Günel Fərhadqızı: “Bizim birgə həyata keçirdiyimiz layihələrin faydası yalnız bu iki ölkəyə dəymir, onlar bütün region üçün əhəmiyyətlidir”
Prezident İlham Əliyev Bakı şəhərinin daşnak-bolşevik işğalından azad edilməsinin 100 illiyinə həsr olunmuş paraddakı çıxışında bildirib ki, Azərbaycanla Türkiyə birgə enerji-nəqliyyat layihələrini uğurla icra edir və həmin layihələr Avrasiyanın enerji və nəqliyyat xəritəsini yaradır.
Birgə layihələrdən danışan Prezident deyib: “Bakı-Tbilisi-Ceyhan, Bakı-Tbilisi-Ərzurum neft-qaz kəmərləri, TANAP layihəsinin bu il istifadəyə verilməsi tarixi layihələrdir. Birgə siyasi iradə ortaya qoyulmuşdur. Birgə maliyyə resursları təşkil edilmişdir və bu nəhəng transmilli layihələr uğurla icra edilmişdir. Biz Avrasiyanın nəqliyyat xəritəsini yenidən yaradırıq”.
Ötən ilin oktyabrında Prezident Rəcəb Tayyib Ərdoğanın iştirakı ilə Bakıda Bakı-Tiflis-Qars dəmir yolunun rəsmi açılışı mərasimi keçirildiyini xatırladan İlham Əliyev deyib: “Bu dəmir yolu yeni nəqliyyat damarıdır. Bu dəmir yolu ilə daşınan yüklərin həcmi getdikcə artır və artacaq. Bizim ölkələrimizin əhəmiyyəti, önəmi artır. Bütün bu böyük layihələri ancaq biz birlikdə edə bilərdik və etdik”.
Prezident İlham Əliyev qeyd edib ki, bu gün Türkiyə və Azərbaycan iki qardaş ölkə kimi bu layihələrin bəhrəsini görür. Prezidentin çıxışında qeyd etdiyi kimi, Azərbaycanla Türkiyənin birgə enerji-nəqliyyat layihələrini uğurla icra etməsi və bunun nəticəsində Avrasiyanın enerji və nəqliyyat xəritəsinin yaradılmasını necə dəyərləndirmək olar?
İqtisadçı Günel Fərhadqızının sözlərinə görə, Azərbaycanın təşəbbüsü ilə reallaşan və hazırda inşa olunan enerji layihələrində Türkiyənin də rolu yüksək və danılmazdır: “Bizim birgə həyata keçirdiyimiz layihələr sıradan sayıla bilməz. Təsadüfi deyil ki, onların adını meqa kimi çəkirlər. Bizim birgə həyata keçirdiyimiz layihələrin faydası yalnız bu iki ölkəyə dəymir, onlar bütün region üçün əhəmiyyətlidir. Təşəbbüskarı olduğumuz layihələr regionun enerji xəritəsini dəyişib. Gürcüstanın Supsa limanına qədər inşa etdiyimiz ilk kəmər Xəzər dənizini Qara dənizlə birləşdirdi. Daha sonra inşa etdiyimiz Bakı-Tiflis-Ceyhan neft kəməri Xəzər dənizini Aralıq dənizi ilə birləşdirdi. Bundan sonra həmin marşrut boyu biz qaz kəmərini də inşa etmişik. Beləliklə, biz karbohidrogen ehtiyatlarımız üçün şaxələnmiş ixrac marşrutlarına malikik və geniş mənada tərəfdaşlarımızın, o cümlədən Avropada olan tərəfdaşlarımızın enerji təhlükəsizliyini təmin edirik. Biz nəqliyyat sahəsində də önəmli işlərə imza atmışıq. Bakı-Tiflis-Qars dəmir yolu regionun nəqliyyat xəritəsini dəyişməklə Çindən Avropaya olan ən qısa, sərfəli marşrut kimi dövlətlərin diqqətini cəlb edir. Son illər həyata keçirilən layihələr nəqliyyat və enerji sahəsində şaxələndirmənin yeni xəritəsi olmaqla, okeana çıxışı olmayan Azərbaycan üçün çox əhəmiyyətlidir. Bütün bu enerji və nəqliyyat layihələrinin təşəbbüskarı olan Azərbaycan belə işləri Türkiyənin və başqa müttəfiq ölkələrin köməyilə həyata keçirib”.
Məhəmmədəli QƏRİBLİ
