Könül Nuriyeva: “Bu gün banklar manatla yatırılan əmanətlərə daha çox faiz verirlər”
Açıqlanan statistik rəqəmlərə əsasən, 2018-ci il avqust ayının 1-nə Azərbaycanda əhalinin banklardakı əmanətlərinin milli valyuta ekvivalentində məbləği 8 milyard 049,5 milyon manat təşkil edib. Əmanətlərin 62,3 faizi xarici, 37,7 faizi isə milli valyutada qoyulub. Milli valyutada olan əmanətlər əvvəlki ilin müvafiq dövrunə nisbətən 1,7 dəfə artıb, xarici valyutada əmanətlər isə 0,5 faiz azalıb.
2018-ci il avqust ayının 1-nə ölkənin bank və digər kredit təşkilatlarının kredit portfeli milli valyuta ekvivalentində 12 milyard 170,7 milyon manat təşkil edib.
Cari ilin 8 ayında Azərbaycan banklarında olan əmanətin həcminin 8 milyard dəyərində olmasını dəyərləndirən iqtisadçı-ekspert Könül Nuriyeva “Bakı-Xəbər”ə açıqlamasında qeyd etdi ki, ötən illə müqayisədə banklara yerləşdirilən əmanətlərin həcmi artıb: “Banklara yerləşdirilən əmanətlərin həcminin artması sevindiricidir. Çünki insanların banklara inamı, etibarı artıb”.
Həmsöhbətimizin sözlərinə görə, banklara yatırılan əmanətlərin həcminin artması bank sektoruna da müsbət təsir edir: “Bank iki tərəfdən gəlir əldə edir. Həm əhalinin etimadını qazanır, həm də gəlir əldə edir. Banklara yerləşdirilən depozitin həcmi nə qədər çox olarsa, bankların kredit vermək şansı bir o qədər çox olar. Bəllidir ki, bankların maliyyələşmə mənbələrindən biri də əmanətlərdir”.
Xanım iqtisadçı onu da bildirdi ki, ötən illərlə müqayisədə əmanətlərin həcmi artsa da, bu elə də qaneedici rəqəm deyil. Əhalinin bank sektoruna etimadı tam şəkildə müsbət olarsa, o zaman yerləşdirilən əmanətlərin həcmi daha da artar: “Əmanətlərin həcminin artması əhalinin gəlirlərinin artması ilə bağlıdır. Əhalinin sosial durumu müsbətə doğru dəyişdikcə, banklara qoyulacaq əmanətlərin həcmi də artacaq. Qeyd edim ki, xarici valyuta ilə yanaşı, manatla yatırılan əmanətlərin həcmi də artır: “Nəzərə almaq lazımdır ki, bu gün banklar manatla yatırılan əmanətlərə daha çox faiz verirlər. Bu səbəbdən vətəndaşlar daha çox manatla əmanət yerləşdirməyə üstünlük verirlər”.
Günel CƏLİLOVA
