Günel Fərhadqızı: “Hesab edirəm ki, açılışı olan yeni yolu da İlham Əliyevin nəzərdə tutduğu layihələrdən biri saymaq olar”
Prezident İlham Əliyev sentyabrın 18-də Masallı Sənaye Məhəlləsinin açılışında iştirak edərkən çıxışında deyib ki, Bakı-Astara magistral yolunun açılışı tarixi layihədir, Azərbaycanın imkanını göstərir.
Dövlət başçısı daha sonra bildirib: "Digər infrastruktur layihələrinə gəldikdə, yol tikintisi, xüsusilə kənd yollarının tikintisi uğurla gedir. Mənə verilən məlumata görə, kənd yollarının təxminən 85 faizi yenidən qurulub. Əminəm ki, növbəti illərdə Masallı rayonunda təmirsiz bir dənə də kənd yolu qalmayacaq. Masallı şəhərinin küçələrinin yenidən qurulması üçün mənə rayondan müraciət edilib və müraciətə müsbət reaksiya verilib. Əminəm ki, yaxın gələcəkdə şəhərin bütün küçələri də ən yüksək səviyyədə yenidən qurulacaq. Yol infrastrukturuna gəldikdə, onu da bildirməliyəm ki, bu gün Bakı-Astara magistral yolunun açılışı olmuşdur. Bu da tarixi layihədir. Çünki Azərbaycanın imkanını göstərir və eyni zamanda, yol çox keyfiyyətlidir, ən yüksək dünya standartlarına cavab verir və məsafə baxımından Bakıdan Astaraya gedən yol təxminən 40 kilometr qısalır. Çünki yeni yol xətti salınıb. Əvvəllər o yerlərdə bataqlıq olub və artıq yeni yol şəhərlərə girmir, - nə Biləsuvar, nə də Masallı şəhərlərinə, - yeni bir istiqamətlə düz sərhədə qədər gedir. Əlbəttə, Masallı rayon sakinləri də hesab edirəm ki, bunu çox yüksək qiymətləndirəcəklər. Çünki magistral yolla, xüsusilə yük maşınlarının gecə-gündüz o tərəf-bu tərəfə işləməsi insanları narahat edirdi, müəyyən təhlükə yaradırdı".
Məlum olduğu kimi, açılışı olan bu yoldan yalnız Azərbaycan istifadə etməyəcək. Çox böyük logistik imkanları özündə cəmləşdirən bu yoldan İran, Rusiya, hətta Mərkəzi Asiya ölkələrinin də istifadə edəcəyi dəqiqdir. Təsadüfi deyil ki, İlham Əliyev Rusiya Prezidenti ilə Soçi şəhərində görüşü zamanı da məhz Azərbaycanın yalnız özü üçün deyil, həm də qonşu ölkələr üçün nəqliyyat infrastrukturunu yaratdığına dair fikirlər səsləndirib: “Bizi həm dəmir yolları, həm avtomobil yolları, həm də çox fəal sərnişin və yükdaşımaları üçün hava yolları birləşdirir. Biz ölkələrimiz, eləcə də qonşularımız üçün yeni nəqliyyat imkanları yaradılması üzrə gələcək addımlarımızı ətraflı müzakirə etdik”.
Açılışı olan yeni Bakı-Astara yolu da Prezidentin Soşidə səsləndirdiyi fikirlərə uyğun olaraq, regionun bir sıra dövlətlərinin istifadəsi üçün yararlı və faydalı olan layihələr həyata keçirmək siyasətinin real nəticələrindən biri sayıla bilərmi? Axı Bakı-Astara yolu tək Azərbaycana fayda verməyəcək.
İqtisadçı Günel Fərhadqızının sözlərinə görə, ölkəmizin malik olduğu tranzit potensialı və bundan səmərəli istifadə üçün həyata keçirilən layihələr dünya miqyasında Azərbaycana diqqəti daha da artırır: “Məsələn, belə layihələrdən biri kimi Bakı-Tiflis-Qars dəmir yolunu qeyd edə bilərik. Artıq bu yol Orta Asiya ölkələrinin dünya bazarlarına çıxışında əsas marşrutlardan biri kimi nəzərdən keçirilir. Göründüyü kimi, Azərbaycanın ərsəyə gətirdiyi bütün nəqliyyat layihələri yalnız özü üçün deyil, eyni zamanda region ölkələrinin yukdaşımaya olan tələbatını ödəmək üçün nəzərdə tutulur. Bizim təklif etdiyimiz nəqliyyat damarları həm vaxt qənaəti, həm də maliyyə baxımından ölkələr üçün olduqca sərfəlidir.
Xüsusilə nəzərə alsaq ki, keçən ilin oktyabr ayından Bakı-Tiflis-Qars dəmir yolu kimi nəhəng infrastruktur layihəsi fəaliyyətdədir, bu yol Asiyanı Avropa ilə birləşdirir və bu yolla yükdaşımaların həcmi artır və artmalıdır. Bu, yeni nəqliyyat dəhlizidir, yeni nəqliyyat damarıdır. Bu baxımdan açılışı olan yeni Bakı-Astara yolunun da yalnız Azərbaycanın tələbatlarını ödəməyəcəyi məlumdur. Azərbaycanın cənub bölgəsinə qədər uzanan bu yol İran xətti üzrə gediş-gəliş edənlər üçün sərfəli olacaq. Təbii ki, bu istiqamət üzrə Rusiyadan və Orta Asiya ölkələrindən də iri həcmlərdə gediş-gəliş var. Bu baxımdan da hesab edirəm ki, açılışı olan yeni yolu da İlham Əliyevin nəzərdə tutduğu layihələrdən biri saymaq olar”.
Məhəmmədəli QƏRİBLİ
