Toğrul Allahverdi: “Fazil Qurbanovun və digər şəxslərin ora dəvət edilməməsinə gəlincə, nə o, nə də özününü Rusiyada federal təşkilatın rəhbəri elan edən və qeydiyyatdan keçməyən digər təşkilatların rəhbəri indiyə qədər Rusiyanın dövlət strukturlarının nümayəndələri, XİN rəhbəri və rəsmiləri ilə görüş keçirməyib”
Bildiyimiz kimi Moskvada ermənilərlə azərbaycanlılar arasında kütləvi dava baş verib. Məlumata görə, hadisə Lyublinskaya və Nijnie Polya küçələrinin kəsişməsində qeydə alınıb. Ümumilikdə davada 30-a yaxın insan iştirak etdiyi bildirilir.
Analoji hadisə bu sabah Rusiya paytaxtının Pererva və Perervinski bulvarı kəsişməsində də yaşanıb.
Bu arada Rusiyanın Xarici İşlər naziri Sergey Lavrov Rusiyanın azərbaycanlı icmasının nümayəndəsi, “Kiyevskaya ploşşad” MMC-nin Direktorlar Şurasının sədri Qod Nisanovla görüşüb.
Rusiya XİN-in başçısı Azərbaycan icmasının nümayəndəsi Q.Nisanovla söhbətində bundan əvvəl “Rusiya erməniləri ittifaqı” Ümumrusiya İctimai Təşkilatının prezidenti Ara Abramyan ilə də görüşdüyünü qeyd edib.
Görüşlərdə qüvvədə olan qanunvericiliyə müvafiq olaraq Rusiya Federasiyasının ərazisində millətlərarası sülhün və həmrəyliyin dəstəklənməsində Azərbaycan və erməni icmalarının rolu müzakirə edilib.
Lavrov görüşə nə üçün ləğv olunmuş Ümumrusiya Azərbaycan Konqresinin (ÜAK) rəhbəri, Moskva Dövlət Universitetinin professoru Fazil Qurbanov, yaxud yeni təsis olunmuş Rusiya Azərbaycanlıları İttifaqının rəhbəri Frenk Alkoponi ləqəbli Füzuli Məmmədov deyil, Qod Nisanovu dəvət edib?
Doğrudur, Q.Nisanov da Azərbaycanın mövqeyini həmişə müdafiə edən, dövlətimizin təəssübünü çəkən Azərbaycan doğumli bir şəxsdir. Amma görüşə adlarını qeyd etdiyimiz şəxslərin deyil, onun dəvət edilməsi bir sıra suallar doğurur.
“Ola bilsin, Lavrov Qodla şəxsi münasibəti olduğu və onunla daha asan anlaşacağı üçün Azərbaycan icmasının nümayəndəsi kimi onunla görüşüb”
Diaspor məsələləri üzrə ekspert Toğrul Allahverdi bildirdi ki, hazırda Rusiyada bu sahədə aktiv fəaliyyət göstərən heç bir Azərbaycan təşkilatı yoxdur, bu səbəbdən də Lavrov Nisanova üz tutub. “ Əvvəlcə onu qeyd edim ki, bu gün Rusiyada aktiv fəaliyyətdə olan federal səviyyədə heç bir Azərbaycan təşkilatı yoxdur. Çox təəssüflə bildirirəm ki, Ümumrusiya Azərbaycan Konqresi ləğv edildikdən sonra onun yerini doldura biləcək bir təşkilat hələ ki, formalaşmayıb. Bəzi şəxslər tərəfindən fərdi təşkilatlar yaradılıb, onlar arasında soydaşlarımız tərəfindən dəstəklənəni də, dəstəklənməyəni də var. Lakin ÜAK ləğv edildikdən sonra heç bir Azərbaycan təşkilatı qeydə alınmayıb, Rusiyada soydaşlarımız adından çıxış edə biləcək rəsmi diaspor təşkilatımız yoxdur. Bir “Azərros” var, o da məlum səbəblər üzündən bizim həmvətənlərimiz tərəfindən qəbul edilmir. “Azərros”un da Rusiyadakı azərbaycanlılar adından danışması gülüş doğurucu hal olardı. Düşünürəm ki, bu təşkilatın rəhbərliyinin Lavrovla görüşə dəvət edilməməsi bu səbəbdəndi. Fazil Qurbanovun və digər şəxslərin ora dəvət edilməməsinə gəlincə, nə o, nə də özününü Rusiyada federal təşkilatın rəhbəri elan edən və qeydiyyatdan keçməyən digər təşkilatların rəhbəri indiyə qədər Rusiyanın dövlət struktirlarının nümayəndələri, XİN rəhbəri ilə rəsmiləri ilə görüş keçirməyib.
Fazil müəllim Rusiya və Azərbaycan arasında dostluq əlaqələrinin qurulmasında müstəsna xidməti olan bir alim, ziyalıdır. O Rusiyada azərbaycanlılar arasında böyük hörməti var.
Bu gün niyə məhz Qod Nisanovun Lavrova görüşə dəvət edilməsi sualı yaradıb. Xüsusi olaraq vurğulayım ki, Rusiyada Azərbaycan diasporu formalaşandan bu günə kimi istər ləğv olunmuş ÜAK-ın fəaliyyəti dövründə onun inkişafında Qod Nisanovun və digər soydaşlarımızın böyük xidmətləri var. Düşünürəm ki, Rusiyanın XİN rəhbərinin Qod Nisanovla görüşməsi təqdirəlayiq haldır. Çünki Qod Nisanov həmişə orada özünü bir Azərbaycan icmasının aktiv üzvü, diasporumuzun bir fəal siması kimi göstərib, bu cür davranıb. Ona görə də, Qod Nisanovun ora dəvət edilməsinə başqa rəng verilməməlidir. Qeyd etdiyim kimi o da bizim multikultural, çoxmillətli dövlətimizin bir parçasıdır. Çox təəssüf ki, bu günə kimi Rusiyada federal təşkilatın qurulmaması belə hallara gətirib çıxarır. Qodun Lavrovla görüşməsini də təqdir etmək lazımdır”.
T.Allahverdi qeyd etdi ki, Q.Nisanov son hadisələr zamanı Azərbaycan dövlətinin, xalqının yanında olduğunu bir daha subut etdi. “Zənnimcə, bu məsələnin görünən tərəfidir. Görünməyən tərəfi də ondan ibarət ola bilər ki, Qod Nisanov böyük iş adamıdı, Rusiya rəsmiləri ilə böyük əlaəqləri var. Ola bilsin, Lavrov Qodla şəxsi münasibəti olduğu və onunla daha asan anlaşacağı üçün Azərbaycan icmasının nümayəndəsi kimi onunla görüşüb” - deyə müsahibimiz vurğuladı.
İradə SARIYEVA
