Vüqar Bayramov: “Qeyri-neft sektorunda alman şirkətlərinin sayı arta bilər”
Məlum olduğu kimi, bu günlərdə Almaniya Kansleri Angela Merkel Azərbaycanda səfərdə olub. Səfər zamanı iki ölkə rəsmiləri arasında bir sıra məsələlər müzakirə olunub.
Merkel ikitərəfli münasibətləri xarakterizə edərkən qeyd edib ki, Cənubi Qafqazda Azərbaycanın simasında ən böyük, ən vacib ticarət tərəfdaşları var: “Azərbaycanda xarici ticarət palatamız var, burada 150 alman müəssisəsi fəaliyyət göstərir. Azərbaycan da, öz növbəsində, iqtisadiyyatın şaxələndirilməsinin həyata keçirilməsində maraqlıdır və Almaniya bu sahədə öz ciddi töhfəsini verə bilər”.
Almaniya Kansleri Azərbaycanın Avropa İttifaqının enerji şaxələndirilməsində güclü bir amil olduğunu vurğulayaraq bildirib ki, “Cənub Qaz Dəhlizi”nin açılması Avropanın enerji təminatında böyük rol oynayacaq: “Biz Azərbaycanda Bakı-Tbilisi-Qars dəmir yolunun açılmasını yüksək qiymətləndiririk. Bu, Avropa ilə ticarət əlaqələrini genişləndirəcək, mübadilə aparılmasını yaxşılaşdıracaq”.
Məlumat üçün qeyd edək ki, 1991-ci ildə Azərbaycan dövlət müstəqilliyi əldə etdikdən sonra iki ölkə arasında münasibətlər inkişaf etməyə başlayıb. 1992-ci ildə Almaniya ilə Azərbaycan arasında diplomatik münasibətlər qurulub, səfirliklər açılıb. 1995-ci ilin dekabrında Almaniyanın o zamankı xarici işlər naziri Klaus Kinkelin Azərbaycana, 1996-cı ilin iyulunda isə Azərbaycanın o vaxtkı dövlət başçısı Heydər Əliyevin Almaniyaya səfərləri iki ölkə arasında əlaqələri yeni səviyyəyə yüksəltdi. Sonrakı illərdə ölkələr arasında siyasi, iqtisadi, elmi-texniki, müdafiə, təhlükəsizlik, terrorizmə qarşı mübarizə sahəsində uğurlu əməkdaşlıq inkişaf etdirildi. Siyasi əlaqələrin möhkəmlənməsi, əlverişli investisiya mühiti alman şirkətlərinin Azərbaycana gəlməsi və uğurlu fəaliyyətinin başlıca səbəbləri kimi xarakterizə oluna bilər. “Simens”, “Ferrosstal”, “İnterselekt”, “Mercedes Bens” kimi iri şirkətlər də daxil olmaqla Almaniyanın 150 müəssisəsi Azərbaycanda fəaliyyət göstərir.
Maraqlıdır, Merkelin Bakıya səfərindən sonra sözügedən alman müəssisələrinin Azərbaycanda sayı nə qədər artacaq?
Məsələyə münasibət bildirən iqtisadçı-ekspert Vüqar Bayramovun sözlərinə görə, bundan sonra Azərbaycanda fəaliyyət göstərəcək alman müəssisələrinin sayının daha da artacağı gözlənir: “Merkelin Bakıya səfər etməsi Almaniya-Azərbaycan münasibətlərində yeni bir mərhələ kimi qiymətləndirilməlidir. Nəzərə almaq lazımdır ki, Merkel Bakıda olarkən iş adamları ilə ayrıca görüş keçirdi. Bu da iş adamlarına bir mesaj idi. Xüsusən də alman iş adamlarının Azərbaycanın qeyri-neft sektoruna yatırımlarının artırılması baxımından bir mesaj idi. Bu kontekstdən də güman olunur ki, Almaniya iş adamlarının Azərbaycana qoyduqları sərmayələrdə artımlar olacaq. Hazırda Azərbaycanda Almaniyanın 500 milyon dollara yaxın sərmayəsi var. Bundan sonra sərmayənin həcmində artımların olacağı proqnozlaşdırılır. Qeyri-neft sektorunda alman şirkətlərinin sayı arta bilər. Sözsüz ki, bütün bunlar müəyyən zaman tələb edir. Yəni bunun konkret hansı mərhələdə baş verəcəyini demək çətindir. Ancaq Merkelin son səfərinin nəticəsi olaraq qeyd etmək lazımdır ki, gələcəkdə həm alman sərmayəsində, həm də Azərbaycanda fəaliyyət göstərən Almaniya müəssisələrinin sayında artımların olacağı gözlənir. Bunun hansı həcmdə və nə qədər sayda olacağını proqnozlaşdırmaq çətin olsa belə, görünən tərəf ondan ibarətdir ki, Almaniya sərmayəsinin Azərbaycana yatırımı artacaq”.
Vidadi ORDAHALLI
