Tahir Mirkişili: “Rusiya-İran, Rusiya-Türkiyə, Rusiya-Şərq ölkələri arasında yükdaşımaların Azərbaycanda yaradılmış yeni infrastruktur vasitəsilə daşınması…”
Məlum olduğu kimi, ötən həftə Azərbaycan Prezidenti İlham Əliyev Rusiyada rəsmi səfərdə olub. Səfər çərçivəsində bir sıra sahələr üzrə mühüm razılıqlar əldə edilib. Prezident İlham Əliyev Soçidə Rusiya Prezidenti Vladimir Putinlə birgə mətbuata bəyanatla çıxışında bir sıra məsələlərə toxunub.
O cümlədən, İ.Əliyev çıxışı zamanı qeyd edib ki, Rusiya və Azərbaycan qonşu dövlətlərdir: “Bizi həm dəmir yolları, həm avtomobil yolları, həm də çox fəal sərnişin və yükdaşımaları üçün hava yolları birləşdirir. Biz ölkələrimiz, eləcə də qonşularımız üçün yeni nəqliyyat imkanları yaradılması üzrə gələcək addımlarımızı ətraflı müzakirə etdik. Azərbaycan da öz tərəfindən ölkə ərazisində bu istiqamətdə bütün mühüm infrastruktur layihələrini həyata keçirib. Bu il “Şimal-Cənub” nəqliyyat dəhlizi ilə keçən illə müqayisədə 100 dəfə çox yük daşınıb. Bu hələ başlanğıcdır, çünki bu genişmiqyaslı qlobal layihə çoxsaylı ölkələri və qitələri əhatə edəcək. Beləliklə, ölkələrimizin tranzit imkanları artacaq, minlərlə yeni iş yeri yaradılacaq”.
Rusiya ilə Azərbaycan arasında qonşu ölkələr üçün nəqliyyat imkanlarının yaradılması istiqamətində əməkdaşlığın hansı perspektivləri olacaq?
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Tahir Mirkişili “Bakı-Xəbər”ə açıqlamasında qeyd etdi ki, Azərbaycan Rusiya ilə birgə “Şimal-Cənub” nəqliyyat dəhlizinin iştirakçısıdır: “Məlumdur ki, “Şimal-Cənub” nəqliyyat dəhlizi Avropanın şimal hissəsindən başlayaraq Asiyanın şərq hissəsinə qədərdir. Bu səbəbdən də hesab edirəm ki, hər iki ölkə arasında nəqliyyat əməkdaşlığı yüklərin daha qısa müddətə və ucuz daşınması sahəsində əməkdaşlığı daha da genişləndirəcək. Prezident İlham Əliyev də çıxışında qeyd etdi ki, son zamanlar Azərbaycan və Rusiya arasında yükdaşımalar xeyli artıb”.
Millət vəkilinin sözlərinə görə, Rusiya-İran, Rusiya-Türkiyə, Rusiya-Şərq ölkələri arasında yükdaşımaların Azərbaycanda yaradılmış yeni infrastruktur vasitəsilə daşınması birbaşa Rusiyanın özünün iqtisadi marağındadır. Çünki bu yol daha rahat, müasir və bir çox ölkələri keçdiyindən, əlavə dəyər yaradan marşrutdur. Bu səbəbdən də Rusiya bu marşrutdan istifadə etməkdə maraqlıdır: “Təbii ki, Azərbaycan tranzit ölkə kimi yüklərin bu və ya digər istiqamətdə daşınmasında maraqlıdır. Bundan Azərbaycan tərəfi gəlir əldə edir. Eyni zamanda, iqtisadiyyatda qeyri-neft sektorunun inkişafı baxımından nəqliyyat əlaqələrinin genişlənməsi və yüklərin daşınmasında yeni əlavə dəyərin yaradılması bizim üçün maraqlıdır”.
Günel CƏLİLOVA
