İşğalçı Ermənistan ordusunun Tovuz rayonu istiqamətindəki son təcavüzkar aktından sonra istər Azərbaycan daxilində, istərsə də xaricdə yaşayan soydaşlarımız təcavüzkara qarşi bir yumruq kimi birləşərək, onların törətdiyi əməlləri ifşa etməyə başladı.
Dünya işğalçı Ermənistanın hərəkətini qınamağa başladığından və oyunlarını başa düşdüyündən çıxılmaz duruma düşdülər. Bu səbəbdən də, yaranmış durumdan çıxmaq üçün ən müxtəlif təxribatlara əl atdılar. Xaricdə yaşayan soydaşlarımızın ermənilərin işğalçı hərəkətlərini ifşa edib dünyaya çatdırmaq məqsədilə keçirdiyi dinc aksiyalara açıq zorakı formada hücumlar edildi, təxribatlara əl atıldı, aksiyaların mahiyyətinin gözdən salınmasına cəhd edildi. Bu zaman ermənilər sapı özümüzdən olan, uzun zaman yemlədikləri xəyanətkar və satqınlardan istifadə etməyə başladılar. Belə xəyanətkarlardan biri də uzun müddət Azərbaycan dövlətinin çörəyini yemiş, sonra da ölkəsinə və xalqına qarşı düşmənlərlə eyni cəbhədə yer alan, Avropada oturub dövlətimizə iftiralar atan keçmiş səfir Arif Məmmədovdur. O, xalqımızın haqq davasına qara yaxaraq, işğalçının cinayətkar əməllərinə haqq qazandırmaq kimi sərsəm fikirlər səsləndirməklə cinayətkarların etdiklərini Azərbaycanın üzərinə atmağa çalışır. Hətta Arif Məmmədov daha da irəli gedib. Azərbaycan gənclərinə və miqrantlara müraciət edərək, Ermənistana və erməni diasporuna qarşı mitinqlərdə iştirak etməməyə çağırıb. Diasporla İş üzrə Dövlət Komitəsini, Azərbaycan xüsusi xidmət orqanlarını və bizim səfirliyi isə düşmən elan edib. Eyni zamanda iddia edib ki, xaricdəki aksiyaları Azərbaycanın xüsusi xidmət orqanları hazırlayıb. Hətta xaricdəki Mədəniyyət mərkəzlərimizi də xüsusi xidmətlərin strukturları kimi təqdim edib. Avropa ölkələrindən birindəki səfirimizin adını çəkərək, onun keçmişinin xüsusi xidmət orqanları ilə bağlılığını qeyd edib. Arif Məmmədovun bu çıxışlarında qırmızı xətlə keçən müxaliflikdir, yoxsa dövlətinin maraqlarını satmaq?
Təhlükəsizlik qurumlarının sabiq əməkdaşı Elşən Həsənov “Bakı-Xəbər”ə açıqlamasında bildirdi ki, Arif Məmmədov əslində öz yolunu davam etdirir:“Bir diplomatın vətənə qayıtmaqdan imtina edərək hansısa xarici ölkəyə satılması elə vətənə xəyanət deməkdir. Bu baxımdan da, Arif Məmmədov çoxdandır ki, Azərbaycan dövlətinə müxalifdir. Hakimiyyətə müxalif kimi özünü göstərmək isə onun üçün bir pərdələnmə vasitəsidir. Arif Məmmədovun son çıxışı əslində onun əsl kimliyini tam açıb ortaya qoydu. Düzdür, peşəkar adamlar onun addımlarının hansı mənanı kəsb etdiyini bilirdi. Ancaq sadə publikaya bunu izah etmək bir qədər çətin idi. Bir daha deyirəm ki, onun müxalif mövqeli adam pərdəsi arxasında gizlənməsi işinə çox yarayırdı. Sonuncu çıxışı ilə isə sübut etdi ki, dövlətini, onun milli maraqlarını çoxdan satıb. Xarici kəşfiyyatı daha çox nə maraqlandırır? Azərbaycanın əlaqədar qurumları, orada işləyən şəxslərlə bağlı məlumatları əldə etmək istəyirlər. Arif Məmmədov bu məlumatları publik şəkildə ictimailəşdirir. Aksiyaları güya bizim xüsusi xidmət orqanlarının təşkil etdiyini deməklə və bir sıra diaspor mərkəzilərimizin adını gizli xidmətlərə calamaqla ermənilərə ən böyük dəstəyini göstərmiş oldu. Bunu əsas götürərək, ermənilər bizim diplomatlarımız, diaspor qurumlarımızla bağlı xüsusi araşdırmaların aparılmasını tələb edəcəklər. Amma burada heç bir nəticə olmayacaq. Çünki Azərbaycan sivil ölkədir. Bilir ki, hansısa ölkənin ərazisində bu tip fəaliyyətlərlə məşğul olmaq qanun pozuntusudur və bu, diplomatik skandala səbəb ola bilər. Bu baxımdan da, Arif Məmmədov həm də yalan danışıb. Yəqin ki, bəzi araşdırmalardan sonra bunun nəticəsi tam bilinəcək. Hesab edirəm ki, Arif Məmmədovun bizim xüsusi xidmət orqanları ilə bağlı dediklərində heç bir həqiqət yoxdur. Xarici ölkələrdə baş verən hadisələri vətənpərvər soydaşlarımızın özləri təşkil edib. Əsas mahiyyət də Ordumuza və Dövlətimizə dəstəkdən ibarət olub. Qaldı ki, Azərbaycanın səfirlərindən hansınınsa əvvəl harda işləməsinə, bunun məsələyə heç bir aidiyyəti yoxdur. Həmin şəxs gizli olmayan, kifayət qədər yüksək post tutubsa, deməli, burada gizli nəsə yoxdur. Hansı ölkəyə hansı kadrı səfir göndərməyi bizim dövlətin özü müəyyən edir və buna kimsə qarışa bilməz. Yetər ki, təmsil olunan ölkədəki fəaliyyət şəffaf olsun. Hələlik Azərbaycanın heç bir ölkədəki səfirliyinin fəaliyyətində Arif Məmmədovun dediyi əlamətlər özünü göstərməyib”.
Doğrudan da, eks-səfirin bu əməlinə satqınlıqdan, xəyanətdən başqa ad vermək olmaz. Arif Məmmədov bu yolu tutduğunu açıq bəyan etməklə, həm də adını çox pis imicdə Azərbaycan tarixinə həkk etmiş oldu.
Məhəmmədəli QƏRİBLİ
