Bildiyimiz kimi Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu (KİVDF) Azərbaycan Milli Mətbuatının 145 illiyinə həsr olunmuş fərdi jurnalist yazıları müsabiqəsi elan edib. Yazıların qəbulu iyunun 23-dən 6 iyul tarixinə qədər davam edib. Məlumatımıza görə hazırda müsabiqəyə təqdim edilən yazıların oxunma, qiymətləndirmə prosesi gedir və yaxın vaxtda müsabiqənin nəticələri açıqlanacaq, I, II, III yerin qaliblərinin adları məlum olacaq.
Qəzet redaksiyalarına maliyə yardımın göstərilməsinə dair elan edilən müsabiqənin şərtlərində olduğu kimi fərdi jurnalist yazıları müsabiqəsinin şərtlərində də müəyyən dəyişikliklər, yeniliklər var.
Qeyd etdiyimiz kimi KİVDF tərəfindən elan edilən yeni müsabiqənin şərtləri və təqdim edilən mövzular xeyli fəqrlidir. Belə ki, ənənəvi mövzularla yanaşı iddiaçılara yeni mövzular da təqdim edilib. Əlbəttə, burada “Fikir, söz və məlumat azadlığının, plüralizmin inkişaf etdirilməsi: Azərbaycan mətbuatı – 145, mətbuat tarixi, jurnalistikanın inkişaf perspektivləri”, “Ermənistanın Azərbaycana qarşı informasiya müharibəsində tarixi faktların saxtalaşdırılması cəhdləri və həqiqətlər”, “Elmi-kütləvi, mədəni-maarif, təhsil sahəsində yeniliklərin təşviqi”, “ Dövlətin koronavirus pandemiyasına qarşı mübarizə tədbirləri və bu tədbirlərin beynəlxalq təcrübə ilə müqayisəsi, post-pandemiya dövründə dövlət siyasəti” kimi yeni, lakin dövlətçiliyimiz, milli maraqlarımız baxımından olduca əhəmiyyətli olduğunu qeyd etməliyik.
Müsabiqənin şərtlərinə edilən dəyişikliklərdən biri də sənədləşmə prosesi ilə bağlıdır. Əvvəlki qaydalardan fərqli olaraq, sənədlər və yazılar müsabiqəyə elektron qaydada, skayn olunmuş formada təqdim edildi. Bu dəfə iddiaçılar KİVDF-nin elektron poçtuna müraciət formasının skan edilmiş surətini, şəxsiyyət vəsiqəsinin skan edilmiş surətini, ştatlı müxbirlər tərəfindən etibarlı olan xidməti vəsiqənin, ştatdankənar müxbirlər tərəfindən isə iş yerindən arayışın skan edilmiş surətini, təqdim etdiyi mövzunun skan edilmiş (bir variantda müəllifin adı, soyadı, işlədiyi KİV-in adı, yazının təqdim edildiyi tarix, digərində isə yalnız ayın tarixi qeyd edildi) və doc variantlarını göndərdilər. Ümumilikdə, iddiaçılar müsabiyə 3 sənəd və yazının özünü (iki variantda) təqdim etdilər. Şərtlərdəki yeni dəyişikliyə görə müsabiqəyə təqdim edilən yazı müsabiqənin nəticəsi elan olunanadək heç bir yerdə dərc edilməməli, yayımlanmamalı və paylaşılmamalıdır. Bu hal özü istisna edilməyən plagiatlıq və təsirlənmə halının aradan qaldırılmasına yardımçı oldu. Bununla da hər bir jurnalist təqdim etdiyi mövzuda öz potensialını, yaradıcılıq bacarığını, mövzuya fərdi yanaşmasını sərgiləyə bildi.
Müsabiqənin şərtlərinə edilən dəyişikliklərin diqqət çəkən özəlliklərindən biri də odur ki, ştatdankənar fəaliyyət göstərən jurnalist həmkarlarımızın da burada iştirakına şərait yaradılıb.
Fərdi jurnalist yazı müsabiqəsinin şərtlərində edilən yeniliklər və dəyişikliklər iddiaçıların işlədikləri mövzulara daha həssaslıqla, daha peşəkarlıqla yanaşmasına, onu daha dərindən araşdırıb təhlil etməsinə geniş şərait yaratdı.
