“...Müsəlman məscidlərini dağıdan Ermənistanla hansı əlaqələr ola bilər? Açın baxın internetdə, görün Ağdam məscidi nə gündədir, Şuşa məscidi nə gündədir, digər şəhərlərdəki məscidlər nə gündədir, onları söküblər. Bu azmış kimi, ermənilər orada heyvan saxlayırlar, hətta bizim müqəddəs ocaqlarımızı təhqir edirlər. Kim edir bunu? Ermənistan. Bu məscidlər təkcə bizim deyil, bütün müsəlman aləminə məxsusdur. Mən sual verirəm, necə ola bilər ki, belə çirkin əməllər törədən bir ölkə ilə hansısa əlaqələr olsun, hansısa dostluq haqqında danışsınlar? Hansı dostluq ola bilər? Ona görə, mən bir daha demək istəyirəm, Ermənistan çalışır ki, onları öz tərəfinə çəksin...”
Bu fikirləri iyulun 21-də Bakının Xətai rayonunda şəhid ailələrinə, müharibə əlillərinə mənzillərin və avtomobillərin təqdim olunması mərasimində Prezident İlham Əliyev bildirib.
“Ağdamda, Şuşada, eləcə də digər yerlərdəki məscidlərimizin ermənilər tərəfindən dağıdılmasına, quruluşunun dəyişdirilməsinə, müxtəlif şəkillərdə təhqir edilməsinə müsəlman dövlələri nəhayət ki, öz rəsmi etirazını bildirməlidir”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bildirdi ki, Prezident İlham Əliyev olduqca aktual bir məsələni gündəmə gətirib:”Cənab Prezident illərdir Azərbaycan torpaqlarını işğalda saxlayan Ermənistanın qədim şəhər və kəndlərimizdə məscidlərimizə, dini ocaqlarmıza qarşı törətdiyi bağışlanmaz cinayətləri gündəmə gətirməklə bir daha ermənilərin mahiyyətini çılpaqlığı ilə açıb göstərdi. Ermənilər Qafqaza ayaq qoyandan indiyə qədər Qafqazın, xüsusən də Azərbaycanın tarixini saxtalaşdırmaqla məşğul olublar. Bir dənə yazılı mənbə qalmayıb ki, ora erməni saxtakarlığı toxunmasın. Ermənilərin Şuşa, Ağdam və digər işğal etdikləri ərazilərimizdə olan tarixi abidələrə, xüsusən də məscid və dini ocaqlara qarşı zaman-zaman vandalizm hərəkətləri törədib. İslam dünyası üçün xüsusi dəyərə malik olan Yuxarı və Aşağı Gövhərağa məscidlərinin, Ağdam Cümə məscidinin və başqa dini ibadət ocaqlarının ermənilər tərəfindən dağıdılması, bəzilərinin isə quruluşunun dəyişdirilməsi bir faktdır. Bilirsiz ki, onlar Yuxarı Gövhərağa məscidini “fars” məscidi kimi tanıtmağa cəhdlər edirlər. Mən bir tarixçi, arxeoloq kimi yaxşı bilirəm ki, ermənilər Şuşada, Ağdamda və digər ərazilərimizdə türk və müsəlman dünyasına məxsus olan abidələrin, dini ocaqların, məscidlərin çoxunu söküb dağıdıblar. Hətta onların bizim məsidlərə qarşı dünyada analoqu olmayan tərbiyəsizliklər edib, dini ocaqlarımıza donuz bağlamaqla onları təhqir ediblər. Deyim ki, Qarabağdakı müsəlman məscidlərinə, dini ocaqlarına qarşı bu cür vandalizm hərəkətləri törətməsi məsələsi yeni deyil, illərdir davam edən bir cinayətdir. Hesab edirəm ki, islam dünyası bu məsələyə laqeyd yanaşmamalı və Ermənistana kəsin etirazını bildirməli, ondan vandalizm hərəkətlərini dayandırmağı tələb etməlidir. Qədim şəhərlərimiz olan Ağdamda, Şuşada, eləcə də digər yerlərdəki məscidlərimizin ermənilər tərəfindən dağıdılmasına, quruluşunun dəyişdirilməsinə, müxtəlif şəkillərdə təhqir edilməsinə müsəlman dövlələri nəhayət ki, öz rəsmi etirazını bildirməlidir. Ermənilərin bu bağışlanmaz cinayətləri yalnız Azərbaycana deyil, bütövlükdə islam dünyasına qarşıdır”.
Q.Hacıyev vurğuladı ki, ermənilər hələ Sovet dövründən Azərbaycan məscidlərinə, eləcə də I,II, III və digər əsrlərə aid olan qədim dini abidələrimizə qarşı terror törədiblər. Q.Hacıyevin sözlərinə görə, erməni işğalına qədər Şuşadakı, Ağdamdakı məscidlər öz abadlığı, insanların kütləvi ziyarət yeri kimi diqqəti cəlb edir. Bəlli tarixlərə malik olan bu məscidlərin islam dinin yayılmasında, inancımızın formalaşmasında, mənəvi dünyamızın zənginləşməsində böyük rol oynamış olduğunu qeyd edən Q.Hacıyevin sözlərinə görə, indi o məscidlərin, ibadət yerlərinin az qala quru divarları qalıb. “İslam dünyasının dəyərli memarlıq incilərindən olan və böyük tarixə malik məscidlərimiz erməni vandalizminin qurbanı olub. İrəvanda onlarla məscidi yer üzündən siliblər və orada cəmi bir məscid saxlayıblar, onun da adını “fars” məscidi qoyublar. Görüb, nə qədər böyük cinayətlər törədiblər. Ermənilərə kim icazə verib ki, onlar Azərbaycan xalqına, islam dünyasına məxsus olan məscidləri darmadağın etsinlər. Bu məsələ belə qala bilməz, hesab edirəm ki, islam dünyası Ermənistana son sözünü deməlidir”-deyə Q.Hacıyev bildirdi.
İradə SARIYEVA
