Xəyal Məmmədxanlı: “Əsasən həyat, tibbi, əmlak, kasko və kənd təsərrüfatı sığorta növləri üzrə yığım artıb”
Maliyyə Bazarlarına Nəzarət Palatası bu ilin yanvar-avqust ayları üzrə sığorta bazarının nəticələrini açıqlayıb. Məlumata görə, 2018-ci ilin yanvar-iyul ayları ərzində ölkədə fəaliyyət göstərən 21 sığorta şirkəti tərəfindən 459.9 mln. manat məbləğində sığorta haqları toplanıb, bu da ötən ilin eyni dövrü ilə müqayisədə 42,4 faiz çoxdur. Ötən ilin göstəricilərindən 1,3 faiz çox - 145.9 mln. manat məbləğində isə sığorta ödənişi həyata keçirilib.
Məlumat üçün bildirək ki, könüllü sığorta bazarı üzrə haqlar 334.5 mln. manat, ödənişlər isə 107.5 mln. manat təşkil edib. İcbari sığorta bazarı üzrə haqlar 125.4 mln. manat, ödənişlər isə 38.4 mln. manat olub.
2018-ci ilin yanvar-iyul ayları ərzində sektor üzrə məcmu sığorta haqlarının 73%-i könüllü, 27%-i isə icbari sığorta növlərinin payına düşüb. Sığorta ödənişlərinin 74%-i könüllü, 26%-i isə icbari sığorta növləri hesabına formalaşıb.
Qeyd edək ki, sığorta sahəsində artıq artım qeydə alınır. Bu sahədə inkişafın qeydə alınması tək sığorta sektoruna deyil, eyni zamanda ölkə iqtisadiyyatına da müsbət təsir göstərəcək.
Sığorta sahəsi üzrə mütəxəssis Xəyal Məmmədxanlı “Bakı-Xəbər”ə açıqlamasında qeyd etdi ki, sığorta sahəsində vəziyyət müsbətə doğru dəyişir: “Bir çox sığorta sahəsində artım qeydə alınır. İcbari sığortada hər il artım yaşanır, o cümlədən digər sığorta növlərində də artım baş verir. Əsasən kasko, tibbi, kənd təsərrüfatı risqlərinin sığortasında artım qeydə alınır. İlin sonuna kimi sığorta yığımının 600 milyon manatı keçməsi proqnozlaşdırılır”.
Həmsöhbətimiz onu da vurğuladı ki, ötən ilin altı ayı ilə müqayisədə bu il könüllü sığorta üzrə artım qeydə alınır: “Ötən il könüllü sığorta üzrə 223 milyon manat sığorta haqqı yığılmışdı. Bu il isə həmin sığorta üzrə 334 milyon sığorta haqqı yığılıb. Könüllü sığorta üzrə ötən illə müqayisədə 100 milyondan artıq yığım qeydə alınıb. Eyni zamanda, həyat sığortasında da ciddi artım qeydə alınıb. Bu sığorta üzrə ötən il 96 milyon, bu il isə 185 milyon manatlıq yığım olub. Qeyri-həyat sığorta növləri üzrə də artım baş verib. Ötən il 127 milyon sığorta haqqı yığıldığı halda, bu il qeyd olunan sığorta növü üzrə 149 milyon yığım qeydə alınıb”.
X.Məmmədxanlının sözlərinə görə, tibbi sığorta, əmlakın yanğın və digər risqlərdən sığortası üzrə də artım baş verib: “Ötən ilin yeddi ayında əmlakın yanğın və ya risqlərdən sığortası üzrə 19 milyon yığım olduğu halda, bu il həmin rəqəm 34 milyona bərabərdir. Kasko sığortada da ötən illə müqayisədə 2 milyon manat artım yaşanıb. Əksər sığorta növləri üzrə artım baş verib”.
Sığorta mütəxəssisi qeyd etdi ki, icbari sığortada artım müşahidə olunur. Ötən ilin yeddi ayı ilə müqayisədə bu il 125 milyon manat sığorta haqqı toplanıb. Bu sahədə də 26 milyon manatlıq artım qeydə alınıb: “Onu da deyim ki, avtomobillərin icbari sığortasında isə heç bir artım qeydə alınmayıb, olduğu kimi qalıb. Əsasən həyat, tibbi, əmlak və kasko sığorta növləri üzrə yığım artıb”.
Günel CƏLİLOVA
