Mehman Muradlı: “Ölkəmiz üçün vacib olan islahatdır”
Son vaxtlar Dövlət Gömrük Komitəsinin (DGK) işçiləri arasında rüşvət almaya görə həbslərin həyata keçirilməsi, bəzi işçilərin işdən azad olunmasına dair xəbərlərə rast gəlirik. Ən maraqlısı budur ki, bu xəbərləri ilk olaraq DGK-nın özü ictimaiyyətə təqdim edir. Bu da o qənaətə gəlməyə imkan verir ki, DGK-nın özü tərəfindən qurumun daxilində müəyyən profilaktik işlərin həyata keçirilməsinə start verilib.
DGK-nın mətbuat xidmətinin verdiyi məlumata görə, Dövlət Gömrük Komitəsinə gömrük əməkdaşının vəzifə səlahiyyətlərindən sui-istifadə etməklə ölkə ərazisinə qanunsuz yollarla malların idxal olunmasında vasitəçilik etməsi barədə əməliyyat məlumatı daxil olub: “Daxil olan məlumat əsasında komitənin səlahiyyətli vəzifəli şəxsləri tərəfindən Türkiyə Respublikasından Azərbaycan Respublikasına sərnişin daşınmasını həyata keçirən "Lüks İstanbul" firmasına məxsus "Mercedes Benz travego" markalı, 34 VY 3100 nömrə nişanlı sərnişin avtobusu Qərb Ərazi Baş Gömrük İdarəsinin "Qırmızı Körpü" gömrük postunda gömrük nəzarətini keçdikdən sonra saxlanıb və təkrar gömrük nəzarətinə cəlb edilib. Yoxlama zamanı sərnişin avtobusunun yük yerində gömrük orqanlarında idxal olunması qeydə alınmayan "metal borular" adlı mallar aşkar olunub. Avtobusun sürücüsü Sağlam Yücel Receb oğlu ilə sorğu-sual aparılaraq müəyyən edilib ki, o, həmin "metal borular" adlı yükün gömrük postundan keçirilməsində köməklik göstərilməsi üçün "Qırmızı Körpü" gömrük postunun inspektoru Hüseynov Pərviz Bəhruz oğlu ilə sövdələşib və bunun müqabilində Pərviz Hüseynova 400 ABŞ dolları məbləğində pul verib, yoxlama nəticəsində fakt öz təsdiqini tapıb. Dövlət Gömrük Komitəsi sədrinin müvafiq əmrinə əsasən, Hüseynov Pərviz Bəhruz oğlu dərhal tutduğu vəzifədən azad edilib və fakt üzrə müvafiq sənədlər tərtib olunaraq vəzifə səlahiyyətlərindən sui- istifadə edən gömrük əməkdaşı barəsində xidməti araşdırmaya başlanıb”.
DGK-də baş verən bu proseslər islahatlara necə təsir göstərə bilər?
Hüquqşünas Mehman Muradlı qəzetimizə açıqlamasında bildirdi ki, illərdir gömrükdə yığılan problemlər Prezidentin göstərişindən sonra ciddi araşdırılmağa başlandı: “Görünən budur ki, bu məsələlər ölkə rəhbərliyinin ciddi nəzarətindədir. Gömrükdə rəhbərlik dəyişəndən sonra hiss edilir ki, bu işlərə xüsusilə start verilib. Nəzərə çarpan odur ki, korrupsiyalaşmış gömrük əməkdaşlarının tam olaraq xidmətdən uzaqlaşdırılması qarşıya məqsəd olaraq qoyulub. Əvvəl gömrükdə vəziyyət doğrudan da acınacaqlı idi. Son vaxtlar hüquq-mühafizə orqanlarının həyata keçirdiyi əməliyyatlarla bağlı təqdim olunan materiallardan da görürük ki, neqativliklər kifayət qədər olub. Mən istərdim ki, diqqəti həbslərdən daha çox, kadr yenilənmələrinə yönəldim. Yeni rəhbərliyin gəlişindən sonra işində nöqsanlara yol verən çoxlu sayda əməkdaş tutduğu vəzifədən uzaqlaşdırılıb. Onların arasında rəhbər heyətdə təmsil olunanlar da var. “Dərman mafiyası” adı altında həyata keçirilən əməliyyatlar zamanı da gömrükçülərdən məsuliyyətə cəlb edilənləri oldu. Bütün bunlar onu deməyə əsas verir ki, gömrüyün ideal bir qurum halına salınması uğrunda lazımi işlər aparılır və bunun üçün ortaya ciddi siyasi iradə qoyulur. Bu, bzim ölkəmiz üçün vacib olan islahatdır. Çünki gömrük bizim qapımızdır. Ölkəyə daxil olan əcnəbi ilk olaraq həmin qurumun əməkdaşları ilə təmas qurur”.
Məhəmmədəli QƏRİBLİ
