Son günlərdə xarici ölkələrdə yaşayan azərbaycanlılar tərəfindən keçirilən icazəli aksiyalara ermənilərin qanunsuz müdaxilələri, habelə törətdikləri vandalizm, zorakılıq halları nəticəsində 50 nəfərə yaxın soydaşımız xəsarət alıb və şəxsi əmlaklarına ciddi maddi zərər dəyib. Bildiyimiz kimi, azərbaycanlılarla davaya ermənilər başlayıb və onlar soydaşlarımıza qarşı ən müxtəlif formalarda təxribatlar ediblər.
Lakin ermənilər öz ənənələrinə uyğun olaraq xarici ölkələrdə keçirilən mitinqlər zamanı ilk olaraq (?) azərbaycanlıların onlara “hücum etdiyini” iddia edirlər. Ermənistan Xarici İşlər Nazirliyi, həmişə olduğu kimi, bu dəfə də beynəlxalq ictimaiyyətin gözünə kül üfürməyə və yaydığı açıqlama ilə dünyada tamamilə başqa rəy yaratmağa cəhdlər edib. Erməni XİN-i yalandan iddia edib ki, guya xarici ölkələrdə Ermənistan diplomatik nümayəndəliklərinə qarşı hərəkətləri Azərbaycanın dövlət strukturları idarə edir. Guya ki, son vaxtlar azərbaycanlılar erməni icmalarının nümayəndələrinə, Ermənistan vətəndaşlarına qarşı “zorakılıq göstərir”lər. Azərbaycanı irqçilikdə və sair məsələlərdə ittiham etməyə cəhd edən erməni XİN əslində Ermənistanın adını bizə qoymağa, xaricdə baş verənləri dövlətimizin və soydaşlarımızın adına yazmağa cəhdlər edir.
Yeri gəlmişkən, Avropa ölkələrindən birində fəaliyyət göstərən diaspor qurumlarımızın birindən aldığımız məlumata görə, ermənilər 12 iyulda dövlət sərhədində baş vermiş təxribatdan əvvəl dünyanın müxtəlif ölkələrində mitinq keçirmək üçün icazələr almaq məqsədilə həmin ölkələrin rəsmi dairələrinə müraciət ediblər. Bu faktın özü də aydın şəkildə göstərir ki, iyulun 12-də Ermənistanla sərhədin Tovuz rayonu ərazisində düşmən ölkənin törətdiyi təxribat əvvəlcədən hazırlanıb və bu planın hazırlanmasında da xaricdəki erməni diasporu, lobbisi yaxından iştirak edib. Heç şübhəsiz, ermənilərin iyulun 12-dən əvvəl mitinq üçün icazə alması səbəbsiz olmayıb. Yəni ermənilər Tovuzda təxribatlar törədir, bunun ardınca isə əvvəlcədən hazırlanmış plan üzrə xaricdə erməni diasporunun aksiyaları başlayır, onlar bununla Tovuz təxribatlarının guya Azərbaycan tərəfindən törədildiyi barədə rəy yaratmaq məqsədi güdüblər.
