Bildiyimiz kimi, bəzi müsəlman ölkələri islam həmrəyliyindən çıxış etmir, onlar Azərbaycan torpaqlarını işğal altında saxlayan, məscidlərimizi, dini abidələrimizi dağıdan və tez-tez ərazi bütövlüyümüzə qarşı təxribatlar törədən ermənilərlə “qaşıq dəyişir”, onlarla dostluq və əməkdaşlıq edirlər.
Bu günlərdə Prezident İlham Əliyev çıxışlarından birində bəzi müsəlman ölkələri ilə Ermənistan arasındakı əlaqələri ifşa edib:”...Baxmayaraq, bu ölkələrdə erməni rəsmi orqanları, onların səfirlikləri gecə-gündüz çalışırlar ki, bəzi müsəlman ölkələrini öz tərəfinə çəksinlər. Biz bunu görürük. Bəzən səfərlər edirlər. Bəzən dövlət başçısı səviyyəsində müsəlman ölkələrinə gedirlər. Biz hər şeyi izləyirik, baxırıq, baxmalıyıq. Bəzən bəzi müsəlman ölkələrinin dövlət başçıları Ermənistana rəsmi səfərlər edirlər. Əlbəttə ki, bu bizi haqlı olaraq narahat edir. Bunu açıq şəkildə deyirik, həmrəylik sözdə yox, əməldə olmalıdır”.
Prezident haqlı olaraq vurğulayıb ki, bəzi müsəlman ölkələri ermənilərlə dostluq edir, əlaqələr qurur.
Bəzi müsəlman ölkələrinin ermənilərlə yaxın əlaqələrə malik olduğu dəfələrlə vurğulanıb. Həmin müsəlman ölkələrinin ermənilərə yaltaqlanması, onların mövqeyini müdafiə etməsi heç cür anlaşılan deyil. Rəsmi Əmmanın tutduğu mövqe kimi. Son günlər İordaniyanın islam həmrəyliyinə zidd addımlar atması, ermənilərlə “cici-bacı” olması Prezident İlham Əliyevin haqlı fikirlərini bir daha təsdiqləyir.
Azərbaycan mətbuatında Serbiyadan sonra İordaniyanın da Ermənistanla hərbi texniki əməkdaşlığını artırmasına dair məlumat yayılıb. Buna əsas sübut kimi isə RPG-32 qumbaraatanlarının Əmman tərəfindən İrəvana ixrac edildiyi göstərilib.
İordaniyanın islam həmrəyliyindən kənara çıxaraq işğalçı Ermənistanla bu qədər yaxınlıq etməsi, əlbəttə ki, doğru deyil. Azərbaycanın ərazisini işğalda saxlayan ölkəyə bir müsəlman ölkəsinin hərbi dəstək verməsi bütün beynəlxalq qanunlara zidd olmaqla yanaşı, dini-mənəvi baxımdan da qəbuledilməzdir.
Mətbuatın yazdığına görə, İordaniya ilə Ermənistan arasında hərbi əməkdaşlıq təkcə "RPG-32" ilə kifayətlənmir. “Belə ki, Ermənistan 2020-ci ilin təxminən aprel-may aylarında İordaniyadan OSA-AK zenit raket komplekslərini alıb. Tərəflər arasında müqavilənin imzalanmasında yenə məşhur erməni qaçaqmalçısı David Qalstyan iştirak edib. Müqavilə şəxsən Nikol Paşinyanın razılığı əsasında imzalanıb.
Müqaviləyə əsasən, İordaniya 27 milyon dollar qarşılığında İrəvana 35 OSA-AK sistemləri satıb. Satılan sistemlərin modernizə edilmiş versiya olduğu iddia edilsə də, bu inandırıcı deyil. Çünki İordaniyada bu sistemləri modernizə edəcək texnika və imkan yoxdur. Digər tərəfdən, Ermənistana satılan sistemlər İordaniya silahlanmasından çıxarılmış sistemlərdir, yəni artıq yararsızdır. Belə ki, adıçəkilən silahlar 1981-ci ildə SSRİ tərəfindən Əmmana verilib və İordaniya üçün bu silahların ödənişini İraqın keçmiş prezidenti Səddam Hüseyn həyata keçirib. Məhz Səddam Hüseynin vəsaiti sayəsində İordaniya 60 belə texnika ala bilib”-deyə mətbuat yazıb.
