Pərviz Heydərov: “Qeyri-neft sektoru üzrə istehsal olunan məhsulların xarici bazara çıxmağını qarşımıza məqsəd qoyuruqsa…”
Prezident İlham Əliyev qeyri-neft sektorunda rəqabətqabiliyyətli daxili istehsalın dəstəklənməsi ilə bağlı əlavə tədbirlər haqqında sərəncam imzalayıb.
Azərbaycanda qeyri-neft sektorunun sürətli və rəqabətədavamlı inkişafının təmin olunması istiqamətində həyata keçirilən iqtisadi islahatlar nəticəsində bu sektorun potensial imkanları genişlənib, yeni istehsal sahələri yaradılıb, idxalı əvəz edən məhsulların yerli istehsalı hesabına qeyri-neft məhsulları ilə təminolunma səviyyəsi yüksəlib, ixrac qabiliyyəti artıb.
Qeyri-neft sektorunun inkişafını daha da sürətləndirmək üçün bu sahəyə birbaşa xarici investisiyalar cəlb etməklə daxili istehsalın rəqabət qabiliyyətinin gücləndirilməsi, idxalın əvəzlənməsi fəaliyyətinin dəstəklənməsi və yerli məhsullarla özünü təminetmə səviyyəsinin daha da yüksəldilməsi, qeyri-neft sektorunun ixrac imkanlarının artırılması Azərbaycan Prezidentinin 2016-cı il 6 dekabr tarixli, 1138 nömrəli fərmanı ilə təsdiq edilmiş milli iqtisadiyyat və iqtisadiyyatın əsas sektorları üzrə strateji yol xəritələrində strateji məqsədlər olaraq müəyyən edilib.
Ölkədə rəqabətqabiliyyətli qeyri-neft məhsulları istehsalının stimullaşdırılmasına, onun xammal bazasının yaxşılaşdırılmasına, idxalı əvəz edən yeni istehsal sahələrinin yaradılmasına və ixrac imkanlarının genişləndirilməsinə dövlət dəstəyinin artırılması, habelə Azərbaycan Prezidentinin 2016-cı il 6 dekabr tarixli, 1138 nömrəli Fərmanı ilə təsdiq edilmiş milli iqtisadiyyat və iqtisadiyyatın əsas sektorları üzrə strateji yol xəritələrindən irəli gələn tədbirlərin icrasının təmin edilməsi məqsədilə Nazirlər Kabinetinə aşağıdakılar barədə təkliflərini və normativ-hüquqi akt layihələrini üç ay müddətində hazırlayıb Azərbaycan Prezidentinə təqdim etmək tapşırılıb:
- ölkədə istehsal edilməyən yeni rəqabətqabiliyyətli məhsullar istehsalının təşkili üçün “Azərbaycanda ilk” (“First in Azerbaijan”) investisiya təşviqi mexanizmi;
- mikro, kiçik və orta sahibkarlıq subyektlərinin rəqabətqabiliyyətli istehsalının dəstəklənməsi məqsədilə daxili bazar araşdırmalarına dövlət dəstəyi mexanizmi;
- mikro, kiçik və orta sahibkarlıq subyektlərinin istehsal fəaliyyətinin dəstəklənməsi üçün onların kadr potensialının artırılmasına dövlət dəstəyi mexanizmi;
- ölkədə istehsal olunmayan və daxili istehsalda istifadə edilən xammalın idxalına gömrük güzəştlərinin tətbiqi;
- mikro və kiçik sahibkarlıq subyektlərinin istehsal etdikləri məhsulların ticarət şəbəkələrində satışının genişləndirilməsi;
- “Mikro, kiçik və orta sahibkarlıq subyektlərinin klasterləri haqqında Nümunəvi Əsasnamə”;
- ölkə iqtisadiyyatına birbaşa investisiyalar cəlb edilməsinin dəstəklənməsi məqsədilə “Azərbaycana sərmayə” (“Invest in Azerbaijan”) mexanizmlərinin tənzimlənməsi Qaydası”.
Qeyri-neft sektorunun inkişafı istiqamətində imzalanan sərəncamın əhəmiyyəti barədə danışan İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, iqtisadiyyatın inkişafında qeyri-neft sektoru prioritet sahə olaraq seçilib. Bu bir neçə il öncədən də belə bəyan olunub: “Qeyri-neft sektoru elə bir sahədir ki, qısa müddət ərzində müsbət irəliləyişlərə və iqtisadiyyatda makroiqtisadi sabitliyi təmin edəcək bir səviyyəyə nail olmaq mümkün deyil. Çünki bunun üçün müəyyən vaxt tələb olunur. İnvestisiyalar cəlb olunmalı, kiçik və orta sahibkarlıq fəaliyyətinə geniş imkanlar açılmalıdır. Eyni zamanda, daxili bazar xarici məhsulların idxal təzyiqindən azad olunmalıdır. Qeyri-neft sektoru üzrə istehsal olunan məhsulların xarici bazara çıxmağını qarşımıza məqsəd qoyuruqsa, o zaman bu sahədə rəqabət qabiliyyətli məhsullar istehsalına nail olmalıyıq. Bu məsələ həllini tapmalıdır. Prezident İlham Əliyev istər hökumətin iclaslarında, istərsə də açılışlarda etdiyi çıxışlarda bildirib ki, qeyri-neft sektorunda tək xarici bazar üçün deyil, eyni zamanda daxili bazarın yerli məhsullarla təmin olunması üçün rəqabətqabiliyyətli məhsullar istehsal olunmalıdır. Prezidentin bir neçə gün öncə imzaladığı sərəncamın əsas mahiyyəti rəqabətqabiliyyətli məhsulların istehsal olunmasıdır”.
Həmsöhbətimizin sözlərinə görə, qeyri-neft sektorunda rəqabətqabiliyyətli məhsulların dəstəklənməsinə dair indiyədək hər hansı bir sənəd imzalanmamışdı. Prezident İ.Əliyev tərəfindən belə bir sərəncamın imzalanması iqtisadiyyatın inkişafına səbəb olacaq: “Qeyd olunan sərəncamın imzalanması ilə hökumətin qarşısında çox ciddi tapşırıqlar qoyulub. Aidiyyəti qurumlara qeyri-neft sektorunda rəqabətqabiliyyətli məhsulların istehsalı üçün müvafiq göstərişlər verilib. O göstərişlərə əsasən, sərəncamda nəzərdə tutulan bütün bəndlərin icrası 3 ay ərzində tam şəkildə yerinə yetirilərsə, qısa müddət ərzində qeyri-neft sektorunda rəqabətqabiliyyətli məhsul istehsalı üçün müvafiq şəraitin yaradılmasına nail olacağıq”.
Günel CƏLİLOVA
