Aprelin 14-də Prezident İlham Əliyevin sədrliyi ilə 2020-ci ilin birinci rübünün sosial-iqtisadi yekunlarına həsr olunan, videokonfrans şəklində keçirilən müşavirədə ölkə başçısı aparılan və gələcəkdə davamı nəzərdə tutulan islahatlardan bəhs edib. Prezident çıxışında müxalifətlə daha sıx əməkdaşlığın nəzərdə tutulduğunun anonsunu verib. Ölkə başçısı ölkənin idarə olunmasında yeni konfiqurasiyaya artıq yol açıldığını bildirib:“İslahatların məntiqi davamı parlament seçkiləri idi və bu ilin fevral ayında keçirildi. Parlament seçkiləri bir daha xalqımızın iradəsini ifadə etdi, bir daha göstərdi ki, apardığımız siyasət Azərbaycan vətəndaşları tərəfindən bəyənilir, dəstəklənir və parlament seçkiləri demokratik inkişaf istiqamətində atılmış növbəti addımdır”.
Prezident İlham Əliyev qeyd edib ki, seçkilərdən sonra parlamentin tərkibi böyük dərəcədə, rəhbər orqanları isə tam dəyişdirilib:“Tarixdə ilk dəfə olaraq, müxalifət nümayəndəsi Milli Məclisin sədrinin müavini vəzifəsinə seçildi. Hesab edirəm ki, bu, siyasi sistemin təkmilləşdirilməsi və siyasi münasibətlərin sağlam zəmində qurulması istiqamətində atılmış önəmli addımdır. Eyni zamanda, tarixdə ilk dəfə olaraq, parlament komitələrinə müxalifət nümayəndələri başçılıq edirlər, həm sədr, həm müavin vəzifələrində. Hesab edirəm ki, bu da çox önəmli addımdır və ilk növbədə, siyasi sistemin yeni konfiqurasiyasına yol açan bir addımdır, eyni zamanda, Milli Məclisdə gedən proseslərə müsbət təsir göstərəcək. İndiki şəraitdə biz açıq-aydın görürük ki, siyasi qüvvələrin mütləq əksəriyyəti dövlətçilik prinsiplərini hər şeydən üstün tutur və bu da əslində, bizim əsas məqsədimizdir. Çünki əsas məqsədimiz elə siyasi sistem yaratmaqdır ki, fərqli baxışlardan asılı olmayaraq, hər bir siyasi qüvvə üçün bir amal müqəddəs olsun, o da dövlətçilik, müstəqillik, azadlıq, rifah və inkişafdır. Belə olan halda həm siyasi müstəvidə işlər müsbət istiqamətdə gedəcək, eyni zamanda, ölkədə mövcud olan problemlər daha tezliklə həll olunacaq. Çünki müxalifət nümayəndələri bəzən iqtidar nümayəndələrinin görmədiyi qüsurları görürlər, onları dilə gətirirlər, onları diqqətə çatdırırlar və bu çox müsbət haldır. Ancaq eyni zamanda, bir daha demək istəyirəm ki, bütün siyasi qüvvələr üçün bir amal, bir məsələ toxunulmaz olmalıdır, bu da bizim müstəqilliyimiz, dövlətçiliyimiz və dövlət maraqlarıdır. Hesab edirəm ki, hakimiyyət tərəfindən atılan addımlar, siyasi dialoqun başlanması və müxalifət partiyaları tərəfindən buna müsbət reaksiya verilməsi müstəqillik dövründə tam yeni vəziyyətin yaradılmasına gətirib çıxarır. Müstəqillik dövründə bu sahədə heç vaxt belə müsbət mənzərə müşahidə edilmirdi. Əlbəttə, bəlkə mən hadisələri bir qədər qabaqlayıram. Çünki bu proses hələ təzə-təzə başlayır. Ancaq bəlkə ona görə qabaqlayıram ki, mən bu prosesin sürətlə getməsini arzulayıram. Şadam ki, bizim dialoq təklifinə müxalifət partiyalarının hamısı müsbət cavab verib və artıq siyasi dialoq başlayır. Əminəm ki, bu, ölkəmizə böyük fayda gətirəcəkdir". Prezidentin çıxışından belə qənaətə gəlmək olarmı ki, idarəçilik proseslərinə müxalifət daha sıx cəlb olunacaq və müxalif kadrlardan geniş istifadə ediləcək?
