Fikrət Yusifov: “2017-ci ildə ümumi ticarət dövriyyəmiz 664 milyon ABŞ dolları təşkil edib ki, bunun da...”
Çexiya şirkətləri Azərbaycanda öz iştiraklarını genişləndirmək və Azərbaycan sahibkarları ilə əməkdaşlığı möhkəmləndirmək niyyətindədirlər. Bunu mətbuata açıqlamasında Çexiyanın MDB ölkələri üzrə sənaye-ticarət palatasının idarə heyətinin sədri Frantişek Masopust deyib.
Onun sözlərinə görə, artıq 10 ildir Çexiya şirkətləri Azərbaycana gəlirlər: “Bu müddət ərzində sizin ölkəniz haqqında cəlbedici məlumatları Çexiyada yaymağa müvəffəq olmuşuq və bizim şirkətlər böyük məmnuniyyətlə Azərbaycana gələrək burada tərəfdaş tapmağa maraqlıdırlar. İlk növbədə bizi ölkədəki stabillik və təhlükəsizlik cəlb edir. Hələ 12-15 il əvvəl Azərbaycan bazarına çıxarkən biz hiss etmişdik ki, qonşularınızdan fərqli olaraq, məhz sizin ölkədə bizi böyük perspektivlər gözləyir. İndi biz bir daha əminik ki, həmin dövrdə düzgün addım atmışıq. Azərbaycan iqtisadiyyatı stabil şəkildə inkişaf edir və hər il bura gələrkən biz bunu öz gözlərimizlə görürük. İki ölkənin biznes strukturları arasında münasibətləri inkişaf etdirmək üçün yaxşı potensial var. Ona görə biz Azərbaycanda iştirakımızı genişləndirmək istəyirik”.
Palata rəhbəri qeyd edib ki, Çexiya sahibkarları bir sıra istiqamətlər üzrə birgə fəaliyyət üçün Azərbaycandan olan tərəfdaşlarla münasibətlərin qurulmasına hazırdırlar. Palata rəhbəri deyib: “Biz sizinlə maşınqayırma, elektrotexnika istehsalı, nəqliyyat, turizm, tikinti sahələrində, eləcə də müxtəlif infrastruktur layihələrin həyata keçirilməsində və münasibətlərin inkişaf etdirilməsində maraqlıyıq. Biz Azərbaycana birgə fəaliyyətimiz çərçivəsində müxtəlif texnologiya və avadanlıq təqdim etməyə hazırıq. Ümumilikdə istərdik ki, biznes əməkdaşlığımız yüksək səviyyədə olsun”.
Məlumat üçün qeyd edək ki, hazırda Azərbaycanda Çexiya kapitalı ilə 25 şirkət fəaliyyət göstərir. İki ölkə arasında iqtisadi əlaqələrin genişlənməsi tərəflərin mənafeyinə uyğundur. Müşahidələr göstərir ki, bir sıra sahələrdə Çexiya ilə Azərbaycan birgə müəssisələr də yarada bilər. Ümumən Çexiya şirkətlərinin bu marağı nəyin göstəricisidir və bunun Azərbaycan iqtisadiyyatı üçün hansı faydaları olacaq?
Məsələyə münasibət bildirən iqtisad elmləri doktoru, professor Fikrət Yusifov buna bir neçə kontekstdən yanaşdı: “Əvvəla qeyd edim ki, iki ölkə arasında diplomatik əlaqələr 1993-cü ilin yanvar ayının sonlarında qurulub. Hazırda Azərbaycan Respublikasının Milli Məclisində Azərbaycan-Çexiya parlamentlərarası əlaqələr üzrə işçi qrupu fəaliyyət göstərir. Son illər ərzində hər iki ölkənin dövlət başçıları səviyyəsində həm Bakıda və həm də Praqada rəsmi görüşlər olub. Tərəflər arasında keçirilən görüşlər zamanı qarşılıqlı əməkdaşlığı ehtiva edən bir çox sənədlər imzalanıb. Azərbaycanla Çexiya arasında ticarət dövriyyəsi ötən il özünün ən yüksək səviyyəsinə çatıb. 2017-ci ildə ümumi ticarət dövriyyəmiz 664 milyon ABŞ dolları təşkil edib ki, bunun da 557 milyon dolları bizim ixracımızın, 107 milyon dolları isə idxalın payına düşür. İxracımızda əsas yer neft məhsullarına məxsusdur. Məsələ ondadır ki, Azərbaycandan Çexiyaya bir sıra neft məhsulları ixrac olunur. Bu səbəbdən də ticarət dövriyyəsinin strukturunda dönüş etmək zərurəti var. Azərbaycan hökuməti qeyri-neft sənayemizin məhsullarının Çexiya bazarlarında daha geniş təqdim olunmasını istəyir. O üzdən, bu istiqamətdə sözügedən ölkə ilə əməkdaşlığı daha da genişləndirməkdədir. Hesab edirəm ki, bu istiqamətdə görülən işlər öz effektini verəcək”.
Vidadi ORDAHALLI
