Əli Əlirzayev: “Hesab edirəm ki, ölkədə emal sənayesini daha da inkişaf etdirmək lazımdır”
“Bizim ixracımız əhəmiyyətli dərəcədə artıb və ixrac idxalı təqribən ən azı 5 milyard dollar səviyyəsində üstələyir”. Bunu Prezident İlham Əliyev Biləsuvar rayon ictimaiyyətinin nümayəndələri ilə görüşdə deyib.
Dövlət başçısı bildirib ki, Azərbaycan dövləti bu istiqamətdə öz siyasətini aparır, insanların sosial rifahı, onların yaxşı yaşaması üçün bütün işlər görülür: “Bizim kifayət qədər böyük imkanlarımız var, həm iqtisadi imkanlarımız, həm də maliyyə resurslarımız. Bu il biz öz valyuta ehtiyatlarımızı əhəmiyyətli dərəcədə artıracağıq. Səkkiz ayın yekunları da çox müsbətdir. Bizim ixracımız əhəmiyyətli dərəcədə artıb və ixrac idxalı təqribən ən azı 5 milyard dollar səviyyəsində üstələyir. Bu da iqtisadi sabitliyə, manatın məzənnəsinin möhkəm səviyyədə saxlanmasına xidmət edir və bizə imkan verir ki, bundan sonra da bir çox önəmli layihələri icra edək. Bütün bunları biz öz hesabımıza edirik. Biz güclü iqtisadiyyata malikik”.
Ümumilikdə, ixracda bu üstünlüyün əldə edilməsinin kökündə bir sıra faktorlar dayanır. Başlıca amil həyata keçirilən iqtisadi islahatlarla bağlıdır. Bunun nəticəsidir ki, ixrac məhsullarının bəzi sahələri üzrə güclü artımlar qeydə alınıb. Məsələ ondadır ki, Azərbaycan məhsullarının həcmi artdıqca, onun satış bazarları da sürətlə genişlənməkdədir. Belə ki, əvvəllər ənənəvi bazarlar sayılan Türkiyə və Rusiya kimi ölkələrə ixracımız artmaqla yanaşı, Çin, Mərkəzi Asiya ölkələri, eləcə də Avropa ölkələrinə də məhsul ixracı genişlənməkdədir. Azərbaycanda yeni yaradılan 43 aqroparkın xaricə kənd təsərrüfatı məhsullarının, Sumqayıtda yaradılan yeni sənaye müəssisələrinin isə kimya məhsulları ixracının dəfələrlə artmasına səbəb olacağı proqnozlaşdırılır. Bu isə ölkəyə daha böyük həcmdə xarici valyuta axınını təmin edəcək.
Maraqlıdır, bəs ekspertlər bu ilin 8 ayının yekunlarına görə ixracın idxaldan 5 milyard dollar çox olmasını necə dəyərləndirirlər?
Məsələyə münasibət bildirən iqtisadçı-alim Əli Əlirzayevin sözlərinə görə, Azərbaycanın ixracat imkanları get-gedə artır: “Ölkədə qeyri-neft sektorunun inkişafı da buna öz müsbət təsirini göstərir. Dünya bazarında bir sıra məhsulların qiymətinin artması bizim ixrac gəlirlərimizə müsbət təsir göstərir. Azərbaycanda son illər bir sıra kənd təsərrüfatı məhsullarının ixracı artıb. Belə ki, bir sıra ölkələrə müxtəlif adda kənd təsərrüfatı məhsulları ixrac olunur. Son illər bu sahədə nəzərəçarpacaq dərəcədə irəliləyişlər müşahidə olunur. Əlbəttə, bütün bunlar Azərbaycanın ümumi ixracına müsbət təsir göstərir. Turizmin inkişafı da ölkədə ixracın artmasına öz müsbət təsirini göstərir. Xarici ölkələrdən gələn sərmayələr ölkə bazarının genişlənməsinə təsir edir. Deməyim odur ki, müxtəlif iqtisadi amillər ixracın idxalı üstələməsində rol oynayır. Hesab edirəm ki, biz bu istiqamətdə səylərimizi daha da artırmalıyıq. Rəqabət qabiliyyətli məhsul istehsalına önəm verməliyik. İdxalı minimum səviyyəyə endirməliyik. Xüsusən də bir sıra zəruri məhsullara olan tələbatı tam daxili istehsal hesabına təmin etməliyik. Hesab edirəm ki, ölkədə emal sənayesini daha da inkişaf etdirmək lazımdır. Məsələn, bir sıra kənd təsərrüfatı məhsullarının emal olunaraq ixrac olunması daha məqsədəuyğundur. Bu zaman daha çox gəlir əldə edilir. Etiraf etmək lazımdır ki, son illər bu istiqamətdə bir sıra işlər görülüb. Fikrimcə, qarşıdakı illərdə qeyri-neft məhsullarının ixracı iqtisadiyyatda mühüm çəkiyə malik olacaq”.
Vidadi ORDAHALLI
