Fikrət Yusifov: “Ötən ilin analoji dövrü ilə müqayisədə əhalinin gəlirinin 10 faiz artması gözlənilən idi və ilin sonuna kimi qeyd olunan rəqəm daha da artacaq”
Dövlət Statistika Komitəsinin yaydığı məlumatda qeyd olunur ki, Azərbaycan əhalisinin gəlirləri artıb. Komitənin yaydığı rəsmi statistic məlumata əsasən, bu ilin yanvar-avqust aylarında Azərbaycan əhalisinin nominal gəlirləri 34 786,3 mln. manat təşkil edib. Bu, ötən ilin eyni dövrü ilə müqayisədə 9,5% çoxdur. Belə ki, son 1 ildə adambaşına nominal gəlir isə 8,5% artaraq 3 548,1 manat olub.
Ekspertlər ölkə əhalisinin gəlirinin artmasının gözlənilən olduğunu vurğulayırlar. Onların fikrincə, ailə təsərrüfatlarının gəlirlərinin artması, sahibkarlıq fəaliyyətindən gəlirlərin əldə olunması əhalinin gəlirinin artmasına səbəb olub. Həmçinin, qeyri-neft sektorunun prioritet sahələrindən olan aqrar, turizm və digər sahələrində qeydə alınan inkişaf əhalinin gəlirinin artması ilə nəticələnir. Danılmaz faktdır ki, son zamanlar açılan iş yerlərinin sayı da artır. Bu da əhalinin gəlirinin artmasına təsir göstərir.
İqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, cari ilin 8 ayı ərzində iqtisadiyyatın bir sıra sahələrində, xüsusilə qeyri-neft sektorunda pozitiv nəticə qeydə alınıb: “Qeyri-neft sektorunun aparıcı sahəsi sayılan aqrar sahədə qeydə alınan inkişaf göz qabağındadır. Qeyri-neft sənayesində də vəziyyət müsbətə doğru dəyişir. Tranzit yükdaşımalarda, turizm sektorunda və digər sahələrdə inkişaf yaşanır. Təbii ki, ölkə iqtisadiyyatında qeydə alınan inkişaf əhalinin orta aylıq gəlirlərinin artmasına səbəb olur”.
Həmsöhbətimiz onu da vurğuladı ki, ölkədə aparılan iqtisadi islahatlar əhalinin gəlirinə təsir göstərir. Ötən ilin analoji dövrü ilə müqayisədə əhalinin gəliri 10 faiz artıb. Bu gözlənilən idi. İqtisadçının fikrincə, ilin sonuna kimi əhalinin gəliri daha da artacaq.
Günel CƏLİLOVA