Bünyamin Qəmbərli:“Bu gün müxalifətin dövlət idarəçiliyində kənarda qalmasından istifadə edən müəyyən qüvvələr müxtəlif formalarda qütbləşmələr yaratmağa can atırlar”
Parlament müxalifəti kimi təmsilçiliyi olan BAXCP-nin sədr müavini Bünyamin Qəmbərli “Bakı-Xəbər”ə açıqlamasında bildirdi ki, Azərbaycanda siyasi münasibətlərin yeni formaya transformasiya olunması ölkəmizin inkişafına ciddi təsir edəcək:“Prezident dəfələrlə çıxışlarında vurğulayıb ki, neqativ hallara son qoyulmalıdır. Bütün bunlara baxmayaraq, müəyyən sahələrdəki neqativliklər aradan qalxmayıb. Çünki hökumətin üzərində müxalifətin ictimai nəzarəti zəif olub. Sonradan Prezident çıxışlarında dedi ki, bəzi həqiqətləri məqsədli şəkildə ondan gizlədiblər. İlham Əliyevi özü də dedi ki, məmurlar üzərində ictimai və vətəndaş nəzarəti güclü olmalıdır. Bunun da əsas təminatçısı siyasi institutlar, QHT-lər və media ola bilər. Yeni siyasi konfiqurasiyanın yaradılması bu istiqamətdə irəliləyiş yarada bilər. Bizim üçün əsas maraq dövlət maraqları olmalıdır. Bugünkü müxalifətin böyük bir qisminin müstəqilliyimizin qazanılmasında böyük rolu olub. Həmin adamlar, təbii ki, dövləti canlarından da artıq sevirlər. Belə qüvvələrin əsas amalı milli maraqlar olmalıdır. Hakimiyyət və müxalifət vahid orqanizmdi. Dovlətin idarəçiliyində mütləq müxalifətin rolu olmalıdır. Belə əlaqələrin itməsi ümumən dövlətin zəifliyinə gətirir. Bu baxımdan da, ölkə başçısının təklif etdiyi əməkdaşlıq modelini alqışlamalıyıq. Prezident doğru olaraq qeyd edir ki, müxalifətin haqlı tənqidləri ümumi inkişafa səbəb ola bilər. Müxalifət nümayəndələrinin qanunverici orqanda vəzifəyə gətirilməsində ölkə başçısı maraqlı bir detalı vurğulayır və deyir ki, bu prosesin bir qədər də sürətli getməsini istəyir. Bu gün müxalifətin dövlət idarəçiliyində kənarda qalmasından istifadə edən müəyyən qüvvələr müxtəlif formalarda qütbləşmələr yaratmağa can atırlar. Siyasi qüvvələrin əksəriyyəti dövlətçilik prinsipini üstün tutur. Bunu ölkə başçısı da deyib. Belə proses xarici təzyiqlərin qarşısının alınmasına da müsbət mənada təsir edər. Müxalifətin belə təzyiqlərə cavabı hakimiyyəti qorumaq kimi qələmə verilə bilməz. Bunun adı dövlətçiliyin mühafizəsi olar. Mən öz partiyamızın adından deyə bilərəm ki, biz bələdiyyə seçkilərində yerlər qazanırıq. Təmsil olunduğumuz bələdiyyələrin daha yaxşı işləməsinə çalışmışıq. Partiyanın parlamentdəki fəaliyyəti də göz qabağındadır. Prezidentin bu inamı özünü doğrulda bilər”.
Məhəmmədəli QƏRİBLİ
