Rəsul Cahangirli: “İqtisadiyyatın diversifikasiyası və qeyri-neft sektorunun inkişafı ilə bağlı ciddi, sistemli xarakterli işlər görülüb və görülür”
“Son 15 il ərzində Azərbaycan iqtisadiyyatı 3,2 dəfə artmışdır”. Bu fikirləri Prezident İlham Əliyev Bakı şəhərinin işğaldan azad edilməsinin 100 illiyinə həsr olunmuş paraddakı çıxışında bildirib.
Ölkə başçısının sözlərinə görə, bu gün Azərbaycan bölgədə önəmli ölkəyə çevrilib, dünyadakı rolu artır. O bunu bir sıra arqumentlərlə əsaslandırıb: “Bizim beynəlxalq mövqelərimiz möhkəmlənir, dünya ictimaiyyəti bizim siyasətimizi dəstəkləyir. Bunun ən bariz nümunəsi odur ki, bir neçə il bundan əvvəl dünyanın 155 ölkəsi Azərbaycanı BMT Təhlükəsizlik Şurasına qeyri-daimi üzv seçib. Bu, dünyanın Azərbaycana olan dəstəyinin təzahürüdür".
Bütün bunlarla yanaşı, Prezident İlham Əliyev Azərbaycandakı iqtisadi artımla bağlı bir sıra məqamlara toxunub: “İqtisadi sahədə aparılan islahatlar Azərbaycana böyük imkanlar gətirdi, biz böyük nailiyyətlərə çata bildik. Təkcə onu demək kifayətdir ki, son 15 il ərzində Azərbaycan iqtisadiyyatı 3,2 dəfə artmışdır. Ölkə iqtisadiyyatına 250 milyard dollar sərmayə qoyulmuşdur. Sosial məsələlərin həlli işində böyük uğurlar əldə edilmişdir. Bu gün Azərbaycanda işsizlik 5 faiz səviyyəsindədir. Azərbaycan dost ölkələrlə, ilk növbədə, Türkiyə ilə birlikdə böyük layihələr icra etdi”.
Azərbaycanın iqtisadi sahədə əldə etdiyi nailiyyətlər ölkənin regionda lider dövlətə çevrilməsinə təkan verir. Reallıq ondan ibarətdir ki, 2003-cü ildə İlham Əliyev Prezident seçiləndən sonra Azərbaycan iqtisadiyyatında ciddi inkişaf qeydə alınıb. Bunun nəticəsidir ki, iqtisadi artım davamlı hal alıb.
Bütün bunlarla yanaşı, son 15 ildə Azərbaycan iqtisadiyyatının 3,2 dəfə artması nəyin hesabına baş verib? Məsələyə münasibət bildirən ekspert Rəsul Cahangirlinin sözlərinə görə, ötən 15 il ərzində aparılan uğurlu iqtisadi siyasət 3 dəfədən çox artıma şərait yaradıb: “Məsələ ondadır ki, aparılan islahatlar və neftdən əldə olunan gəlirlərin səmərəli şəkildə istifadə olunması ölkədə iqtisadi artımı sürətləndirib. Nəzərə almaq lazımdır ki, ötən illər ərzində ölkə iqtisadiyyatının inkişafında çox böyük işlər görülüb. O üzdən, son 15 il ərzində Azərbaycanın iqtisadi artımının göstəriciləri hətta dünya səviyyəsinə görə yüksəkdir. Düzdür, bu nəticələrə nail olmaqda əsas rolu enerji sektoru oynayıb. Çünki ötən illər ərzində neft satışı hesabına böyük gəlirlər əldə olunub. Ancaq onu da nəzərə almaq lazımdır ki, iqtisadiyyatın diversifikasiyası və qeyri-neft sektorunun inkişafı ilə də bağlı ciddi, sistemli xarakterli işlər görülüb və gürülür. Bu, ölkənin makroiqtisadi siyasətinin prioritetlərindən biridir. Çünki əlverişli makroiqtisadi vəziyyət dövlət büdcəsinin xərclər hissəsinin artırılması üçün lazım olan zəmini yaradır. Bu gün dövlət büdcəsinin xərclər hissəsi ümumdaxili məhsulun 25-30 faizi səviyyəsindədir. Ötən illər ərzində iqtisadiyyatın inkişafı ilə bağlı bir sıra proqramlar qəbul olunub. Regionların iqtisadi inkişafı üçün əhəmiyyətli işlər görülüb. İnfrastruktur formalaşdırılıb, bazara çıxış imkanları genişlənib, xarici investisiyaların cəlb edilməsi üçün imkanlar yaradılıb. Mövcud infrastruktur xarici sərmayənin cəlb edilməsinə imkan yaradır. Bu istiqamətdə investisiya mühitinin daha da yaxşılaşdırılması və xarici investisiyaların cəlb edilməsi iqtisadi artıma öz müsbət təsirini göstərib. Nəzərə alınmalıdır ki, artıq regionlarda özünüməşğulluq proqramları da tətbiq edilməyə başlanıb və bu proqram dövlət büdcəsindən maliyyələşdirilir”.
Vidadi ORDAHALLI
