Azər Allahverənov: “Belə ki, kənd təsərrüfatı, maşınqayırma, tikinti sektoru və istehsalatın digər sahələri inkişaf edir”
Ölkənin sosial-iqtisadi inkişafına birbaşa təsir edən amillərdən biri də yol infrastrukturudur. Azərbaycanda yol infrastrukturunun inkişafı ilə bağlı çox uğurlu dövlət siyasəti həyata keçirilir. Bu sahəyə qoyulan böyük vəsait, eyni zamanda, sahibkarlığa dövlət tərəfindən göstərilən növbəti dəstəyin təzahürüdür.
Əlverişli coğrafi mövqeyi olan Azərbaycanın tranzit potensialının reallaşdırılması Prezident İlham Əliyevin iqtisadi diversifikasiya siyasətində mühüm yer tutur. Dövlət başçısının Azərbaycanın nəqliyyat infrastrukturunun müasir dünya standartlarına uyğunlaşdırılması, tranzit potensialının daha da artırılması ilə bağlı həyata keçirdiyi dövlət siyasəti və qlobal miqyaslı təşəbbüsləri ölkəmizin sosial-iqtisadi inkişafına əsaslı töhfə verməklə yanaşı, qeyri-neft sektorunun inkişafına da təkan verir.
Görülən işlər sayəsində bütün magistral yollar beynəlxalq standartlar əsasında yenidən qurulub. Dəmir yolu infrastrukturu müasirləşdirilir və ölkə ərazisinin böyük hissəsini əhatə edir. “Şərq-Qərb” və “Şimal-Cənub” nəqliyyat dəhlizlərinin inkişafı istiqamətində həyata keçirilən tədbirlər, eyni zamanda, avtomobil yolları, xüsusilə Gürcüstan, Rusiya və İran istiqamətində ölkə ərazisindən keçən magistral yolların beynəlxalq standartlar əsasında yenidən qurulması Azərbaycanın nəqliyyat infrastrukturunun inkişafında əhəmiyyətli rol oynayır. Ölkənin tranzit potensialını daha da gücləndirib. Nəticədə formalaşan logistika və ticarət isə sürətlə qloballaşan dünyada iqtisadi artımın mühüm təkanverici qüvvəsinə çevrilir. Eyni zamanda, əsas sektorlarda birbaşa xarici investisiya qoyuluşlarının həcmini artırmağa şərait yaradır. Son 15 ildə 12300 km yol çəkilib, 443 yeni körpü tikilib. 40 yol layihəsinin icrası nəticəsində çoxlu sayda kəndin kommunikasiya imkanları yaxşılaşıb.
Bütün bunların fonunda, Azərbaycanda yol infrastrukturunun inkişaf etdirilməsi ilə bağlı dövlət siyasəti və bu istiqamətdə həyata keçirilən layihələr ölkədə qeyri-neft sektorunun inkişafında necə rol oynayır?
Məsələyə münasibət bildirən nəqliyyat sahəsi üzrə ekspert Azər Allahverənovun sözlərinə görə, yol infrastrukturunun inkişafında əldə olunan nailiyyətlər qeyri-neft sektorunun inkişafına müsbət təsir göstərir: “Bununla bağlı həyata keçirilən işlər təkcə sərnişin və yükdaşımalara öz müsbət təsirini göstərmir. Eyni zamanda, iqtisadiyyatın bir sıra digər sahələrinə müsbət təsir göstərir. O cümlədən, kənd təsərrüfatının inkişafına müsbət təsir göstərir. Bütün bunlar, əlbəttə ki, qeyri-neft sektorunun tərkib hissəsidir. Məsələn, biz hansısa sahəyə nəzər salsaq görərik ki, o sahənin uğuru, həmin sahədə irəliləyişi təmin edən zəruri resursların səfərbər olunması vasitəsilə mümkün ola bilər. Zəruru resurslar da bir neçə vasitə ilə təmin edilə bilər. Onlardan biri də yol infrastrukturudur. Bəzi hallarda bu birbaşa, bəzən də dolayısı yolla digər sahələrin inkişafına öz təsirini göstərir. Məsələn, qeyri-neft sektorunun tərkib hissəsi olan kənd təsərrüfatının inkişafı timsalında biz bu təsiri birbaşa görürük. Yükdaşımalarla əlaqəli olan digər sahələrin də inkişafına müsbət təsir göstərir. O cümlədən, texnoloji yeniliklərin tətbiq olunduğu sahələr də yol infrastrukturu ilə bağlıdır. Yol infrastrukturu olmasaydı, Azərbaycanda hansı beynəlxalq yükdaşımalardan söhbət gedə bilərdi?! Ona görə də bütün bunlar bir-birilə əlaqəli olan məsələlərdir. Bu baxımdan hesab edirəm ki, Azərbaycanda yol infrastrukturunun inkişafı bir sıra uğurların əldə olunmasına xidmət edir. Görünən odur ki, yol infrastrukturu ilə bağlı həyata keçirilən layihələr ölkədə qeyri-neft sektorunun inkişafına öz müsbət təsirini göstərir. Belə ki, kənd təsərrüfatı, maşınqayırma, tikinti sektoru və istehsalatın digər sahələri inkişaf edir. Bu baxımdan yol infrastrukturu daha geniş təsir imkanlarına malikdir”.
Vidadi ORDAHALLI