Beynəlxalq Diaspor Mərkəzinin sədri İsmayıl Ağayev baki-xeber.com-a bidirdi ki, Ermənistan Xarici İşlər Nazirliyinin iddiasının heç bir əsası yoxdur. İ.Ağayevin sözlərinə görə, ermənilər Tovuzda törətdikləri təxribatları, erməni lobbisinin təşkilatçılığı ilə xarici ölkələrdə soydaşlarımıza qarşı əvvəlcədən planlı şəkildə hazırladıqları vandalizm aktlarını ört-basdır etmək üçün dünyanı aldatmaq istəyir:“Son zamanlar erməni təxribatlarının artıq səngərdən şəhərlərə, küçə davalarına keçməsi bir vətəndaş olaraq məni çox narahat edir. Təbii ki, biz də bu məsələlərin qaynar nöqtəsində dayanmışıq. Bizim təşkilatın strukturları, o cümlədən də Rusiyadakı, Orta Asiyadakı, Türkiyədəki, Avropa ölkələrindəki nümayəndəliklərimiz Azərbaycançılıq məfkurəsi ətrafında birləşib və Azərbaycanın haqq işini müdafiə edənlərlər sırasındadırlar. Bilirik ki, bir neçə gün bundan əvvəl erməni silahlı qüvvələri cəbhənin Tovuz rayonu istiqamətində təxribatlar törədib və ərazi bütövlüyümüzü pozmağa cəhdlər ediblər. Ermənilər bizə qarşı aqressiv münasibətlərini dünyanın hər yerində büruzə verir və törətdikləri təxribatları bizim adımıza yazmağa, bizimlə əlaqələndirməyə cəhdlər edirlər. Bu gün Erməni XİN yalandan iddia edir ki, guya azərbaycanlılar xaricdəki Ermənistan səfirliklərinə, diplomatik korpuslarına “zərər vurub, ermənilərə qarşı zorakılıq edib”, bu tamamilə yalandır. Cəbhədəki erməni təxribatından dərhal sonra erməni lobbisinin üzvləri ABŞ-da, Avropa ölkələrində və sair yerlərdə Azərbaycan xalqına və dövlətinə qarşı öz aqressiyalarını göstərmək məqsədilə kütləvi şəkildə Azərbaycan səfirliklərinin qarşısına gəlib və burada bizim əleyhimizə aksiyalar keçirməyə cəhdlər ediblər. Onlar bizim səfirliklərin qarşısına xoşagəlməz plakatlar da yazıb qoymuşdular. Ermənilər sərhədin Tovuz rayonu istiqamətində olduğu kimi, müxtəlif xarici ölkələrdə də azərbaycanlılara qarşı təxribatlar, zorakılıqlar, vandalizm aktları törədiblər. Erməni lobbisinin, diasporunun təşkilatçılığı və Ermənistan dövlətinin birbaşa idarəçiliyi ilə ermənilərin bizim səfirliklərə, diplomatik nümayəndəliklərimizə qarşı müxtılif təxribatlar törətməyə cəhdlər etməsi soydaşlarımızın narahatlığına səbəb olub və onlar əllərində bayrağımız səfirliklərimizin önünə yığışaraq xalqımızı, dövlətimizi, ordumuzu müdafiə edib və dəstək aksiyaları keçiriblər. Həmin aksiyalarda da ermənilər soydaşlarımıza qarşı məlum hücumları ediblər. Ermənistanın bu gün Azərbaycanı ittiham etməsinin heç bir əsası yoxdur. Ermənistan özünün xaricdəki ermənilərə “Azərbaycana qarşı mitinq keçirin, təxribatlar törədin” göstərişini gizlətmək istəyir”.
İ.Ağayev qeyd etdi ki, ermənilərin iyulun 12-dən əvvəl yaşadıqları ölkələrin aidiyyəti qurumlarından mitinq keçirmək üçün icazə alması ilə bağlı fikirlər həqiqətdir. “Göründüyü kimi, ermənilər bu mitinqlərə xüsusi plan əsasında hazırlaşıblar, biz onların hazırlıqlı olmasını soydaşlarımızın keçirdukləri mitinqlərə qanunsuz müdaxilələr zamanı daha aydın gördük. Yəni xarici ölkələrdəki ermənilərin azərbaycanlılara qarşı törətdiyi vandalizm aktlarının planının əvvəlcədən cızıldığı və onların 12 iyuldan əvvəl mitinq keçirmək icazəsi almaq üçün gizli şəkildə aidiyyəti qurumlara müraciət etdiyi artıq ifşa olunub. Onlar biliblər ki, Tovuzda törətdikləri təxribata bütün Azərbaycan xalqı etiraz edəcək və xalq ayağa qalxıb öz ölkəsini, ordusunu müdafiə edəcək, ona görə də bu aksiyaları öncədən planlayıblar. Bu planlı şəkildə olmasaydı, birdən-birə üzərinə “ASALA” yazılan köynək geyinmiş ermənilər meydana çıxmazdı. Görünür, “ASALA”nı əvvəlcədən hazırlayıblar ki, mitinqlərdə soydaşlarımıza qarşı zorakılıq göstərsinlər”-deyə İ.Ağayev bildirdi.
İradə SARIYEVA
