimi əkinçi olacaq, lakin bundan sonra əminəm ki, insanlıq sənin bu millətə bəxş etdiyin o ülvi meyarlarla ölçüləcək!
Ruhun şad olsun, əziz generalım!
Ceyhun SƏTTAR London, 26 iyul 2020-ci il.
