Ermənistan Baş naziri Nikol Paşinyanın yürütdüyü başıpozuq siyasət üzündən düşmən ölkə hər keçən gün addım-addım sosial partlayışa yaxınlaşır. Bunun təsdiqini görmək üçün elə bu bədnam ölkənin gündəlik mətbu nəşrlərinə nəzər salmaq kifayətdir. Artıq görünür ki, Paşinyanın fəaliyyəti (bəlkə də fəaliyyətsizliyi) ilə qəti şəkildə üst-üsrə düşməyən populist çıxışları Ermənistanda qəzəblə qarşılanır.
Belə bir vaxtda Paşinyanın “sinfi düşmənləri” olan “Qarabağ klanının” ciddi şəkildə fəallaşdığı diqqət çəkir. Bu klanın ən fəal üzvlərindən biri isə eks-prezident Serj Sarkisyanın kürəkəni, bu ölkənin Vatikandakı keçmiş səfiri Mikael Minasyandır. Son zamanlar tez-tez yerli mətbuatın gündəminə gələn Minasyan bu dəfə Facebookda etdiyi növbəti paylaşımla diqqətləri üzərinə çəkib. Minasyan yazıb:”Hər şeyin günahkarı Paşinyandır, onun üzərindən bir xətt çəkib, öz işinizi özünüz görün...”
Özünün biznes fəaliyyətindən iqtibas gətirən eks-səfir deyib ki, Paşinyan gəlişi ilə bütün ölkə biznesinə qarşı müharibə elan etdi. Nəticədə ölkədə bütün biznes strukturları çökmə həddinə gəldi. Daha sonra isə Rusiya ilə münasibətlərə diqqət çəkən Minasyan deyib ki, Baş nazir Rusiya rəhbərliyi ilə münasibətləri heç də yaxşı olmayan bir səviyyəyə gətirib. Bildirib ki, əgər biz tariximizdəki ən başıpozuq vəziyyətdəyiksə, Azərbaycan tam əksinə, yüksək səviyyədə təşkilatlanmış durumdadır. ”Biz xahişlər edirik, dünyaya yalvarırıq, çağırış edirik, onlar bizi döyür və biz tost deyirik”- deyə o, ölkəsinin düşdüyü miskin vəziyyəti xarakterizə edib. Rusiya ərazisində azərbaycanlı-erməni qarşıdurmalarını xatırladan eks-səfir deyib ki, bu biabırçı vəziyyət ilk dəfə deyil yaşanır, səbəbi isə odur ki, Ermənistanda heç kəs bu məsələ ilə məşğul olmur. “Halbuki, Rusiyada yaranmış vəziyyətlə Paşinyan məşğul olmalıdır, əriklərdən başlayaraq maliyyə məsələlərinə kimi”- o deyib. Paylaşımının sonunda isə Minasyan açıq mətnlə erməniləri Paşinyanı devirməyə çağırıb. ”Hər şeyin günahkarı Nikoldur, üzərindən bir xətt çəkib, öz işinizi özünün görün”- deyə o, Moskvadakı ermənilərə çağırış edib.
SAMİRƏ
