“KTMT-ya 6 ölkə üzvdür. Onlardan üçü beynəlxalq təşkilatlar yolu ilə Azərbaycana dəstək göstərdi”. Bu fikirləri Prezident İlham Əliyev Bakının Xətai rayonunda şəhid ailələrinə, müharibə əlillərinə mənzillərin və avtomobillərin təqdim olunması mərasimində çıxışı zamanı səsləndirib.
Ölkə başçısının sözlərinə görə, KTMT-nin altı üzvündən üçü Azərbaycanı birmənalı şəkildə dəstəklədi:“Biz Ermənistana başından güclü zərbə vurandan sonra onlar dərhal Kollektiv Təhlükəsizlik Müqaviləsi Təşkilatına (KTMT) qaçdılar ki, bunları müdafiə eləsin. Tələb edirdilər ki, KTMT Azərbaycanı qınayan bəyanat versin. Buna nail ola bilmədilər, heç bir bəyanat verilmədi. Sadəcə olaraq, bu hadisə ilə bağlı ümumi sözlərdən ibarət bir şərh verildi, vəssalam. Ancaq bildirməliyəm ki, KTMT-ya 6 ölkə üzvdür. Onlardan üçü beynəlxalq təşkilatlar yolu ilə Azərbaycana dəstək göstərdi. Türkdilli Dövlətlərin Əməkdaşlıq Şurasında, eyni zamanda, KTMT-da üzv olan Qazaxıstan və Qırğızıstan Türkdilli Dövlətlərin Əməkdaşlıq Şurası vasitəsilə bizə dəstək oldular. Belarus Qoşulmama Hərəkatında təmsil olunur. O da Qoşulmama Hərəkatının bəyanatına qoşularaq bizə dəstək oldu. Yəni altı ölkədən üçü Azərbaycanı birmənalı şəkildə dəstəklədi və başqa cür ola bilməzdi. Çünki biz onlarla dostuq, yaxşı günlərdə, çətin günlərdə onlar bizə etibar edə bilərlər”.
Əslində KTMT-də əsas arbitr ölkə olan Rusiyanın da Ermənistanla məsafə saxladığı bəllidir. Bu, son proseslər gedişində açıq-aşkar özünü göstərdi. Bununla belə, Tacikistan da analoji mövqedən çıxış edir. Bu isə o deməkdir ki, Ermənistanı KTMT-də təkləmişik. Maraqlıdır, Azərbaycan buna buna necə nail olub?
“Azərbaycanın uğurlu siyasəti və KTMT-nin üzv dövlətləri ilə sıx əməkdaşlığı buna zəmin yaratdı”
Sözügedən məsələyə aydınlıq gətirən politoloq Məhəmməd Əsədullazadə bununla bağlı “Bakı-Xəbər”ə verdiyi açıqlamasında bir sıra məqamlara toxundu: “Azərbaycanın Müstəqil Dövlətlər Birliyi ölkələri ilə sıx əməkdaşlığı, həmçinin beynəlxalq təşkilatlarda bir çox ölkələrlə sıx təması Ermənistanın Tovuz istiqamətində təxribatlarında bizə dəstək verilməsi ilə nəticələndi. Nəzərə almaq lazımdır ki, KTMT-də təmsil olunan dövlətlər həm də MDB-nin üzvüdür. Digər tərəfdən, KTMT-nun üzvü olan üç dövlət və Qoşulmama Hərəkatının üzvü olan ölkələr Azərbaycanı birbaşa dəstəklədilər. Bu onu göstərir ki, aparılan siyasət məntiqi nəticəsini verir. Xüsusilə KTMT-nin bu prosesdə kənarda qalması, Ermənistana dəstək verməməsi Bakının diplomatik qələbəsidir. Ermənistan üzv olduğu təşkilatdan dəstək almadı. Azərbaycanın uğurlu siyasəti və KTMT-nin üzv dövlətləri ilə sıx əməkdaşlığı buna zəmin yaratdı. Ermənistana, demək olar ki, heç bir dövlət dəstək vermədi. Azərbaycan bundan sonra öz siyasətini daha da gücləndirib, Ermənistana zərbələri bütün cəbhələrdə vuracaq. İnformasiya, diplomatiya , siyasi və hərbi müstəvidə qarşı tərəfə zərbələr vuracaq. Çünki Ermənistanın bir balaca nəyəsə nail olması onların aqressiv siyasət aparmasına gətirib çıxarır. Hesab edirəm ki, Azərbaycan artıq Ermənistanın qabağını kəsir”.
Ekspertin fikrincə, bütün bunlara Azərbaycan apardığı uğurlu siyasət hesabına nail olub.
Vidadi ORDAHALLI
