Ermənistan ordusunun Azərbaycanla sərhəddə iyulun 12-dən başlamış və dörd gün davam edən xain təcavüz əməlinə dəstək verən ölkələrdən biri də Serbiya olub. Artıq tam sübuta yetirilib ki, Serbiyadan Ermənistana iri partiyada müxtəlif çaplı minaatan mərmiləri çatdırılıb. Həmin sursat quru yolu ilə Gürcüstan üzərindən Ermənistana keçirilib.
Ermənistana başqa ölkələr də silah satır, amma bizimlə normal münasibəti olan bir ölkənin arxamızdan belə xain bir iş çevirməsi bizi dərindən təəccübləndirib. Bəlli olduğu kimi, elə bu yaxınlarda Azərbaycan Serbiyaya koronavirus pandemiyası ilə mübarizə üçün humanitar yardım göndərmişdi. Mayın 20-də Azərbaycandan Serbiyaya humanitar yardım aparan təyyarəni Belqrad aerportunda qəbul edərkən bu ölkənin baş naziri Ana Brnabiç yardımı Azərbaycan-Serbiya dostluğunun təzahürü kimi dəyərləndirmişdi. Bundan əlavə, Azərbaycan 2014-cü il daşqınından sonra Serbiyaya ilk yardım etmiş ölkə oldu. Bu da hələ hamısı deyil. Azərbaycan Kosovonun birtərəfli qaydada müstəqilliyini elan etməsini tanımayan ölkələr arasında yer alır və birmənalı şəkildə Serbiyanın ərazi bütövlüyünə öz dəstəyini ifadə edib. Bununla yanaşı bildirilir ki, Serbiyanın Azərbaycanda yaxşı qazanc gətirən biznes şəbəkəsi hələ də mövcuddur. Əldə etdiyimiz məlumata görə, məhz Serbiya investisiyası əsasında paytaxtın Bayıl adlanan ərazisində gəlirli biznes layihələri reallaşdırılır. Bura tikinti va başqa sahələri əhatə edən biznes növləri aiddir. Azərbaycan hökuməti başımıza atılan minomyotları düşmənimizə gizli satan Serbiyanın ölkəmizdə külli miqdarda pul qazanma imkanları ilə bağlı hansısa yeni qərar verməlidir, ya yox?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, ölkəmiz üçün həssas olan dönəmdə hansı ölkənin necə mövqe tutması bizim üçün həm də bir test xarakteri daşıdı:“Bizdə yaxşı bir deyim var ki, dost dar gündə tanınar. Doğrudan da biz dost saydığımız bir çox ölkələrin xəyanətini hiss etdik. Hələ Serbiyanı qoyaq qırağa, Gürcüstanın atdığı addım daha pisdir. Bizi onlarla daha sıx əlaqələr bağlayır. Silah onların ölkəsi vasitəsilə Ermənistana keçirilib. Bu qəbuledilməzdir. Bizimlə sərhədi olmayan Serbiya ilə də yaxşı münasibətlərimiz olub. Separatizmdən əziyyət çəkən ölkə kimi onlara əlimizdən gələn dəstəyi həm iqtisadi, həm də siyasi sahədə vermişik. Serbiya rəsmiləri məsuliyyətdən yaxa qurtarmaq yolunu tutmaq istəyir. Deyirlər ki, bunu hansısa şirkət satıb. Dövlətin məlumatı olmadan belə alverin edilməsi mümkün deyil. Burada söhbət hansısa kənd təsərrüfatı məhsulundan yox, silahdan gedir. Dövlətin xəbəri olmadan belə bir addım necə atıla bilər? Ən maraqlısı budur ki, onlar bunun fonunda hətta özlərini haqlı sayırlar. Bizdən heç bir üzrxahlıq etmək istəmirlər. Silah istehsal edən ölkə başqasına satış edə bilər. Amma burda məsələ belədir ki, həm bizlə dostluq edib, həm də Ermənistana silah satmaq düz gəlmir. Təbiidir ki, Azərbaycan da öz təsir imkanları ilə Serbiyaya yerini tanıtmalıdır. Mən demirəm ki, tam olaraq diplomatik əlaqələrimizi kəsək. Onların Bakıda və ya digər şəhərlərimizdə icra etdiyi layihələrə yenidən baxmaq olar. Hətta bunlar özəl şirkətlərin xəttilə olsa belə, həmin sahibkarlarımızın əməkdaşlıqdan imtina etməsilə Serbiyaya səhvini başa sala bilərik. Necə ki, Rusiyadakı bəzi iş adamlarımız öz nəzarətlərində olan bazarlara ermənilərin malını buraxmır. Analoji addımı bizim iş adamlarımız Serbiya ilə də bağlı ata bilər. Dünyanın müxtəlif ölkələrində fəaliyyət göstərən iş adamlarımız milli təəssubkeşlik nümunəsi olaraq serb sərmayəsinə qarşı boykot addımları ata bilərlər. Bu, əl altdan iş görmək istəyən başqa ölkələr üçün də dərs olar”.
Təbiidir ki, belə məqamda bizimlə az qala düşmənçiliyə bərabər yol tutan bir ölkənin ölkəmizdə həm də pul qazanması yolverilməzdir. Bununla bağlı uyğun qərar verilsə, yaxşı olar.
Məhəmmədəli QƏRİBLİ
