Rəsul Cahangirli: “Hesab edirəm ki, bu amil ölkəmizin öncül mövqedə qərarlaşmasına təkan verir”
“Rusiya Federasiyasının 70-dən artıq subyekti Azərbaycanla iqtisadi əlaqələr saxlayır”. Bu fikirlər sentyabrın 1-də Prezident İlham Əliyevlə rusiyalı həmkarı Vladimir Putinin Soçidə görüşü başa çatandan sonra, Rusiya dövlət başçısının bəyanatında yer alıb.
Sözügedən bəyanatda qeyd olunur ki, Rusiya və Azərbaycanı möhkəm dostluq və əməkdaşlıq ənənələri bağlayır: “Dövlətlərimizin münasibətləri qarşılıqlı faydalı tərəfdaşlıq xarakteri daşıyır, mehriban qonşuluq və bir-birinin marağına hörmət prinsiplərinə əsaslanır. Əminəm ki, əsas idarələrin rəhbərlərinin və biznes nümayəndələrinin iştirak etdikləri bugünkü danışıqlar bütün Rusiya-Azərbaycan əlaqələri kompleksinin gələcək inkişafına əlavə təkan verəcək. Azərbaycan Prezidenti ilə imzalanan Birgə Bəyanat, həmçinin, hökumətlərarası və idarələrarası sanballı sazişlər paketi məhz buna istiqamətlənib. İkitərəfli iqtisadi əlaqələrə gəlincə, onlar çox fəal inkişaf edir. 2017-ci ilin yekununa görə, Rusiya və Azərbaycan arasında əmtəə dövriyyəsi, demək olar ki, 35 faiz artaraq 2,5 milyard dollara çatıb. Rusiyanın Azərbaycana birbaşa kapital qoyuluşu 1,5 milyard dollar təşkil edib. Azərbaycan bazarında təxminən 700 birgə müəssisə, onlardan da üçdə biri 100 faizlik Rusiya kapitalı ilə fəaliyyət göstərir.
Regionlararası əməkdaşlıq mövzusunu da müzakirə etdik. Rusiya Federasiyasının 70-dən artıq subyekti Azərbaycanla iqtisadi əlaqələr saxlayır. Həm də onlardan 17-si ticari-iqtisadi və elmi-texniki əməkdaşlıq barədə çərçivə sazişləri bağlayıb. Bu ilin oktyabrında növbəti regionlararası forum keçiriləcək. Bayaq müzakirə etdik ki, bu tədbir Gəncədə planlaşdırılmışdı, amma ola bilər dostlarımız bunu Bakıda təşkil etsinlər”.
Maraqlıdır, Rusiya-Azərbaycan regionlararası əməkdaşlığına gorə Azərbaycan Qafqazın digər ölkələrindən hansı səviyyədə fərqlənir və irəlidədirmi?
Məsələyə münasibət bildirən ekspert Rəsul Cahangirlinin sözlərinə görə, Rusiya-Azərbaycan münasibətlərinin dərin kökləri var və bu münasibətlər SSRİ-nin süqutundan sonra iki müstəqil dövlət arasında daha şəffaf bir müstəvidə inkişaf edir: “Biz Rusiya ilə iqtisadi, siyasi, mədəni, elmi və bir çox digər sahələrdə çox ciddi əməkdaşlıq edirik. Regionlararası əməkdaşlığa gəldikdə isə, bu əməkdaşlıq get-gedə daha da inkişaf edir. Bunu şərtləndirən bir sıra faktorlar var. Əvvəla Azərbaycan Cənubi Qafqazda ən böyük ölkədir. Eyni zamanda, iqtisadi baxımdan Azərbaycanın imkanları və potensialı digər respublikalarla müqayisədə daha büyükdür. Azərbaycan Rusiyanı bir sıra kənd təsərrüfatı məhsulları ilə təmin edir. Rusiya bir sıra bostan və tərəvəz məhsullarına olan tələbatı Azərbaycan hesabına təmin edir. Siyasi əlaqələrin yüksək səviyyədə olması iki ölkə arasında iqtisadi əlaqələrin genişlənməsinə öz müsbət təsirini göstərir. O cümlədən bu, regionlararası əlaqələrin də inkişafına təsirsiz ötüşmür. Bu yöndə əlaqələr yüksələn xətlə inkişaf edir. Rusiya-Azərbaycan regionlararası əməkdaşlığına görə Azərbaycan Cənubi Qafqazın digər ölkələrindən böyük potensialı ilə fərqlənir. Hesab edirəm ki, bu amil ölkəmizin öncül mövqedə qərarlaşmasına təkan verir”.
Vidadi ORDAHALLI
