Əli Əlirzayev: “Azərbaycan və İranın birgə istehsal etdiyi avtomobillərin ixracı ölkə iqtisadiyyatına müsbət təsir göstərəcək”
Məlum olduğu kimi, 2016-cı ildə İranın "İran Khodro" və Azərbaycanın "Azeurocar" şirkətləri arasında Neftçala sənaye zonasında birgə zavodun yaradılması barədə saziş imzalanıb. Layihənin ümumi dəyəri 24 milyon manat qiymətləndirilir. Yatırımların 75 faizini Azərbaycan tərəfi, 25 faizini isə İran təmin edəcək. Zavodun illik istehsal gücü gələcəkdə 10 min avtomobil təşkil edəcək.
Azərbaycan və İranın birgə istehsal etdiyi “Xəzər” avtomobillərinin 2019-cu ildən MDB ölkələrinə ixrac olunması planlaşdırılır.
"Moskva Beynəlxalq Avtomobil salonu" sərgisində zavodun sahiblərindən biri olan “AzərMaş” şirkətinin rəsmi nümayəndəsi Veronika Allahverdiyeva Trend-ə açıqlamasında deyib ki, Azərbaycan istehsallı "Xəzər avtomobilləri sərgidə nümayiş etdirilir: “Sərgidə "Khazar LD" və "Khazar SD" modelləri təqdim edilir. İndiyədək zavodda 300-dən çox avtomobil buraxılıb. Hazırda avtomobil ehtiyat hissələri İranda istehsal olunur, lakin gələcəkdə istehsalatı Azərbaycanda təşkil etməyi planlaşdırırıq".
Xəzər avtomobillərinin MDB ölkələrinə ixrac olunmasının nə kimi perspektivləri olacaq?
İqtisadçı ekspert Əli Əlirzayev “Bakı-Xəbər”ə açıqlamasında qeyd etdi ki, avtomobillərin MDB ölkələrinə ixrac olunması ilk öncə ölkə iqtisadiyyatına müsbət təsir edəcək: “Xəzər” avtomobillərinin ixrac olunması o deməkdir ki, həm daxili bazar təmin olunacaq, həm də qonşu ölkələrdə məhsulumuz tanınacaq. Nəzərə almaq lazımdır ki, Azərbaycan və İranın birgə istehsal etdiyi avtomobillər MDB ölkələri bazarında özünə yer tapa biləcək”.
Həmsöhbətimiz onu da vurğuladı ki, Azərbaycan və İranın birgə istehsal etdiyi avtomobillərin ixracı ölkə iqtisadiyyatına müsbət təsir göstərəcək.
İqtisadçı hesab edir ki, “Xəzər” avtomobilləri xaricdən gətirilən maşınların qiymətindən ucuz olacaq. Belə olan halda həm yerli vətəndaşlar, həm də xaricilər Azərbaycan və İranın birgə istehsal etdiyi avtomobillərə üstünlük verəcəklər.
Günel CƏLİLOVA
