“...Biz sudan elə istifadə etməliyik ki, bunun ekoloji tarazlığa mənfi təsiri olmasın. Çünki biz tarixdən bilirik ki, bəzi ölkələrdə böyük su layihələri icra edilirdi. Amma mənbələr və su ehtiyatları düzgün təhlil edilmirdi. Ona görə indi suvarma üçün bunun yaxşı təsiri olubdur, amma ekoloji vəziyyəti gərginləşdiribdir. Ona görə mütləq ekologiya üzrə mütəxəssislər cəlb edilməlidir. Qeyri-hökumət təşkilatlarını cəlb edin. Vətəndaş cəmiyyəti nümayəndələri də bu işlərdə fəal olsunlar. Sizin bəlkə də görə bilmədiyiniz məsələləri onlar diqqətə çatdıracaqlar. Media nümayəndələrini cəlb edin. Hesab edirəm ki, geniş mətbuat konfransı keçirilməlidir. Ümumiyyətlə, bütün dövlət qurumları mətbuatla çox sıx əlaqədə olmalıdır. Görülmüş işlər haqqında müntəzəm olaraq məlumat verməlidirlər”.
Bunu iyulun 23-də Prezident İlham Əliyev su təsərrüfatının vəziyyətinə həsr olunmuş videoformatda müşavirədə deyib.
“Prezidentin son dövrlərdə verdiyi bütün sərəncam, fərman və tövsiyyələrdə media ilə iş məsələsinə ciddi önəm verilir”
Ölkə başçısının bütün dövlət qurumlarının mətbuatla sıx əlaqədə işləməli olduğunu vurğulamasını müsbət qiymətləndirən Jurnalistlərin Həmkarlar ittifaqının sədri, Azərbaycan Mətbuat Şurasının sədr müavini Müşfiq Ələsgərli qeyd etdi ki, Prezident İlham Əliyevin 2018-ci ildən etibarən başlatdığı yeni idarəçilik, modernləşmə və islahatlar kursunun əsasında şəffaflaşdırma amili dayanır. “Şəffaflığın təmin edilməsində isə bir nömrəli təminatçı mediadır. Media araşdırmalı, problemləri aşkarlamalı, auditoriyanı məlumatlandırmalı, maarifləndirməli, həm də ictimai nəzarət funksiyasını həyata keçirməlidir. Cənab Prezident islahatlar dalğasının ilk mərhələsindən elan etdi ki, media sənayesi özü islahata məruz qalmaqla yanaşı, həm də islahatlar dalğasına təkan verməli, burada avanqard rolunu oynamalıdır. Bu baxımdan, istənilən problemin həllində, o cümlədən, su təsərrüfatının vəziyyətinə həsr olunmuş videoformatlı müşavirədə medianın rolunu yenidən qeyd etməsi təsadüfi deyil. O, problemin həlli üçün atılan addımlara media nümayəndələrinin də cəlb edilməsini tövsiyyə edib. Ümumilikdə isə, bütün dövlət qurumlarına media ilə çox sıx əməkdaşlıq şəraitində işləməyi tapşırıb.
Məlumat üçün qeyd edim ki, Prezidentin son dövrlərdə verdiyi bütün sərəncam, fərman və tövsiyyələrdə media ilə iş məsələsinə ciddi önəm verilir”.
M.Ələsgərli vurğuladı ki, Prezident son bir ay müddətində imzaladığı 4 müxtəlif sahəyə aid ayrı-ayrı sərəncamlarda media məsələsinə toxunub, medianın rolunu yüksək qiymətləndirib. “İyunun 30-da Azərbaycan dilinin qorunması yönündə verilən sərəncamda, 2 gün öncə imzalanmış “Azərbaycan Respublikasında insan alverinə qarşı mübarizəyə dair 2020-2024-cü illər üçün Milli Fəaliyyət Planı”nında və digər sərəncamlarda media ilə iş bir nömrəli vəzifə kimi önə çəkilir. Bütün bunlar görüləcək işlərin səmərəliliyinin artırılmasına xidmət etməklə yanaşı, həm də cənab Prezidentin Azərbaycan mediası üzərinə qoyduğu yeni öhdəlikdir, mediaya yüksək etimad göstəməkdir. Göstərdiyi etimada görə Prezidentə təşəkkür edirik və çalışmalıyıq ki, üzərimizə düşən missiyanı layiqincə, peşəkarlıqla yerinə yetirək” - deyə M.Ələsgərli vurğuladı.
Ekspertin fikirlərindən belə qənaətə gəldik ki, ölkəmizin həyatını müsbət mənada dəyişən islahatların bütün sahələrdə daha dolğun şəkildə öz ifadəsini tapması üçün dövlət qurumları media ilə əlaqələrini daha da sıxlaşdırmalıdır.
İradə SARIYEVA