“...Mən prosesin bundan sonrakı dinamikasının daha da sürətli olacağı qənaətindəyəm”
KIVDF-nin fərdi jurnalist yazı müsabiqəsinin şərtlərində etdiyi dəyişikliklərə və yeniliklərə münasubət bildirən “Xalq cəbhəsi” qəzetinin baş redaktoru, politoloq Elçin Mirzəbəyli bildirdi ki, Fondun bu istiqamətdəki yeniliklərinə müsbət yanaşır. “Mənim KİVDF tərəfindən həm qəzet redaksiyalarına maliyə yardımın göstərilməsinə dair elan etdiyi müsabiqənin, həm də fərdi jurnalist yazı müsabəsinin şərtlərinə etdiyi dəyişikliklərə müsbətətim müsbətdir. Bu müsabiqələrdə yer alan şərtlər uzun müddətli fikir mübadiləsi nəticəsində ortaya çıxan önəmli amillərdir. Prinsip etibarı ilə bu həm qəzetlərin işinin yüngülləşdirilməsinə, həm də jurnalistlərin fəaliyyətinin stimullaşdırılmasına xidmət edir. Önəmli olan faktorlardan biri bürokratik əngəllərin aradan qaldırılmasıdır. Mən çox mühüm məqam kimi burada müsabiqəyə təqdim edilən yazıların kütləvi informasiya vasitələrində yayımlanmadan bilavasitə fondunun özünə, onların ekspertlərinə təqdim edilməsi ilə bağlıdır. Bu əslində, müsabiqənin özünün mahiyyətinə və adına uyğun gələn bir yanaşmadır. Çünki burada söhbət fərdi jurnalist müsabiqəsindən gedir. Təəssüflər olsun ki, bəzən ayrı-ayrı KİV-lər haqqında arzuolunmayan iddialar səslənirdi. Guya müsabiqəyə təqdim olunan
yazılardan əldə edilən mükafatlardan hansısa umacaqlar olub. Bu iddialar uzun müddət idi ki, mətbuat camesində dolaşırdı. Təbii ki, şəffaf fəaliyyətlərinə, özlərinin vicdanlı davranışlarına arxayın olan insanlar heç zaman narahat olmurdu. Amma bu medianın adına müəyyən qədər də olsun xələl gətirən amillər olub. Amma KİVDF elan etdiyi son müsabiqənin şərtlərinə etdiyi dəyişikliklərlə belə məqamlara yol verilməsini aradan qaldırır... Qaydalar müəyyənləşərkən elə etmək lazımdır ki, orada kənar müdaxilələr üçün boşluqlar yaranmasın, önləyici tədbirlərə yol açsın. Mən son elan edilən hər iki müsabiqənin şərtlərində bu önləyici tədbirlərin yer aldığını görürəm. Digər tərəfdən, bürokratik əngəllər faktiki olaraq aradan qaldırılıb, sənədlərin sayı kifayət qədər azaldılıb, tələblər həm jurnalistlərin, həm də redaksiyaların qısa müddət ərzində əldə edə biləcəyi çərçivədə qurulub. Hətta günün də reallıqları burada əksini tapıb. Düşünürəm ki, zaman keçdikcə bu proses daha da təkmilləşdiriləcək. Çünki media sektorunda olan problemlərin tədricən aradan qalıdırılması üçün müəyyən zaman lazımdır. Bu da qarşılıqılı faəliyyət nəticəsində həyata keçirilə bilir. Qənaətimə görə, indiki şəraitdə KİVDF-nin istər rəhbərliyi, istərsə də, əməkdaşları istənilən müzakirəyə, dialoqa hazır olan insanlardır, onlarla hər hansı bir məsələ ətrafında dialoq qurmaq, fikir mübadiləsi aparmaq və nəticəyə gəlmək çox rahatdır, obyektiv fikirin tərəfində dayandıqlarını dərhal biruzə verirlər. Bu aspektən də, mən prosesin bundan sonrakı dinamikasının daha da sürətli olacağı qənaətindəyəm. Bizim də arzumuz ondan ibarətdir ki, Azərbaycan mətbuatı, çap mediası inkişaf etsin, ənəvi mövqeləri möhkəmləndirilsin, reklam bazarı ilə bağlı problemlər həll olunsun”-deyə E.Mirzəbəyli vurğuladı.
İradə SARIYEVA
