Rəşad Həsənov: “Əhalinin nominal gəlirinin artması ilə yanaşı, sərəncamında olan vəsaitin həcmi də artıb” Fuad İbrahimli: “Əhalinin sərəncamında olan vəsaitin artması…”
Xəbər verildiyi kimi, 2018-ci ilin yanvar-avqust aylarında Azərbaycan əhalisinin nominal gəlirləri 34 milyard 786,3 milyon manat təşkil edib. Əhalinin nominal gəlirləri əvvəlki ilin müvafiq dövrünə nisbətən 9,5 faiz artaraq, əhalinin hər nəfərinə orta hesabla 3548,1 manat təşkil edib.
Bütün icbari və könüllü ödənişlər edildikdən sonra əhalinin sərəncamında 31 milyard 930,0 milyon manatlıq və ya əvvəlki ilin müvafiq dövrü ilə müqayisədə 9,9 faiz çox vəsait qalıb.
Ekspertlərin bildirdiyinə görə, real sektorun bəzi sahələrində əməkhaqqının artması əhalinin gəlirinə təsir göstərib. Artan gəlirə rəğmən, müəyyən ödənişlərin edilməsinə baxmayaraq, ötən illə müqayisədə əhalinin sərəncamında olan vəsait artıb.
Məsələyə münasibət bildirən iqtisadçı-ekspert Rəşad Həsənov “Bakı-Xəbər”ə açıqlamasında qeyd etdi ki, əhalinin gəlirlərində artım qeydə alınır: “Məlumdur ki, cari ilin əvvəlində Prezident tərəfindən imzalanan sərəncam əsasında əməkhaqları artırılıb. Eyni zamanda, əmək pensiyalarının indeksasiyası da həyata keçirilib. Bütün bunlar əhalinin gəlirinin artmasına səbəb olub. Əhalinin nominal gəlirinin artması ilə yanaşı, sərəncamında olan vəsaitin həcmi də artıb”.
İqtisadçı-ekspert Fuad İbrahimli bizimlə söhbətində bildirdi ki, ölkə iqtisadiyyatının inkişafı istiqamətində görülən işlər sayəsində əhalinin sərəncamında olan vəsait daha da arta bilər: “Bazar iqtisadiyyatına uyğun olaraq işlər görülsə, əhalinin sərəncamında olan vəsait arta bilər. Əhalinin sərəncamında olan vəsaitin artması yalnız müsbət fon yarada bilər”.
Günel CƏLİLOVA