“Bu gün təcavüzkar, təxribatçı Ermənistanla hərbi sahədə də əməkdaşlıq edən İordaniyanın və hər hansı formada bu ölkə ilə dostluq edən, “can bir qəlbdə” olan digər müsəlman dövlətlərinin hərəkətlərini islam birliyinə böyük ləkə hesab edirəm, bu ölkələrə qətiyyən “müsəlman ölkələri” demək olmaz”
Bəzi müsəlman ölkələrinin ermənilərə yarınmasının səbəblərini şərh edən Azərbaycan Milli Elmlər Akademiyası Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev baki-xeber.com-a bildirdi ki, islam mədəniyyəti dünyanın köklü mədəniyyətlərindən biri olsa da, xeyli sayda islam ölkəsi bu mədəniyyəti inkişaf etdirməyə deyil, başqa məsələlərə xidmət edir. “Son zamanlar bəzi müsəlman ölkələrinin ermənilərə yarınması, onlarla əlaqə qurması faktları bir daha Prezident İlham Əliyevin fikirlərinin haqlı olduğunu sübut edir. Mən bir ziyalı, alim kimi, Türkiyə və Pakistan istisna olmaqla, başqa müsəlman dövlətlərinin Azərbaycana lazımı dəstək verdiyini görə bilmirəm. Bu gün dünyada tanınan müsəlman dövlətlərinin bir çoxu islam birliyinə deyil, öz maraqlarına xidmət edir. Təəssüf ki, bu gün bəzi islam dövlətləri Azərbaycan torpaqlarını işğal altında saxlayan Ermənistanla hərtərəfli əlaqələr qurur, isti münasibətlər saxlayırlar. Əslində, bəzi müsəlman ölkələrinin bir-birinə düşmən münasibət göstərməsi, üzdə dost, arxada düşmən olması, bir-birinin düşməni ilə əməkdaşlıq əlaqələri qurması islam dünyasını parçalamağa xidmət edən faktorlardır. Bu gün təcavüzkar, təxribatçı Ermənistanla hərbi sahədə də əməkdaşlıq edən İordaniyanın və hər hansı formada bu ölkə ilə dostluq edən, “can bir qəlbdə” olan digər müsəlman dövlətlərinin hərəkətlərini islam birliyinə böyük ləkə hesab edirəm, bu ölkələrə qətiyyən “müsəlman ölkələri” demək olmaz. Ermənistanla müxtəlif sahələrdə əməkdaşlıq quran, qarşılıqlı rəsmi səfərlər təşkil edən müsəlman dövlətləri islam həmrəyliyinə xəyanət edirlər. Çünki düşmənlə əməkdaşlıq edən, sənin mövqeyini deyil, onun mövqeyini müdafiə edən, düşməni gizli şəkildə silahlandıran bir müsəlman dövlətinin belə addımına heç cür bəraət qazandırmaq olmaz. Biz bu gün bəzi müsəlman ölkələrinə necə arxayın ola, onlara necə etibar edə bilərik? İran, İordaniya və digər müsəlman ölkələri qılıncdan dönmədilər, islamın bayrağını isə həmişə türklər ucalara qaldırıb. İndi də türk dövlətləri həmin əqidədədir, öz dininə sadiqdir. Amma digər bəzi müsəlman dövlətlərinin haqqın deyil, ədalətsizliyin yanında olması onu göstərir ki, bu dövlətlər özlərini müsəlman ölkəsi saysalar da, Azərbaycanı sevmirlər və Azərbaycana qarşı bütün çirkin oyunlarda erməninin yanındadırlar. Bu isə islam birliyinə xəyanətdir”-deyə Q.Hacıyev vurğuladı.
İradə SARIYEVA
