Ruslan Atakişiyev: “Rusiyada büdcə gəlirlərinin formalaşmasında neft və qazın xüsusu çəkisi var”
Rusiyada görülən bir sıra tədbirlərə baxmayaraq, ölkədə dollar rubla nisbətdə bahalaşmaqda davam edir. Ən son məlumatlara görə, Moskva Birjasında dollar rubla nisbətdə 0,13 rubl yüksələrək, 68 rubl olub.
Avronun məzənnəsi isə əksinə, 0,7 rubl ucuzlaşaraq, 79,29 rubl təşkil edib. Dolların bahalaşmasına baxmayaraq, Rusiyanın fond bazarında vəziyyət stabildir. Belə ki, Moskva Birjasının indeksi 0,1% artaraq, 2318,71 olub, RTS indeksi isə 0,3% azalaraq, 1075,37 olub.
Bu arada Rusiya Prezidentinin mətbuat katibi Dmitri Peskov bildirib ki, Kreml rublun məzənnəsinin qeyri-sabit olmasından narahat deyil. O bunu təbii bazar volatilliyi adlandırıb: “Rubl zəifləyə də bilər, sonra korreksiya başlaya bilər. Son günlər məhz bu volatilliyi müşahidə edirik. Bu, təbii bazar prosesləridir”.
Digər tərəfdən, Rusiya Bankının (Mərkəzi Bank) sədri Elvira Nabiullina "The Wall Street Journal" nəşrinə müsahibəsində deyib ki, yaxın gələcəkdə Rusiya iqtisadiyyatının artım tempi illik 1,5-2%-dən çox olmayacaq. Onun sözlərinə görə, ənənəvi iqtisadi artım modeli artıq özünü doğrultmur: "Dünya bazarında neftin 1 barrelinin qiyməti 100 ABŞ dolları olsa belə, Rusiya iqtisadiyyatı çətin ki, il ərzində 1,5-2%-dən çox artsın".
E.Nabiullina əlavə edib ki, Rusiyada maliyyə sektorunun "təmizlənməsi" prosesi, demək olar ki sona çatıb.
Müşahidələr göstərir ki, Rusiya rəsmilərinin bəzi nikbin proqnozlarına rəğmən, ölkənin milli valyutası son aylar ucuzlaşmaqda davam edir. Sanki rublun ucuzlaşması dayanılmaz xarakter alıb. O baxımdan maraqlıdır, bu prosesin gələcəyi necə görünür?
Məsələyə münasibət bildirən İqtisadi Resursların Öyrənilməsi Mərkəzinin rəhbəri Ruslan Atakişiyevin sözlərinə görə, Rusiya rublunun hansı həddə qədər ucuzlaşması sanksiyaların miqyasından asılı olacaq: “Son dövrlər Qərblə Rusiya arasında qarşıdurma artıb. Bu çərçivədə gedən proseslər fonunda tərəflər arasında iqtisadi müstəvidə qarşıdurma dərinləşir. İqtisadi qarşıdurma da Rusiya milli valyutasının dəyərdən düşməsinə bu və ya digər dərəcədə təkan verir. Birləşmiş Ştatlar və Avropa İttifaqı tərəfindən Rusiyaya qarşı tətbiq olunan sanksiyaların son vaxtlar qüvvəyə minməsi birbaşa olaraq ölkədəki iqtisadi proseslərə öz təsirini göstərir. Xüsusən də ABŞ tərəfindən tətbiq olunan sanksiyalar. Çünki Rusiyada büdcə gəlirlərinin formalaşmasında neft və qazın xüsusu çəkisi var. Neftin qiyməti də dünya bazarında ucuz deyil. Ancaq Rusiyaya qarşı həyata keçirilən sanksiyalar rublun dəyərdən düşməsinə öz təsirini göstərir. Hesab edirəm ki, Rusiyanın Qərblə iqtisadi qarşıdurması daha kəskin müstəvidə davam edərsə, o zaman rublun dəyərdən düşməsi davam edəcək. Bu da, təbii ki, Rusiya iqtisadiyyatına öz mənfi təsirini göstərəcək və bütövlükdə, ölkə üçün yaxşı gələcək vəd etmir. Bütün bunlara baxmayaraq, Rusiya sahibkarlığın inkişafına daha yaxşı şərait yaradaraq çalışır ki, sanksiyaların təsirini minimuma endirsin. Məqsəd həm də rublun ucuzlaşması fonunda baş verə biləcək defoltun qarşısını almaqdır. O üzdən, bununla bağlı bir sıra tədbirlər görülür”.
Vidadi ORDAHALLI
