Müslüm İbrahimov: “Yaxın müddət ərzində Rusiya ilə iqtisadi əməkdaşlığın digər formalarının təşkilinə şərait yaradılacaq, təbii ki, bu, ölkə iqtisadiyyatının inkişafına səbəb olacaq”
Məlum olduğu kimi, Azərbaycan Respublikasının Prezidenti İlham Əliyev sentybarın 1-də Rusiya Federasiyasına rəsmi səfər edib. Səfər çərçivəsində Rusiya Prezidenti Vladimr Putinlə görüşən dövlət başçısı rusiyalı həmkarı ilə mühüm məsələləri müzakirə ediblər. Həmçinin, görüş çərçivəsində Rusiya ilə Azərbaycan arasında əhəmiyyətli müqavilələr bağlanıb, iqtisadi və hərbi sazişlərə imza atılıb.
Dövlət başçısı çıxışı zamanı bildirib ki, bu gün neft-qaz sahəsində əməkdaşlığa dair mühüm sənədlər imzalanıb: "Bu, bizim əməkdaşlığımızın ənənəvi sahəsidir. Çox yaxşı potensial və perspektivlər var. Vladimir Vladimiroviç Azərbaycanda bir sıra mühüm nəqliyyat, infrastruktur, sənaye layihələrinin həyata keçirilməsində Rusiya banklarının fəal iştirakını qeyd etdi. Biz bunu çox alqışlayırıq”.
Səfər çərçivəsində Azərbaycanın sənaye, nəqliyyat və infrastruktur layihələrində Rusiya banklarının iştirakı məmnunluqla qarşılanıb. Bu istiqamətdə işlərin davam etdirilməsi üçün nə kimi gözləntilər var?
İqtisad elmləri doktoru Müslüm İbrahimov "Bakı-Xəbər"ə açıqlamasında qeyd etdi ki, Azərbaycan Rusiya üçün əlverişli investisiya ölkəsidir: “Rusiya banklarına Azərbaycanda investisiya maraqlarına uyğun şərait yaradılıb. Rusiyanın bank sisteminin investisiya fəaliyyətinin artırılması qeyd olunan ölkənin ən böyük maraqlarından biridir”.
Həmsöhbətimizin sözlərinə görə, infrastruktur layihələrində Rusiya bankları ilə yanaşı, bir neçə sənaye şirkəti iştirak edir. Bu, Azərbaycanla Rusiya arasında yatırılan sərmayələrin artmasına səbəb olur: “Azərbaycan və Rusiyanın öz valyutaları ilə həyata keçirilən irimiqyaslı layihələr bank sektoruna təsir göstərir. Bəllidir ki, hazırda Rusiya valyutasının məzənnəsində dəyişiklik yaşanır. Belə olan halda, həmin ölkənin bank sistemində çətinlik yaşanır. Bu səbəbdən də Rusiya bankları siyasi, iqtisadi sabitlik hökm sürən Azərbaycanla danışıqlar apararaq öz bankları üçün əlverişli investisiya məkanı yaradırlar. Azərbaycan üçün bu hal əlavə investisiya yatırımları deməkdir”.
İqtisadçı onu da vurğuladı ki, Azərbaycanın sənaye, nəqliyyat, infrastruktur layihələrində Rusiya bankları iştirak etməkdə maraqlıdırlar. Rusiya tərəfi Azərbaycanda bir sıra sahələrə yatırım edib: “Hesab edirəm ki, yaxın müddət ərzində Rusiya ilə iqtisadi əməkdaşlığın digər formalarının təşkilinə şərait yaradılacaq. Təbii ki, bu, ölkə iqtisadiyyatının inkişafına səbəb olacaq”.
Günel CƏLİLOVA
